Biləsuvar Rayon Məhkəməsi Qərar — İş №3(5-115)-317/2026

Azərbaycan Respublikası adından QƏRAR Biləsuvar rayonu İş № 3(5-115)-317/2026 12.03.2026 BİLƏSUVAR RAYON MƏHKƏMƏSİ Sədrlik edən Əliyeva Aytəkin Güləli qızı, X3 məhkəmə-iclas katibliyi ilə, xx xxxx 1969-cı ildə Biləsuvar rayonunda doğulmuş, əvvəllər məhkum olunmamış, il ərzində inzibati xəta törətməyə görə inzibati tənbeh tətbiq olmayan, Azərbaycan Respublikasının vətəndaşı, evli, Biləsuvar rayonu, Xırmandalı kəndində qeydiyyatda olmaqla yaşayan, Şəxs Azərbaycan Respublikasının İnzibati Xətalar Məcəlləsinin 590.2-ci maddəsi ilə nəzərdə tutulmuş inzibati xətanı törətməsinə dair inzibati xəta haqqında materiala məhkəmənin inzibati binasında, açıq məhkəmə iclasında baxaraq, məhkəmə, MÜƏYYƏN ETDİ: Şəxs 13 fevral 2026-cı il tarixdə, Şirvan Milli Parkı X1 müvafiq icra hakimiyyəti orqanından icazə almadan mülki ov silahını əldə etmiş, saxlamış və daşımışdır. Bununla da, Şəxs Azərbaycan Respublikasının İnzibati Xətalar Məcəlləsinin 590.2-ci maddəsində nəzərdə tutulan inzibati xətanı törətmiş və onun barəsində Biləsuvar Rayon Polis şöbəsinin İTB-nin polis sahə rəisi X2 tərəfindən 26 fevral 2026-cı il tarixli, MN seriyalı ******* saylı protokol tərtib olunmuşdur. İnzibati xəta haqqında protokol və ona əlavə edilmiş sənədlər baxılması üçün aidiyyəti üzrə Biləsuvar Rayon Məhkəməsinə göndərilmiş və inzibati iş məhkəmə baxışına təyin edilmişdir. Barəsində inzibati xəta haqqında protokol tərtib edilmiş şəxs Şəxs və protokol tərtib etmiş səlahiyyətli orqana (vəzifəli şəxsə) məhkəmə iclasının vaxtı və yeri barədə məlumat verilməsinə baxmayaraq, məhkəmə iclasına gəlməmişlər, nümayəndələrini göndərməmiş və gəlməmələrinin üzrlü səbəbləri barədə məhkəməyə heç bir məlumat verməmişlər. Göstərilənləri nəzərə alaraq məhkəmə, barəsində inzibati xəta haqqında protokol tərtib edilmiş şəxs Şəxs və inzibati xəta haqqında protokol tərtib etmiş səlahiyyətli orqanın nümayəndəsinin iştirakı olmadan baxılmasını mümkün hesab etmişdir. İş materiallarına əlavə edilmiş sənədlər: 27 noyabr 2025-ci il tarixli aktdan görünür ki, müvafiq icra hakimiyyəti orqanından icazə almadan ov silahı gəzdirdiyi üçün Şəxs məxsus Biləsuvar Rayon Polis Şöbəsində qeydiyyatda olmayan “İJ-43” markalı 12 çaplı, nömrələri oxunmayan balaqundağında ******* yazılan, qoşalüləli, yivsiz ov tüfəngi Biləsuvar Rayon Polis əməkdaşları tərəfindən saz və işlək vəziyyətdə təhvil alınmışdır. “İnzibati xəta haqqında işin aidiyyəti üzrə göndərilməsi barədə” 26 fevral 2026-cı il tarixli, MN seriyalı ******* nömrəli qərardaddan görünür ki, Şəxs barəsində toplanmış materiala baxılması Biləsuvar Rayon Məhkəməsinin səlahiyyətinə aid edildiyindən aidiyyəti üzrə həmin məhkəməyə göndərilmişdir. “İnzibati xəta haqqında” 26 fevral 2026-cı il tarixli, MN seriyalı ******* saylı protokoldan görünür ki, Şəxs sənədsiz ov silahını müvafiq icra hakimiyyəti orqanından icazə almadan əldə etmiş, saxlamış gəzdirmiş və daşımışdır. Tətbiq edilən hüquq: Azərbaycan Respublikasının İnzibati Xətalar Məcəlləsinin: 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli törətmiş şəxs inzibati məsuliyyətə cəlb olunur; 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır; 21-ci maddəsinə əsasən inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır; 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır; 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir; 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir; 114.1.1-ci maddəsinə