Gəncə Şəhər Məhkəməsi Qərar — İş №3(5-121)-905/2026

Azərbaycan Respublikası adından QƏRAR Gəncə şəhəri İş № 3(5-121)-905/2026 10.03.2026 GƏNCƏ ŞƏHƏR MƏHKƏMƏSİ Hakim Xanməmmədova Liza Əliəşrəf qızının sədrliyi, Rüstəmov Turan Aydın oğlunun katibliyi, inzibati xəta haqqında protokolu tərtib etmiş X1, barəsində inzibati icraat aparılan şəxs Şəxs iştirakları ilə, Şəxs Azərbaycan Respublikası İnzibati Xətalar Məcəlləsinin 510 və 535.1-ci maddələri ilə nəzərdə tutulmuş inzibati xətaları törətməsi barədə Gəncə şəhər BPİ-nin 2-ci PŞ-dən daxil olmuş inzibati xəta haqqında iş materiallarına baxaraq, məhkəmə MÜƏYYƏN ETDİ: Gəncə şəhər 2-ci polis şöbəsinin İTB-nin polisi sahə rəisi, polis leytenantı X2 tərəfindən Şəxs barəsində Azərbaycan Respublikası İXM-in 510 və 535.1-ci maddələri ilə nəzərdə tutulmuş inzibati xətaların törədilməsi barədə xx.xx.2026-cı il tarixli, MN ******* nömrəli inzibati xəta haqqında protokol tərtib edilərək baxılması üçün məhkəməyə göndərilmişdir. Həmin protokola əsasən Şəxs xx.xx.2026-cı il tarixdə yol patrul xidməti əməkdaşının qanuni tələbinə tabe olmayaraq xırda xuliqanlıq etmiş və nəticədə İXM-in 510 və 535.1-ci maddələrində nəzərdə tutulmuş inzibati xətanı törətmişdir. Məhkəmə iclasında sahə rəisi X2 çıxışında hadisəni görmədiyini, protokolu isə raport əsasında tərtib etdiyini qeyd edərək icraatına daxil olmuş raporta əsasən bildirmişdir ki, vətəndaş xx.xx.2026-cı il tarixdə saat 10:40 radələrində Gəncə şəhəri, Nizami prospektində avtomobilini yüksək sürətlə idarə etmiş və bu zaman yol patrul xidməti əməkdaşını gördükdə əyləci basmış, lakin avtomobilin arxası oynadığından vətəndaşı saxlamışdır. Əməkdaş vətəndaş Həsənova baş vermiş qanun pozuntusunu izah etmək istəyən zaman o, narazılığını bildirərək səs-küy salmağa başlamışdır. İfadəsinin sonunda protokolun təmin olunmasını xahiş etdi. Məhkəmə iclasında Şəxs izahatında törətdiyi əməli etiraf edərək xx.xx.2026-cı ildə tarixdə Dəliməmmədli şəhərindən Gəncə şəhərinə avtomobil ilə gəldiyini, tələsdiyini, 60 km/saat həddində müəyyən edilmiş yolu 80-90 km/saat sürət ilə idarə etdiyini, radarı gördükdə əyləci basdığını və avtomobilin arxasının oynadığını bildirmişdir. Bundan sonra Yol Patrul Xidmətinin əməkdaşı saxla əmri verdikdə avtomobili saxlamış və polis əməkdaşı avtomobilin nasaz olmasına görə avtomobilin duracağa getməli olduğunu bildirmişdir. O, tələsdiyini, qardaşının 2-3 gün bundan öncə Mingəçevir şəhərində yıxıldığını, onurğasının qırıldığını, onun əməliyyat olunduğunu və hazırda qardaşını gətirməli olduğunu və cəriməsi nədirsə yazılmasını bildirmişdir. Lakin polis əməkdaşı onunla razılaşmamış və avtomobilin duracağa getməli olmasını demişdir. O, avtomobilin duracağa aparılmasına razı olmadığı üçün polis əməkdaşı ilə mübahisə etmişdir. Sonda törətdiyi əməldən peşman olduğunu və barəsində yüngül inzibati tənbeh tətbiq edilməsini xahiş etdi. Məhkəmə iclasında şahid qismində çıxış edən X4 çıxışında bildirmişdir ki, xx.xx.2026-cı il tarixdə saat 10:40 radələrində vətəndaş Şəxs avtomobili yüksək sürətlə idarə edərkən əyləci basmış və yolun ortasında avtomobilin arxası oynamışdır. O, avtomobilin konstruktiv quruluşunda dəyişiklik olduğu Şəxs idarə etdiyi avtomobili saxlamış, baş vermiş qanun pozuntusunu ona izah edərək avtomobilin duracağa getməli olduğunu bildirmişdir. Bu zaman Şəxs razı olmamış, oğlu uca səslə danışaraq tələsdiyini bildirmiş