Naxçıvan MR Kəngərli Rayon Məhkəməsi Qərar — İş №3(111)-8/2024

Azərbaycan Respublikası adından QƏRAR Qıvraq qəsəbəsi İş № 3(111)-8/2024 01.03.2024 NAXÇIVAN MR KƏNGƏRLİ RAYON MƏHKƏMƏSİ Hakim Əhmədov Zülfüqar Əziz oğlunun sədrliyi, X1 məhkəmə iclas katibliyi, barəsində inzibati xəta haqqında iş üzrə icraat aparılan şəxs Şəxs, zərərçəkmiş şəxs X2 iştirakı ilə, xx.xx.1990-cı ildə Şərur rayon Şahtaxtı kəndində anadan olmuş, orta təhsilli, işsiz, Kəngərli rayonu Şahtaxtı kəndində qeydiyyatda olan Şəxs barəsində Azərbaycan Respublikası İnzibati Xətalar Məcəlləsinin 510-cu maddəsi ilə Kəngərli rayon Polis Şöbəsindən daxil olmuş inzibati xəta haqqında protokol üzrə inzibati xəta haqqında işə açıq məhkəmə iclasında baxaraq, müəyyən etdi: Şəxs Azərbaycan Respublikası İnzibati Xətalar Məcəlləsinin 510-cu maddəsi ilə inzibati xəta törətməsinə dair Kəngərli rayon Polis Şöbəsi tərəfindən tərtib edilmiş 01 mart 2024-cü il tarixli, MN ******* nömrəli inzibati xəta haqqında protokol və ona əlavə edilmiş sənədlər baxılması üçün aidiyyəti üzrə Kəngərli Rayon Məhkəməsinə göndərilmişdir İnzibati xəta haqqında protokola və ona əlavə edilmiş sənədlərə əsasən Şəxs 29 fevral 2024-cü il tarixdə saat 16:30 radələrində Kəngərli Rayon Məhkəməsinin inzibati binasının yanında ucadan səs-küy salaraq Kəngərli Rayon İcra və Probasiya Bölməsinin rəisi Oktay Səfərova qarşı nalayiq ifadələr və söyüşlər işlədərək xırda xuliqanlıq hərəkətləri etmiş və ictimai qaydanı pozmuşdur. Bununla da o, Azərbaycan Respublikasının İnzibati Xətalar Məcəlləsinin 510-cu maddəsində nəzərdə tutulmuş inzibati xəta əməlini törətmişdir. Barəsində inzibati xəta haqqında iş üzrə icraat aparılan şəxs Şəxs izahatında 29 fevral 2024-cü il tarixdə saat 16:30 radələrində Kəngərli Rayon Məhkəməsinin inzibati binasına yaxınlaşdığını, Oqtay müəllimin həyətdə olduğunu, ona yaxınlaşıb motosikletini satdığını, 700 manat aliment borcuna verəcəyini dediyini, hazırda işsiz olduğuna görə borcu ödəyə bilmədiyini, Türkiyə Respublikasına gedib işləməsi üçün aliment borcuna görə üzərinə qoyulmuş məhdudiyyətin götürülməsini Oktay müəllimdən xahiş etdiyini, Oktay müəllimin xəbər edəcəyini dediyini, həmin vaxt əsəbləşdiyinə görə səsini qaldırıb söyüş söydüyünü, bu hərəkətləri etdiyinə görə peşman olduğunu, Oktay Səfərovdan üzr istədiyini bildirdi. İnzibati xəta haqqında iş üzrə zərərçəkmiş şəxs X5 izahatında 29 fevral 2024-cü il tarixdə saat 16:30 radələrində Kəngərli Rayon Məhkəməsinin inzibati binasının yanında olduğunu, həmin vaxt aliment işi üzrə borclu olan Şahtaxtı kənd sakini Şəxs yaxınlaşdığını, barəsində məhkəmə qərarı ilə ölkədən çıxışına qoyulmuş məhdudiyyətin götürülməsini tələb etdiyini, bunun üçün borcun tam ödəməli olduğunu ona dediyini, Orxanın əsəbləşərək nalayiq hərəkətlər etdiyini, onun və məhkəmənin ünvanına söyüşlər söydüyünü, Orxanı nizamlı olmağa dəvət etdiyini, lakin onun öz hərəkətlərini davam etdirdiyini, həmin vaxt orada olan icra məmuru İmran və məhkəmənin təsərrüfat müdiri Faiqin Orxanı sakitləşdirdiklərini, lakin Orxan yenə də nalayiq söyüşlərlə öz hərəkətlərini davam etdirdiyini və Şəxs bağışlamadığını bildirdi. İnzibati xəta haqqında iş üzrə şahid qismində izahat verən Şahid2 izahatında Kəngərli Rayon İcra və Probasiya Bölməsinin icra məmuru vəzifəsində işlədiyini, 29 fevral 2024-cü il tarixdə saat 16:30 radələrində Kəngərli Rayon Məhkəməsinin inzibati binasının yanında olduğunu, həmin vaxt aliment işi üzrə borclu olan Şahtaxtı kənd sakini Şəxs orada olan Oktay müəllimə yaxınlaşdığını, barəsində məhkəmə qərarı ilə ölkədən çıxışına qoyulmuş məhdudiyyətin götürülməsini tələb etdiyini, Oktay müəllimin isə bunun üçün borcun tam ödəməli olduğunu ona dediyini, Orxanın əsəbləşərək