Tərtər Hərbi Məhkəməsi Qərardad — İş №3-1(098)-232/2025

Azərbaycan Respublikası adından QƏRARDAD Tərtər rayonu İş № 3-1(098)-232/2025 15.09.2025 TƏRTƏR HƏRBİ MƏHKƏMƏSİ Tərtər Hərbi Məhkəməsinin hakimi Şəfiyeva Könül Səməd qızı Şəxs Azərbaycan Respublikası İnzibati Xətalar Məcəlləsinin 613.2-ci maddəsində nəzərdə tutulan inzibati xətanı törətməsinə dair inzibati xəta haqqında iş üzrə icraatın başlanması barədə qərarı və ona əlavə edilmiş sənədləri baxılmağa hazırlanması məqsədi ilə nəzərdən keçirib, MÜƏYYƏNETDİ: Tərtər hərbi prokuroru tərəfindən 06 avqust 2025-ci il tarixdə Müdafiə Nazirliyinin N nömrəli hərbi hissəsinin müddətdən artıq həqiqi hərbi xidmət hərbi qulluqçusu, əsgər Şəxs barəsində Azərbaycan Respublikası İnzibati Xətalar Məcəlləsinin 613.2-ci maddəsi ilə inzibati xəta haqqında iş üzrə icraat başlanmış və inzibati material baxılması üçün aidiyyəti üzrə Tərtər Hərbi Məhkəməsinə göndərilmişdir. İnzibati xəta haqqında iş materiallarından görünür ki, Müdafiə Nazirliyinin N nömrəli hərbi hissəsinin müddətdən artıq həqiqi hərbi xidmət hərbi qulluqçusu, əsgər Şəxs xx.xx.2025-ci il saat 08:00-dan xx.xx.2025-ci il saat 08:00-dək olan müddət ərzində üzrlü səbəblər olmadan hərbi hissəyə vaxtında gəlməməsi ilə bağlı hərbi hissə komandiri tərəfindən xx.xx.2025-ci il tarixdə araşdırma təyin edilmiş, toplanmış materiallar xx.xx.2025-ci il tarixdə araşdırmanın davam etdirilməsi məqsədilə Müdafiə Nazirliyinin 9-cu təhqiqat bölməsinə göndərilmişdir. Müdafiə Nazirliyinin 9-cu təhqiqat bölməsindən xx.xx.2025-ci il tarixdə Tərtər Hərbi Prokurorluğuna göndərilmiş həmin materiallar əsasında isə xx.xx.2025-ci il tarixdə hərbi prokuror tərəfindən inzibati xəta haqqında iş üzrə icraatın başlanılması barədə qərar qəbul edilərək, baxılması üçün Tərtər Hərbi Məhkəməsinə göndərilmişdir. Odur ki, qeyd edilən inzibati xəta haqqında iş üzrə materiallar və ona əlavə edilmiş sənədlər Tərtər Hərbi Məhkəməsinin 07 avqust 2025-ci il tarixli 3-1(098)-199/2025 saylı qərardadı ilə geri qaytarılmışdır. Lakin Tərtər hərbi prokurorluğu tərəfindən inzibati xəta haqqında iş üzrə icraat başlanmaq haqqında xx.xx.2025-ci il tarixli qərar yenidən Tərtər Hərbi Məhkəməsinə göndərilmiş, Tərtər Hərbi Məhkəməsinin 05 sentyabr 2025-ci il tarixli 3-1(098)-220/2025 nömrəli qərardadı ilə geri qaytarılmışdır. Tərtər hərbi prokurorluğu tərəfindən inzibati xəta haqqında iş üzrə icraat başlanmaq haqqında xx.xx.2025-ci il tarixli qərar yenidən Tərtər Hərbi Məhkəməsinə göndərilmişdir. Lakin Tərtər Hərbi Prokurorluğu həmin qərardadda qeyd edilənlərin mahiyyətinə varmadan, qanunvericilikdə edilmiş dəyişikliklərin hansı zərurətdən irəli gəldiyinin məğzini aydınlaşdırmadan, həmin iş üzrə qərar qəbul etmək hüququna malik olmaq üçün AR İXM-in 54.2ci maddəsinin ikinci cümləsində müəyyən edilən tələbin (İXM-in 99.3, 99.1.2-ci