Naxçıvan MR Şərur Rayon Məhkəməsi Qərar — İş №3(110)-171/2023

Azərbaycan Respublikası adından QƏRAR Şərur şəhəri İş № 3(110)-171/2023 18.07.2023 NAXÇIVAN MR ŞƏRUR RAYON MƏHKƏMƏSİ Hakim Əliyev Mehdi Ədalət oğlunun sədrliyi, Ceyranova Aytac Ramiz qızının katibliyi barəsində inzibati xəta haqında iş üzrə icraat aparılan şəxs Şəxs iştirakı ilə, Şərur Rayon İcra və Probasiya Şöbəsindən daxil olmuş xx.xx.1983-cü ildə Şərur rayon Şəhid Məmməd kəndində doğulmuş, Azərbaycan Respublikasının vətəndaşı, evli, 4 uşaqlı, orta təhsilli, fərdi təsərrüfatla məşğul olan, Şərur rayon Danyeri kəndində yaşayan Şəxs barəsində (fin: xxxxxxx) Azərbaycan Respublikası İnzibati Xətalar Məcəlləsinin 528.1-ci maddəsi ilə tənbeh edilməsinə dair inzibati xəta haqqında materiala Şərur Rayon Məhkəməsinin inzibati binasında açıq məhkəmə iclasında baxaraq müəyyən etdim: Şərur Rayon İcra və Probasiya Şöbəsində icraatda olan Culfa Rayon Məhkəməsi tərəfindən verilmiş 2(089)-145/2013 saylı xx.xx.2013-cü il tarixli icra sənədinə əsasən Şəxs 2 uşağın saxlanılması üçün hər ay cəmi 180 manat sabit pul məbləğində alimentin tutularaq Əliyeva Naimə qurban qızının xeyrinə ödəməsinin göstərilməsinə baxmayaraq Şəxs uzun müddət ərzində icra sənədinin icrasından üzürsüz səbəbdən boyun qaçırmış, 9273 manat aliment borcu yaranmış, edilmiş şifahi və yazılı xəbərdarlıqlara məhəl qoymamış və bununla da Azərbaycan Respublikası İXM-nin 528.1-ci maddəsində nəzərdə tutulmuş xətanı törətmişdir. Məhkəmənin nəticəyə gəlməsi üçün əsaslandığı sübutlar Məhkəmədə Şəxs əməli inzibati xəta haqqında protokol və protokola əlavə olunmuş sənədlər, icra məmurunun və özününü izahatı ilə tam sübuta yetirilmişdir. Barəsində inzibati xəta haqqında iş üzrə icraat aparılan şəxsin izahatı: Məhkəmə iclasında iştirak edən barəsində inzibati xəta haqında iş üzrə icraat aparılan şəxs Şəxs izahatında və verilən suallara cavabında icra sənədləri barədə məlumatlı olduğunu, maddi vəziyyəti yaxşı olmadığına görə borclarını tam ödəyə bilmədiyini, ikinci dəfə ailə qurduğunu, iki uşağı da doğulduğunu, borcunu hissə-hissə ödəyə biləcəyini bildirmişdir. Protokolu tərtib edən şəxsin izahatı: Məhkəmədə protokolu tərtib edən şəxs Şərur Rayon İcra və Probasiya Şöbəsinin icra məmuru X2 izahatında Culfa Rayon Məhkəməsi tərəfindən verilmiş icra sənədinin aidiyyəti üzrə Şərur Rayon İcra və Probasiya Şöbəsinə daxil olduğu andan qanuna müvafiq icra hərəkətləri yerinə yetirildiyini, borcluya dəfələrlə xəbərdarlıqlar edildiyini, 9273 manat aliment borcundan heç bir ödəniş etmədiyini, əvvəllər də icra şöbəsinə çağırıldığını, tələbkarın da onun borclarını hissə-hissə ödəməyə razılıq verdiyini, lakin bir neçə ilə keçməsinə baxmayaraq yenə borclarını ödəmədiyini, tələbkarın da yuxarı icra qurumuna şikayət etdiyini, şəxsin barəsində axtarış elan edildiyini, Şərur Rayon Polis İdarəsi tərəfindən tutularaq bu gün icra qurumuna təhvil verildiyini, məhkəmə qərarının icrasından üzürsüz səbəbdən yayınmanın nəticələrinin ona izah olunduğunu, borclunun 2019 və 2020-ci illərdə borcunu ödəyəcəyi ilə bağlı 2 dəfə iltizam verdiyini, lakin borclunun yenə icra sənədlərinin icrasından boyun qaçırdığını, buna görə də onun barəsində inzibati protokol tərtib edildiyini bildirmişdir. Sənədlər: İş materiallarında olan olan Culfa Rayon