Bakı Şəhəri Səbail Rayon Məhkəməsi Qərar — İş №3(5-102)-136/2026

Azərbaycan Respublikası adından QƏRAR Bakı şəhəri İş № 3(5-102)-136/2026 11.02.2026 BAKI ŞƏHƏRİ SƏBAİL RAYON MƏHKƏMƏSİ Hakim Şükürova Ülviyyə Sahib qızının sədrliyi, Mehdiyev Fərid Bəxtiyar oğlunun katibliyi ilə, Barəsində inzibati tənbehvermə haqqında qərar çıxarılmış şəxs X1 iştirakları ilə, Baş Dövlət Yol Polisi İdarəsinin xx.xx.2025-ci il tarixli EQ 31840471 nömrəli inzibati tənbehvermə haqqında qərarından X3 tərəfindən verilmiş şikayətə açıq məhkəmə iclasında baxaraq, MÜƏYYƏN ETDİ: X2 şikayətlə məhkəməyə müraciət edərək Baş Dövlət Yol Polisi İdarəsinin xx.xx.2025-ci il tarixli EQ 31840471 nömrəli inzibati tənbehvermə haqqında qərarının ləğv edilməsini məhkəmədən xahiş etmişdir. Şikayət onunla əsaslandırılmışdır ki, X3, Baş Dövlət Yol Polisi İdarəsi tərəfindən xx.xx.2025-ci il tarixdə barəsində çıxarılmış EQ 31840471 nömrəli elektron qərardan narazıdır və Azərbaycan Respublikasının İnzibati Xətalar Məcəlləsinin 430 və 431-ci maddələrinə əsasənməsi bu şikayətlə məhkəməyə müraciət edir. Şikayət müddətinin buraxılması iradəsindən asılı olmayan üzrlü səbəblərlə bağlı olmuşdur. Belə ki, məsələ rəsmi qeyri-iş və bayram günlərinə təsadüf etmiş, eyni zamanda DYP-də icraçı ilə görüşlərin uzadılması səbəbindən məsələni inzibati qaydada həll etmək mümkün olacağı ümidi ilə gözlənilmişdir. Bundan əlavə, ilk olaraq məhkəməyə müraciət etmişdir, lakin ərizə sırf prosessual əsaslarla (iddia yox, şikayət formasında verilməli olduğu üçün) qəbul edilməmişdir. Bu hal təqsirindən irəli gəlmədiyindən, müddətin buraxılması üzrlü hesab edilməlidir. xx.xx.2025-ci il tarixdə “BYD” markalı, **-QF-*** dövlət qeydiyyat nişanlı avtomobillə guya Bakı şəhəri, Şərifzadə küçəsində nəqliyyat vasitəsini yolun hərəkət hissəsində saxlayaraq dayanma-durma qaydasını pozduğu iddia edilmiş və İXM-nin 346.4-cü maddəsi ilə cərimə tətbiq olunmuşdur. Lakin bu qərar yalnız bir ədəd keyfiyyətsiz fotoşəklə əsaslandırılmışdır. Fotoşəkildə nəqliyyat vasitəsinin dayanmış vəziyyətdə olması açıq şəkildə görünmür. Video-material təqdim edilməmişdir. Statik şəkil avtomobilin hərəkətdə olmasını istisna etmir. Həmin ərazidə yolun birinci zolağı rəsmi olaraq az.parking üçün ayrılmışdır və nəqliyyat vasitəsini yolun ikinci sırasında saxlamamış, az.parking sahəsində park etmişdir. DYP-nin cavab məktublarında hadisə yeri səhv göstərilmişdir. Bu hallar inzibati xətanın şübhəsiz sübut edilmədiyini göstərir və araşdırmanın diqqətlə və obyektiv aparılmadığını göstərir. Aradan qaldırılmayan şübhələr isə qanuna görə şəxsin xeyrinə şərh olunmalıdır. Baş Dövlət Yol Polisi İdarəsinin xx.xx.2025-ci il tarixli EQ 31840471 nömrəli inzibati tənbehvermə haqqında qərarın ləğv edilməsini məhkəmədən xahiş edilmişdir. Məhkəmə iclasında iştirak edən barəsində inzibati tənbehvermə haqqında qərar çıxarılmış şəxs X3 şikayətini müdafiə edərək göstərmişdir ki, şəkil kamera yox, insan tərəfindən çəkilmişdir və maşın dayanmamışdır. Maşın hərəkətdə olan zaman çəkilmişdir. Maşını saxlamaq üçün yer tapmamış, bir dəfə geri dönərək yenidən eyni yerə qayıtmışdır. Şəkillərdə də maşının dönmə işığının yandığı görünür. Orda yavaşlama səbəbi isə digər maşının çıxması olmuşdur. Həmin maşının yerinə maşını park etmək niyyəti olmuşdur. Baş Dövlət Yol Polisi İdarəsinin xx.xx.2025-ci il tarixli EQ 31840471 nömrəli inzibati tənbehvermə haqqında qərarın ləğv edilməsini və inzibati xəta haqqında material üzrə icraata xitam verilməsini xahiş etdi. Məhkəmə iclasının yeri və vaxtı barədə barəsində inzibati tənbehvermə haqqında qərar qəbul etmiş orqanın nümayəndəsinə qanunvericilikdə nəzərdə tutulmuş qaydada məlumat verilməsinə baxmayaraq məhkəmə iclasına gəlməmişdir. Məhkəmə işə onun iştirakı olmadan baxılmasını mümkün hesab etmişdir. Məhkəmə tərəfi dinləyib, şikayət ərizəsini və iş materiallarını araşdıraraq hesab edir ki, şikayət təmin