Gəncə Şəhər Məhkəməsi Qərardad — İş №3(125)-1037/2023

Azərbaycan Respublikası adından QƏRARDAD Gəncə şəhəri İş № 3(125)-1037/2023 23.06.2023 GƏNCƏ ŞƏHƏR MƏHKƏMƏSİ hakim Hüseynov Kənan Zakir oğlunun sədrliyi, Musayev Musa Tofiq oğlunun katibliyi, şikayətçi X1 iştirakı ilə, barəsində tərtib olunmuş İXP ******* nömrəli, xx.xx.2023-cü il tarixli inzibati xəta haqqında protokoldan X2 tərəfindən verilmiş şikayətə məhkəmənin inzibati binasında açıq məhkəmə iclasında baxaraq, məhkəmə müəyyən etdi: X2 onun barəsində Azərbaycan Respublikası İnzibati Xətalar Məcəlləsinin nəzərdə tutulmuş inzibati xətanın törədilməsi haqqında tərtib edilmiş İXP ******* nömrəli, xx.xx.2023-cü il tarixli protokolun ləğv edilməsi barədə şikayət ərizəsi ilə Gəncə Şəhər Məhkəməsinə müraciət etmişdir. X2 ərizəsini onunla əsaslandırmışdır ki, xx.xx.2023-cü il tarixdə saat 11:49 radələrində idarə etdiyi VAZ 2108-01 minik markalı ** DP *** dövlət qeydiyyat nömrə nişanlı avtomobil ilə Göygöl rayonu “Azpetrol” YDM yanından Hacıkənd qəsəbəsi istiqamətində hərəkət edərkən Göygöl rayon Yol Patrul xidməti inspektoru polis serjantı X4 tərəfindən əsassız olaraq saxlanılmışdır. Polis əməkdaşı ona avtomobili sərxoş vəziyyətdə idarə etdiyi bildirmiş və o, polis əməkdaşına spirit içki qəbul etmədiyini desə də, onu Göygöl rayonunda DYP-yə aparıb sərxoşluğunu aparatla yoxlayıb sərxoş olduğunu demişlər. O, həmin yoxlamanın nəticəsindən narazı qalıb, başqa yerdə sərxoşluq müayinəsindən keçmək üçün göndəriş istəmiş, lakin ona göndəriş verilməmişdir. Belə olan halda o, özü Gəncə şəhərində narkoloji dispanserdə yoxlamadan keçmiş, onun barəsində “Sərxoşluq hallarının bütün növlərinin təyini məqsədi ilə aparılan tibbi müayinə haqqında 23 may 2023-cü il tarixli 1185/2023 saylı protokol tərtib edilərək, onun alkoqol sərxoşluğu olmadığı müəyyənləşmişdir. Daha sonra ona təqdim edilmiş protokolla tanış olanda görmüşdür ki, protokolda qeyd edilmişdir ki, guya o, təhlükəsiz kəmərindən istifadə etməmiş və işıq cihazlarından və səs siqnallarından istifadə qaydalarını pozmuşdur. Əfqan Abbasov öz yalanlarını heç nə ilə sübuta yetirə bilməz. O, avtomobildə tək olmamış, yanında şahidlər olmuşdur. Əfqan Abbasov onu saxlayan zaman ona təhlükəsiz kəmərindən istifadə etməməsi və işıq cihazlarından və səs siqnallarından istifadə qaydalarını pozması barədə heç bir irad bildirməmişdir. Əfqan Abbasov onun avtomobilini qeyri-qanuni saxlamasına haqq qazandırmaq üçün protokola İXM-in bir neçə maddəsini də əlavə olaraq qeyd etmişdir. Bununla da qeyri-qanuni olaraq o, 360 manat cərimə ödəməlidir. O, avtomobilini buraxmaları üçün məcbur protokola imza etmişdir. Onun maddi cəhətdən vəziyyəti çox ağırdır. Qanunsuz yerə onun barəsində tərtib olunmuş İXP ******* nömrəli, xx.xx.2023-cü il tarixli inzibati xəta protokolla razı deyil, odur ki, həmin protokolun ləğv edilməsini xahiş etmişdir. Məhkəmə iclasında şikayətçi dəfərlə onun barəsində tərtib olunmuş inzibati xəta haqqında qərarın ona verilməsi üçün müraciət etdiyi, lakin ona həmin qərarın məhkəməyə göndərildiyi bildirsələr də, həmin qərar məhkəməyə göndərilməmiş və ona rəsmi qaydada təqdim edilməmişdir. O, inzibati protokoldan şikayətin geri qaytarılmasına etiraz etməmiş, qərar ona təqdim edildikdən sonra qərardan şikayət verəcəyini bildirmişdir. Məhkəmə protokolu və əlavə edilmiş sənədləri araşdıraraq hesab edir ki, şikayət geri qaytarılmalıdır. Belə ki, Azərbaycan Respublikası İnzibati Xətalar Məcəlləsinin 100.1-ci maddəsinə əsasən bu Məcəllənin 54-cü maddəsində nəzərdə tutulmuş hallar istisna olmaqla, inzibati xətanın törədilməsi haqqında protokol tərtib edilir. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Göründüyü kimi inzibati xəta haqqında protokol inzibati tənbeh verilməsini nəzərdə tutmur, yalnız ehtimal olunan inzibati xəta faktının sənədləşdirilməsindən ibarət olmaqla gələcəkdə inzibati xəta haqqında işə baxılarkən sübut növü kimi istifadə olunur. İnzibati Xətalar Məcəlləsində qeyd edilir ki, inzibati xətalar haqqında işlərə baxmaq hüququ səlahiyyətli orqana (vəzifəli şəxsə) aid edilmiş yol hərəkəti qaydaları əleyhinə olan inzibati xətalar səlahiyyətli vəzifəli şəxs tərəfindən bilavasitə aşkar edildikdə və barəsində inzibati xəta haqqında iş üzrə icraat aparılan şəxs inzibati xəta hadisəsinin mövcudluğu ilə razılaşdıqda, inzibati tənbeh tətbiq etmə haqqında qərar çıxarılır. Barəsində inzibati xəta haqqında iş üzrə icraat aparılan şəxs inzibati xəta hadisəsinin mövcudluğu ilə razılaşmadıqda, səlahiyyətli vəzifəli şəxs inzibati xəta haqqında protokol tərtib edir. İnzibati tənbeh tətbiq etmə haqqında qərar və ya inzibati xəta haqqında protokol operativ nəqliyyat vasitəsində quraşdırılmış bort-kompüter vasitəsilə tərtib olunaraq dərhal, yaxud belə kompüter olmadıqda həmin günün sonunadək müvafiq icra hakimiyyəti orqanının mərkəzi informasiya sistemində yerləşdirilir və barəsində inzibati xəta haqqında iş üzrə icraat aparılan şəxsə bu Məcəllənin 125.2.1-ci maddəsində nəzərdə tutulmuş qaydada bu barədə məlumat verilir. İnzibati tənbeh tətbiq etmə haqqında qərarın və ya inzibati xəta haqqında protokolun kağız daşıyıcıda surəti səlahiyyətli orqan (vəzifəli şəxs) tərəfindən yerindəcə barəsində inzibati xəta haqqında iş üzrə icraat aparılan şəxsə, həmçinin belə müraciəti olduqda inzibati xəta haqqında iş üzrə zərər çəkmiş şəxsə verilir. Bu Məcəllənin 124.3-cü maddəsində nəzərdə tutulmuş hallarda inzibati xəta haqqında protokol baxılması üçün yuxarı səlahiyyətli orqana (vəzifəli şəxsə) göndərilir. Yuxarı səlahiyyətli orqan (vəzifəli şəxs) tərəfindən həmin iş üzrə qəbul edilən qərar qəbul edildiyi gün müvafiq icra hakimiyyəti orqanının mərkəzi informasiya sistemində yerləşdirilir və barəsində inzibati xəta haqqında iş üzrə icraat aparılan şəxsə həmin qərar barədə bu Məcəllənin 125.2-ci maddəsində nəzərdə tutulmuş qaydada məlumat verilir (İXM-nin 124.2-124.4-cü maddələri). X2 barəsində inzibati xəta haqqında protokol tərtib edilmişdir. Bu protokol əsasında qəbul ediləcək qərarla razılaşmadığı halda ərizəçinin həmin qərardan yuxarı səlahiyyətli orqana (vəzifəli şəxsə) və ya məhkəməyə müraciət etmək hüququ yaranacaqdır. İnzibati Xətalar Məcəlləsinin 126.1-ci maddəsinə əsasən barəsində inzibati xəta haqqında iş üzrə qərar qəbul edilmiş şəxs inzibati xəta törətməsi barədə bu Məcəllənin 125.2.2-ci maddəsində və ya 125.2.3-cü maddəsində (elektron kabinetdə mobil telefon nömrəsi olmadığı halda) müəyyən olunmuş qaydada məlumatlandırıldığı vaxtdan 20 gün müddətində yuxarı səlahiyyətli orqana (vəzifəli şəxsə) və ya məhkəməyə şikayət edə bilər. Şikayət şəxsən verilə və ya poçt, yaxud internet vasitəsilə göndərilə bilər. Ərizəçi qanunda nəzərdə tutulduğu kimi inzibati tənbeh vermə haqqında qərarın yox, heç bir inzibati tənbeh tətbiq etməyən protokolun ləğv edilməsi barədə ərizə vermişdir. İnzibati Xətalar Məcəlləsində protokoldan şikayətin verilməsi və ya protokolun ləğv edilməsi nəzərdə tutulmadığından bu şikayətə baxıla bilməz. Yuxarıda göstərilənlərə əsasən, Azərbaycan Respublikası İnzibati Xətalar Məcəlləsinin 40, 43, 128-130-cu maddələrini rəhbər tutaraq, qərara aldı: Göygöl rayonu Yol patrul xidməti inspektoru polis serjantı X3 tərtib etdiyi İXP ******* nömrəli, xx.xx.2023-cü il tarixli inzibati xəta haqqında protokolun ləğv edilməsi barədə X2 tərəfindən verilmiş şikayət geri qaytarılsın. Qərardaddan şikayət verilə bilməz. Sədrlik edən: Kənan Hüseynov