Məhkəməsi tərəfindən verilmiş xx.xx.2015ci il tarixli 2(089)-113/2015 saylı icra sənədinə əsasən Culfa Rayon Məhkəməsinin 2(089)- 145/2013 saylı xx.xx.2013-cü il tarixli məhkəmə əmri ilə müəyyən edilmiş alimentin miqdarı dəyişdirilərək Şəxs 2 uşağın saxlanılması üçün hər ay cəmi 180 manat sabit pul məbləğində alimentin tutularaq Əliyeva Naimə qurban qızının xeyrinə ödənilməsi göstərilmişdir. İş materiallarında olan xx.xx.2015-ci il tarixli icraata başlama haqqında qərar və tələbin könüllü icrası barədə bildiriş və xəbərdarlıqların surətindən görünür ki, tələbin könüllü icra olunmayacağı təqdirdə tələbin məcburi qaydada icra olunacağı göstərilmişdir. İş materiallarında olan Şərur Rayon İcra və Probasiya Şöbəsinin xx.xx.2023-cü il tarixli qərarından və xx.xx.2023-cü il tarixli aktdan görünür ki, borclunun barəsində axtarış elan olunmuş, borcu polis tərəfindən tutularaq icra qurumuna təhvil verilmişdir. Məhkəmənin əsaslandırması Məhkəmə toplanmış sübutları araşdırıb, sübutlara tam, hərtərəfli və obyektiv qiymət verib belə nəticəyə gəlir ki, Şəxs əməli düzgün olaraq Azərbaycan Respublikası İnzibati Xətalar Məcəlləsinin 528.1-ci maddəsi ilə tövsif olunmuşdur. Azərbaycan Respublikasının İnzibati Xətalar Məcəlləsinin 528.1-ci maddəsinə əsasən icra sənədindəki tələbin üzrsüz səbəbdən icra məmuru tərəfindən müəyyən olunmuş müddətdə icra edilməməsinə və ya icra məmurunun məhkəmə və ya başqa dövlət orqanlarının qərarlarının icrası ilə əlaqədar digər qanuni tələblərinin yerinə yetirilməməsinə görə fiziki şəxslər beş yüz manatdan min manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir. Şəxs əməli yuxarıda göstərilən maddənin tövsifedici əlamətlərinə uyğundur və iş üzrə toplanmış sübutlar əsasında tam təsdiqini tapır. Azərbaycan Respublikası İnzibati Xətalar Məcəlləsinin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. İş üzrə Şəxs əməlini ağırlaşdıran və yüngülləşdirən hallar müəyyən olunmadı. İnzibati tənbeh tətbiq edərkən məhkəmə xətanın xarakterini, inzibati xəta törədən şəxsin şəxsiyyətini, onun təqsirinin dərəcəsini və həmçinin işin hallarını nəzərə alaraq belə nəticəyə gəlir ki, Şəxs barəsində inzibati həbs tənbeh növü tətbiq edilməlidir. İnzibati Xətalar Məcəlləsinin 31.4-cü maddəsinə görə həmin məcəllənin xüsusi hissəsində inzibati xətanın törədilməsinə görə müəyyən edilən inzibati tənbehin yalnız yuxarı həddi müəyyən edildikdə, tətbiq edilən inzibati tənbeh onun yuxarı həddinin dörddə birindən az ola bilməz. Yuxarıda göstərilənlərə əsaslanıb, Azərbaycan Respublikası İXM-nin 114-115, 117, 128-130-cu maddələrini rəhbər tutaraq məhkəmə qərara aldı: Barəsində inzibati xəta haqqında iş üzrə icraat aparılan şəxs Şəxs Azərbaycan Respublikası İnzibati Xətalar Məcəlləsinin 528.1-ci maddəsi ilə təqsirli bilinib 20 (iyirmi) gün müddətinə inzibati qaydada həbs edilsin. Həbs etmənin əvvəli xx.xx.2023-cü il tarixdən hesablansın. Qərar dərhal icra edilsin. Qərarın icrası Naxçıvan MR Daxili İşlər Nazirliyinin X1 həvalə olunsun. Qərarın surəti təqdim edildiyi və ya alındığı gündən 10 (on) gün müddətində inzibati xəta haqqında iş üzrə qərardan Şərur Rayon Məhkəməsi vasitəsilə və ya birbaşa Naxçıvan Muxtar Respublikasının Ali Məhkəməsinin Cinayət Kollegiyasına apellyasiya şikayəti verilə bilər. Hakim: Mehdi Əliyev