Naxçıvan MR Şərur Rayon Məhkəməsi Qərar — İş №3(110)-255/2024

Azərbaycan Respublikası adından QƏRAR Şərur şəhəri İş № 3(110)-255/2024 17.09.2024 NAXÇIVAN MR ŞƏRUR RAYON MƏHKƏMƏSİ Hakim Əliyev Mehdi Ədalət oğlunun sədrliyi, Ceyranova Aytac Ramiz qızının katibliyi, barəsində inzibati xəta haqqında iş üzrə icraat aparılan şəxs Şəxs iştirakı ilə Şərur Rayon Polis İdarəsindən daxil olmuş, xx.xx.1976-cı il tarixdə Şərur rayonu, Siyaqut kəndində doğulmuş, Azərbaycan Respublikasının vətəndaşı, subay, 2 uşaqlı, orta təhsilli, çoban, Şərur rayonu, Siyaqut kəndində yaşayan Şəxs barəsində (fin: xxxxxxx) Azərbaycan Respublikası İnzibati Xətalar Məcəlləsinin 510-cu maddəsi ilə tənbeh edilməsinə dair inzibati xəta haqqında materiala Şərur Rayon Məhkəməsinin inzibati binasında açıq məhkəmə iclasında baxaraq müəyyən etdi: Şəxs xx.xx.2024-cü il tarixdə saat təxminən 23:30 radələrində Şərur rayonu Siyaqut kəndində ucadan nalayiq ifadələr işlədərək ictimai qaydanı pozmuşdur. Bununla da Azərbaycan Respublikası İXM-nin 510-cu maddəsində nəzərdə tutulmuş xətanı törətmişdir. Məhkəmənin nəticəyə gəlməsi üçün əsaslandığı sübutlar Məhkəmədə Şəxs əməli inzibati xəta haqqında protokola əlavə olunmuş sənədlər, şahidlərin və özünün izahatı ilə tam sübuta yetirilmişdir. Barəsində inzibati xəta haqqında iş üzrə icraat aparılan şəxsin izahatı: Məhkəmə iclasında iştirak edən barəsində inzibati xəta haqında iş üzrə icraat aparılan şəxs Şəxs izahatında və verilmiş suallara cavabında xx.xx.2024-cü il tarixdə saat təxminən 23:30 radələrində həddindən artıq içki qəbul etdiyini, kəndə gedib ucadan səsküy saldığını, anasının çıxıb onu gördüyünü və evə apardığını, içkili olduğundan evdə nə varsa hamısını dağıtdığını, anasına nalayiq ifadələr işlətdiyini, sonra anasının polisə zəng etdiyini, polis əməkdaşlarının gəlib onu Şərur RPİ-yə apardıqlarını, tutduğu əməlindən peşman olduğunu bildirdi. Şahidin izahatı: Məhkəmədə şahid qismində dindirilən X2 izahatında və verilən suallara cavabında oğlu Rəşadın xx.xx.2024-cü il tarixdə saat təxminən 23:30 radələrində evdə ikən qulağına səs gəldiyini, Rəşadın nalayiq söyüşlər işlətdiyini, gəlib evi dağıtdığını, bu barədə Şərur RPİ-yə məlumat verdiyini, polis əməkdaşlarının gəlib onu apardıqlarını, onun içki içən zaman bu hərəkətləri etdiyini, Rəşadın mütəmadi olaraq içki içdiyini, onu döydüyünü, qolunu qırdığını, təhqir etdiyini, onun ailəsinin dağıldığını, fikrinin ancaq içki içmək olduğunu bildirdi. Məhkəmədə şahid qismində dindirilən X1 izahatında və verilən suallara cavabında xx.xx.2024-cü il tarixdə Şərur rayonu, Siyaqut kəndində post yoldaşı Nicatla birlikdə xidmət apardıqlarını, saat təxminən 23:30 radələrində ucadan səs-küy gəldiyini eşitdiyini, oraya yaxınalaşan zaman Şəxs gördüklərini, onun