nalayiq hərəkətlər etdiyini, Oktay müəllimin və məhkəmənin ünvanına söyüşlər söydüyünü, Orxanı nizamlı olmağa dəvət etdiklərini, lakin onun öz hərəkətlərini davam etdirdiyini, yenə də nalayiq söyüşlərlə öz hərəkətlərini davam etdirdiyini göstərdi. İnzibati xəta haqqında iş üzrə şahid qismində izahat verən Şahid1 digər Şahid2 ilə eyni məzmunlu izahat verərək onun göstərdiyi xüsusatları bir daha təsdiq etdi. Məhkəmə toplanmış sübutlara qiymət verərək belə nəticəyə gəlir ki, Şəxs əməli düzgün olaraq Azərbaycan Respublikası İnzibati Xətalar Məcəlləsinin 510-cu maddəsi ilə tövsif olunmuşdur. Ona görə də o, həmin maddə ilə təqsirli bilinib tənbeh olunmalıdır. Azərbaycan Respublikası İnzibati Xətalar Məcəlləsinin: 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. 6.1-ci maddəsinə əsasən, inzibati xətalara görə inzibati tənbeh həmin Məcəlləyə uyğun olaraq tətbiq edilir. 9.1-ci maddəsinə əsasən, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına uyğun, qanuni və əsaslı olmalıdır. 12-ci maddəsinə əsasən həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. 21-ci maddəsinə əsasən, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. 84-cü maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. 510-cu maddəsinə əsasən, xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. Azərbaycan Respublikası Konstitusiya Məhkəməsi Plenumunun “Azərbaycan Respublikası Cinayət Məcəlləsinin 221.3-cü maddəsinin şərh edilməsinə dair” 20 may 2011-ci il tarixli qərarında qeyd edilir ki, xuliqanlıq obyektiv cəhətdən Azərbaycan Respublikası Cinayət Məcəlləsinin 221-ci maddəsinin dispozisiyasında sadalanan müxtəlif hərəkətlərdə ifadə olunsa da, onların hamısı üç əsas əlamətə malik olmalıdır. Birincisi, bu hərəkətlər ictimai qaydanı kobud surətdə pozmalıdır; ikincisi, belə pozuntu cəmiyyətə açıqca hörmətsizlik ifadə etməlidir; üçüncüsü isə vətəndaşlar üzərində zor tətbiq olunması ilə və ya belə zorun tətbiq edilməsi hədəsi ilə, habelə özgənin əmlakının məhv edilməsi, yaxud zədələnməsi ilə müşayiət edilməlidir. Qeyd olunmalıdır ki, cəmiyyətə açıqca hörmətsizlikdə ifadə olunan ictimai qaydanın kobud surətdə pozulması öz-özlüyündə inzibati hüquqpozmadır və İXM-in 296-cı maddəsi ilə nəzərdə tutulmuş inzibati məsuliyyətə səbəb olur. İş üzrə inzibati xəta törətmiş şəxsin səmimi peşmançılığı onun məsuliyyətini yüngülləşdirən hal kimi nəzərə alınmışdır. İş üzrə inzibati xəta törətmiş şəxsin məsuliyyətini ağırlaşdıran hallar müəyyən olunmamışdır. Beləliklə, məhkəmə törədilmiş inzibati xətanın xarakterini, inzibati xətanı törətmiş şəxsin şəxsiyyətini, məsuliyyəti yüngülləşdirən halları, ağırlaşdıran halların müəyyən edilməməsini nəzərə alıb, iş üzrə sübutları qiymətləndirərək, hesab edir ki, Şəxs Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulmuş inzibati xətanı törətməkdə təqsirli bilinərək barəsində həmin maddənin sanksiyasında nəzərdə tutulmuş inzibati həbs növündə inzibati tənbeh tətbiq edilməlidir. Yuxarıda göstərilənlərə əsasən və Azərbaycan Respublikasının İXM-in 40, 43, 48- 51, 114, 115, 128-130-cu maddələrini rəhbər tutaraq qərara aldım: Şəxs Azərbaycan Respublikası İnzibati Xətalar Məcəlləsinin 510-cu maddəsi ilə inzibati xətanın törədilməsində təqsirli bilinsin və barəsində 13 (on üç) gün müddətinə inzibati həbs növündə tənbeh tədbiri tətbiq edilsin. Həbs olunma müddətinin əvvəli 01 mart 2024-cü il tarixdən, saat 16:30-dan hesablansın. Qərar dərhal icra edilsin. Qərarın icrası Naxçıvan MR Daxili İşlər Nazirliyinin X4 həvalə olunsun. Qərarın surəti rəsmi qaydada verildiyi vaxtdan 10 gün müddətində Kəngərli Rayon Məhkəməsi vasitəsi ilə və ya birbaşa Naxçıvan Muxtar Respublikası Ali Məhkəməsinə şikayət vermək olar. Sədrlik edən: Zülfüqar Əhmədov