avtomobilə əyləşib avtomobili sürüb getmək istəmişdir. Daha sonra o, avtomobili saxlamış və bu zaman Şəxs nizam-intizama dəvət etsə də, sonuncu tabe olmamışdır. Daha sonra Post Patrul Xidməti çağırmış və Şəxs 2-ci Polis Şöbəsinin növbətçi hissəsinə təhvil verilmişdir. İş materiallarına əlavə edilmiş inzibati qaydada tutma protokolundan məlum olur ki, Şəxs xx.xx.2026-cı il tarixdə saat 11:00-da inzibati qaydada tutulmuşdur. Məhkəmə iştirak edən şəxsləri dinləyib, iş materiallarındakı sübutları tədqiq edərək hesab edir ki, toplanmış sübutlarla Şəxs inzibati xətaları törətməsində təqsiri tam sübuta yetir və onun törətdiyi əməllər Azərbaycan Respublikası İXM-in 510 və 535.1-ci maddələri ilə düzgün tövsif olunmuşdur. Belə ki, İXM-in 510-cu maddəsinə xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. Həmin Məcəllənin 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Şəxs ictimai qaydanı pozması və polisin qanuni tələblərinə qəsdən tabe olmaması, beləliklə İXM-in 510 və 535.1-ci maddələri ilə nəzərdə tutulmuş inzibati xətaları törətməsi barəsində tərtib edilmiş protokol və sənədlərlə tam şəkildə sübuta yetirilir. Şəxs eyni vaxtda öz hərəkətləri ilə İXM-in iki müxtəlif maddəsi ilə nəzərdə tutulmuş inzibati xətaları törətdiyindən məhkəmə İXM-in 34.2-ci və 34.3-cü maddələrini hazırkı işin baxılmasında tətbiq edir. İXM-in 34.2 və 34.3-cü maddələrinə əsasən şəxsin eyni və ya müxtəlif vaxtlarda törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin işlərə eyni vaxtda baxılmalıdır. Şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Həmin Məcəllənin 21-ci maddəsinə əsasən, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 9.1-ci maddəsinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətanın xarakterinə, onun törədilməsi hallarına uyğun, qanuni və əsaslı olmalıdır. Həmin Məcəllənin 31.2-ci maddəsinə görə fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Şəxs ilk dəfə inzibati məsuliyyətə cəlb edilməsini və əməlindən peşman olmasını onun məsuliyyətini yüngülləşdirən hallar hesab edir, ağırlaşdıran hallar isə müəyyən edilməmişdir. Beləliklə məhkəmə törədilmiş inzibati xətanın xarakterini, inzibati xətanı törətmiş şəxsin şəxsiyyətini, məsuliyyətini yüngülləşdirən halları və ağırlaşdıran halların olmamasını nəzərə alıb, hesab edir ki, ona Azərbaycan Respublikası İXM-in 510 və 535.1ci maddələrinin sanksiyalarında nəzərdə tutulmuş inzibati cərimə növündə inzibati tənbeh tətbiq etməklə, inzibati tənbehin məqsədlərinə nail olmaq olar. Bununla belə Azərbaycan Respublikası İXM-in 31.4-1-ci maddəsinə əsasən inzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. Buna görə də məhkəmə Şəxs inzibati qaydada tutulmasını nəzərə alaraq hesab edir ki, o, daha ciddi xəta nəzərdə tutulan Azərbaycan Respublikası İXM-in 535.1-ci maddəsinin sanksiyasında nəzərdə tutulmuş 150 manat məbləğində cərimə edilməlidir. Yuxarıda göstərilənlərə əsasən və Azərbaycan Respublikası İXM-in 40, 43, 114, 115, 128-130-cu maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikası İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xətaları törətməkdə təqsirli bilinsin və ona, 150 (yüz əlli) manat miqdarında inzibati cərimə növündə inzibati tənbeh tətbiq edilsin. Qərarın surəti verildiyi gündən 10 (on) gün müddətində Gəncə Şəhər Məhkəməsi vasitəsilə və ya bilavasitə Gəncə Apellyasiya Məhkəməsinə şikayət verilə bilər. Sədrlik edən: Liza Xanməmmədova