maddələrində nəzərdə tutulan) mövcudluğunu qeyd etmədən, müşayiət məktubuna Konstitusiya Məhkəməsinin Plenumunun “Azərbaycan Respublikası Konstitusiyasının 71-ci maddəsinin İ və X hissələri baxımından Azərbaycan Respublikası İnzibati Xətalar Məcəlləsinin 18.5, 18.6, 43.3-1, 54.2 və 103-cü maddələrinin əlaqəli şəkildə şərh edilməsinə dair” xx.xx.2023-cü il tarixli qərarının bir sıra abzaslarını daxil etməklə, inzibati xəta haqqında iş üzrə qəbul etdiyi həmin qərarı baxılması üçün yenidən Tərtər Hərbi Məhkəməsinə göndərilmişdir. Məhkəmə inzibati xəta haqqında iş materiallarını araşdıraraq hesab edir ki, inzibati xəta haqqında iş üzrə icraatın başlanması barədə qərar ona əlavə edilmiş materiallarla birlikdə geri qaytarılmalıdır. Məhkəmə hesab edir ki, xx.xx.2025-ci il tarixli 3-1(098)-199/2025 saylı və xx.xx.2025-ci il tarixli 3- 1(098)-220/2025 saylı qərardadlarda inzibati xəta haqqında işin geri qaytarılması səbəbi tam aydın və ətraflı şəkildə əsaslandırıldığından hazırkı qərardadda həmin halların təkrarən qeyd edilməsinə zərurət yoxdur. Odur ki, həmin qəradadlarda qeyd edilənlər nəzərə alınmaqla hazırkı inzibati xəta haqqında iş üzrə materiallar Tərtər Hərbi Prokurorluğuna geri qaytarılmalıdır. Azərbaycan Respublikası İXM-nin 106-cı maddəsinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən inzibati xəta haqqında protokolun və işin digər materiallarının bu Məcəllənin tələblərinə müvafiq olaraq tərtib edilməsi məsələsini də həll edir. Azərbaycan Respublikası İXM-nin 109.1.6-cı maddəsində göstərilir ki, protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılmasına dair qərardad qəbul edilir. Azərbaycan Respublikası Konstitusiya Məhkəməsinin Plenumunun “Azərbaycan Respublikası İnzibati Xətalar Məcəlləsinin 128-ci maddəsi baxımından həmin Məcəllənin 109-cu maddəsinin şərh edilməsinə dair” 03 may 2019-cu il tarixli qərarına əsasən Azərbaycan Respublikası İnzibati Xətalar Məcəlləsinin 128-ci maddəsinin tələbləri baxımından həmin Məcəllənin 109-cu maddəsində nəzərdə tutulmuş inzibati xətalar haqqında işin baxılmasına hazırlanması zamanı qəbul edilən qərardadlardan apellyasiya şikayəti vermək hüququ istisna edilir. Azərbaycan Respublikası İnzibati Xətalar Məcəlləsinin 106, 109.1.6-cı maddələrini rəhbər tutaraq, məhkəmə QƏRARA ALDİ: Müdafiə Nazirliyinin N nömrəli hərbi hissəsinin müddətdən artıq həqiqi hərbi xidmət hərbi qulluqçusu, əsgər Şəxs Azərbaycan Respublikası İnzibati Xətalar Məcəlləsinin 613.2-ci maddəsində nəzərdə tutulan inzibati xətanı törətməsinə dair inzibati xəta haqqında iş üzrə icraat səlahiyyətli vəzifəli şəxs tərəfindən başlanmadığından inzibati xəta haqqında iş üzrə icraatın başlanması barədə qərar və ona əlavə edilmiş materiallar Tərtər Hərbi Prokurorluğuna geri qaytarılsın. Qərardaddan şikayət və protest verilə bilməz. Hakim: Könül Şəfiyeva