əsasən inzibati xəta haqqında işə baxılarkən inzibati tənbeh vermə haqqında qərar çıxarılır; 590.2-ci maddəsinə əsasən müvafiq icra hakimiyyəti orqanından müvafiq icra hakimiyyəti orqanından xüsusi icazə almamış şəxslər tərəfindən mülki silahın və ya onun üçün döyüş sursatının əldə edilməsi, saxlanılması, daşınması, başqa şəxslərə verilməsi və ya satılmasına görə silah və döyüş sursatı müsadirə edilməklə səksən manatdan yüz manatadək məbləğdə cərimə edilir. İşə baxan məhkəmənin mövqeyi: İşin bütün hallarının məcmusuna hərtərəfli, tam və obyektiv surətdə baxaraq və iş üzrə olan sübutları qiymətləndirərək, məhkəmə belə nəticəyə gəlir ki, Şəxs Azərbaycan Respublikasının İnzibati Xətalar Məcəlləsinin 590.2-ci maddəsində nəzərdə tutulmuş inzibati xətanı törətmişdir və o, həmin maddənin sanksiyası həddində inzibati məsuliyyətə cəlb edilməlidir. Barəsində inzibati xətaya dair iş üzrə icraat aparılan şəxs Şəxs inzibati xəta üzrə toplanmış materiallara əlavə edilmiş izahatından görünür ki, o, sözügedən silahı təxminən üç-dörd il bundan əvvəl Salyan rayonunda tanıdığı şəxsdən 200 manata almışdır. Həmin şəxs tüfəngin sənədlərinin olduğunu bildirsə də, sonradan məlum olmuşdur ki, silaha aid hər hansı sənəd mövcud deyildir. 13 fevral 2026-cı il tarixdə saat 19:00 radələrində ov edərkən müfəttişlər ona yaxınlaşmış və silahın sənədlərini tələb etmişlər. Silaha dair sənədlər təqdim edilmədiyindən silah müsadirə olunmuşdur. Şəxs sonda izahatında, gələcəkdə belə hallara bir daha yol verməyəcəyini qeyd etmişdir. İnzibati tənbeh tətbiq edərkən məhkəmə xətanın xarakterini, inzibati xəta törədən şəxsin şəxsiyyətini, təqsirinin dərəcəsini nəzərə alır. Məhkəmə inzibati xəta törətmiş şəxsin əməlindən səmimi peşmançılığını Azərbaycan Respublikasının İnzibati Xətalar Məcəlləsinin 32-ci maddəsinə əsasən, Şəxs məsuliyyətini yüngülləşdirən hal kimi qiymətləndirilir. Azərbaycan Respublikasının İnzibati Xətalar Məcəlləsinin 33-cü maddəsinə əsasən, məhkəmə tərəfindən Şəxs məsuliyyətini ağırlaşdıran hallar müəyyən edilmədi. Məhkəmə, göstərilənlərə əsasən hesab edir ki, Şəxs Azərbaycan Respublikasının İnzibati Xətalar Məcəlləsinin 590.2-ci maddəsinin sanksiyası həddində inzibati cərimə növündə inzibati tənbeh tətbiq edilməlidir. Məhkəmə həmçinin hesab edir ki, 14 fevral 2026-cı il tarixli akta əsasən hüquqpozma predmeti kimi götürülmüş Biləsuvar Rayon Polis Şöbəsində saxlanılan “İJ-43” markalı, 12 çaplı, bala qundağında ******* nömrəsi olan yivsiz ov tüfəngi Şəxs tərəfindən müvafiq icra hakimiyyəti orqanının icazəsi olmadan əldə edildiyinə, saxlanıldığına və daşındığına görə müsadirə edilməlidir. Yuxarıda göstərilənlərə əsaslanaraq və Azərbaycan Respublikasının İnzibati Xətalar Məcəlləsinin 43, 114, 115 və 130-cu maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikasının İnzibati Xətalar Məcəlləsinin 590.2-ci maddəsində nəzərdə tutulmuş inzibati xətanın törədilməsində təqsirli bilinib, 80 (səksən) manat məbləğində cərimə edilsin. 14 fevral 2026-cı il tarixli akta əsasən hüquqpozma predmeti kimi götürülmüş və Biləsuvar Rayon Polis Şöbəsində saxlanılan “İj-43” markalı, 12 çaplı, bala qundağında ******* nömrəsi olan yivsiz ov tüfəngi müsadirə edilsin. Qərarın icrası Biləsuvar Rayon İcra və Probasiya Şöbəsinə həvalə edilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Biləsuvar Rayon Məhkəməsi vasitəsilə və ya birbaşa Şirvan Apellyasiya Məhkəməsinə apellyasiya şikayəti və ya protesti verilə bilər. HAKİM: Aytəkin Əliyeva