içkili vəziyyətdə ünvansız nalayiq söyüşlər işlətdiyini, onu nizam-intizma dəvət etdiklərini, sonra Şərur RPİ-yə gətirdiklərini, onu sərxoşluq müayinəsindən keçirdiklərini, bu zaman yüksək dərəcədə içkili çıxdığını, əvvəllər də bu cür hadisələr baş verdiyini, nalayiq ifadələr işlətdiyindən qonşuların narahatlığına səbəb olduğunu bildirdi. Sənədlər: İş materiallarında olan xx.xx.2024-cü il tarixli 0691 nömrəli tutma protokolundan görünür ki, Şəxs xx.xx.2024-cü il tarixdə saat 16:00-da inzibati qaydada tutulmuş, xx.xx.2024-cü il tarixdə saat 15:00-da azad edilmişdir. Məhkəmənin əsaslandırması: Məhkəmə toplanmış sübutları araşdırıb, sübutlara tam, hərtərəfli və obyektiv qiymət verib belə nəticəyə gəlir ki, Şəxs əməli düzgün olaraq Azərbaycan Respublikası İnzibati Xətalar Məcəlləsinin 510-cu maddəsi ilə tövsif olunmuşdur. Azərbaycan Respublikasının İnzibati Xətalar Məcəlləsinin 510-cu maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. Şəxs əməli yuxarıda göstərilən maddənin tövsifedici əlamətlərinə uyğundur və iş üzrə toplanmış sübutlar əsasında tam təsdiqini tapır. Azərbaycan Respublikasıİnzibati Xətalar Məcəlləsinin 21-ci maddəsinə görə inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Azərbaycan Respublikasıİnzibati Xətalar Məcəlləsinin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. İş üzrə Şəxs əməlini ağırlaşdıran və yüngülləşdirən hallar müəyyən olunmadı. İnzibati tənbeh tətbiq edərkən məhkəmə xətanın xarakterini, inzibati xəta törədən şəxsin şəxsiyyətini, onun təqsirinin dərəcəsini, əmlak vəziyyətini və həmçinin işin hallarını nəzərə alaraq belə nəticəyə gəlir ki, Şəxs barəsində inzibati həbs tənbeh növü tətbiq edilməlidir. İnzibati Xətalar Məcəlləsinin 31.4-cü maddəsinə görə həmin məcəllənin xüsusi hissəsində inzibati xətanın törədilməsinə görə müəyyən edilən inzibati tənbehin yalnız yuxarı həddi müəyyən edildikdə, tətbiq edilən inzibati tənbeh onun yuxarı həddinin dörddə birindən az ola bilməz. Yuxarıda göstərilənlərə əsaslanıb, Azərbaycan Respublikası İXM-nin 114-115, 117, 128-130-cu maddələrini rəhbər tutaraq məhkəmə qərara aldı: Barəsində inzibati xəta haqqında iş üzrə icraat aparılan şəxs Şəxs Azərbaycan Respublikası İnzibati Xətalar Məcəlləsinin 510-cu maddəsi ilə təqsirli bilinib 10 (on) gün müddətinə inzibati qaydada həbs edilsin. Həbs etmənin əvvəli xx.xx.2024-cü il tarixdən hesablansın. Qərar dərhal icra edilsin. Qərarın icrası Naxçıvan MR Daxili İşlər Nazirliyinin X4 həvalə olunsun. Qərarın surəti təqdim edildiyi və ya alındığı gündən 10 (on) gün müddətində inzibati xəta haqqında iş üzrə qərardan Şərur Rayon Məhkəməsi vasitəsilə və ya birbaşa Naxçıvan Muxtar Respublikasının Ali Məhkəməsinin Cinayət Kollegiyasına apellyasiya şikayəti verilə bilər. Hakim: Mehdi Əliyev