olunmalı, qərar ləğv edilərək inzibati xəta haqqında iş üzrə icraata xitam verilməlidir. Belə ki, iş materiallarında olan Baş Dövlət Yol Polisi İdarəsinin xx.xx.2025-ci il tarixli EQ 31840471 nömrəli inzibati tənbehvermə haqqında qərarından görünür ki, X3 xx.xx.2025-ci il tarixdə, saat 22:04-də Bakı şəhəri, Yasamal rayonu, Şərifzadə küçəsi ərazisində “BYD X6-in hibrid minik” markalı, **-OF-*** dövlət qeydiyyat nişanlı nəqliyyat vasitəsini yanqoşqusu olmayan motosikletlər, mopedlər, velosipedlər və kiçik elektrik nəqliyyat vasitələri istisna olmaqla, digər nəqliyyat vasitələrinin yolun hərəkət hissəsinin kənarında ikinci və sonrakı cərgələrdə dayanmasına və ya durmasına görə Azərbaycan Respublikası İnzibati Xətalar Məcəlləsinin 346.4-cü maddələrində nəzərdə tutulmuş inzibati xətaları törədərək 80 (səksən) manat məbləğində cərimə edilmişdir. İş materiallarına əlavə edilmiş fotoşəkillərdən görünür ki, “BYD X6-in hibrid minik” markalı, **- OF-*** dövlət qeydiyyat nişanlı nəqliyyat vasitəsi tərəfindən dayanmasına və ya durma qaydaları pozulmamışdır. Azərbaycan Respublikası İnzibati Xətalar Məcəlləsinin 346.4-cü maddəsinə əsasən yanqoşqusu olmayan motosikletlər, mopedlər, velosipedlər və kiçik elektrik nəqliyyat vasitələri istisna olmaqla, digər nəqliyyat vasitələrinin yolun hərəkət hissəsinin kənarında ikinci və sonrakı cərgələrdə dayanmasına və ya durmasına görə –səksən manat məbləğində cərimə edilir. Hazırki işin faktiki hallarından müəyyən edilir ki, X1 təqsiri məhkəmə araşdırması zamanı öz təsdiqini tapmır. Belə ki, fotoşəkillərdən və izahatdan görünür ki, X1 idarə etdiyi nəqliyyat vasitəsi yolun hərəkət hissəsinin kənarında ikinci və ya sonrakı cərgələrdə dayanmamış və durmamışdır. Bu səbəbdən X1 Azərbaycan Respublikasının İnzibati Xətalar Məcəlləsinin 346.4cü maddəsində nəzərdə tutulmuş inzibati xətanı törətməsi sübuta yetirilməmişdir. Azərbaycan Respublikasının İnzibati Xətalar Məcəlləsinin 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. Həmin Məcəllənin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Həmin Məcəllənin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. İnzibati Xətalar Məcəlləsinin 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Azərbaycan Repsublikası İnzibati Xətalar Məcəlləsinin 133.2.8-ci maddəsinə görə inzibati xəta haqqında iş üzrə qərardan verilən şikayətə və ya protestə baxılarkən qəbul edilmiş qərarın qanuniliyi və əsaslılığı iş üzrə olan və əlavə təqdim edilmiş materiallar əsasında yoxlanılır. Azərbaycan Respublikasının İnzibati Xətalar Məcəlləsinin 53.1.1-ci maddəsinə əsasən inzibati xəta hadisəsi olmadıqda, həmçinin İnzibati Xətalar Məcəlləsinin 53.1.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 134.1.3-cü maddəsinə əsasən inzibati xəta haqqında iş üzrə qərardan verilən şikayətə və ya protestə baxılaraq həmin Məcəllənin 53-cü maddəsində nəzərdə tutulduğu hallarda qərarı ləğv edərək inzibati xəta haqqında iş üzrə icraata xitam verilməsi haqqında qərar qəbul edilir. Göstərilənlərə əsasən məhkəmə hesab edir ki, barəsində qərar çıxarılmış X1 barəsində qəbul edilmiş inzibati xəta üzrə təqsiri məhkəmə araşdırması zamanı öz təsdiqini tapmadığından X1 verdiyi şikayət təmin edilməli və Baş Dövlət Yol Polisi İdarəsinin xx.xx.2025ci il tarixli EQ 31840471 nömrəli inzibati tənbeh vermə haqqında qərarı ləğv edilməlidir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 128-134-cü, 136-cı maddələrini rəhbər tutaraq, məhkəmə QƏRARA ALDİ: Şikayət təmin edilsin. X3 barəsində Baş Dövlət Yol Polisi İdarəsinin xx.xx.2025-ci il tarixli EQ 31840471 nömrəli inzibati tənbeh vermə haqqında qərarı ləğv edilsin və inzibati xəta haqqında iş üzrə icraata xitam verilsin. Qərarın surəti təqdim edildiyi və ya alındığı gündən 10 (on) gün müddətində Bakı şəhəri Səbail Rayon Məhkəməsi vasitəsilə və ya bilavasitə Bakı Apellyasiya Məhkəməsinə şikayət verilə bilər. Hakim Ülviyyə Şükürova