Lerik Rayon Məhkəməsi Qərar — İş №3(5-143)-8/2026

Azərbaycan Respublikası adından QƏRAR Lerik rayonu İş № 3(5-143)-8/2026 30.01.2026 LERİK RAYON MƏHKƏMƏSİ Lerik Rayon Məhkəməsinin hakimi Zeynalov Yusif Səmədağa oğlunun sədrliyi, Məhkəmə iclas katibi Şıxaliyev Nurlan Pərviz oğlunun katibliyi, İnzibati xəta haqqında protokol tərtib etmiş şəxs - Lerik RPŞ-nin sahə inspektoru, polis leytenantı X4, Barəsində inzibati xəta haqqında icraat aparılan şəxs Şəxs iştirakları ilə, xx.xx.1985-ci il tarixdə Lerik rayonunda anadan olmuş, Azərbaycan Respublikasının vətəndaşı, orta təhsilli, evli, işləməyən, ünvan 1 ünvanında qeydiyyatda olan və yaşayan Şəxs Azərbaycan Respublikasının İnzibati Xətalar Məcəlləsinin 510 və 535.1-ci maddələri ilə nəzərdə tutulan inzibati xətanı törətməsinə dair inzibati xəta haqqında materiala açıq məhkəmə iclasında baxaraq, məhkəmə MÜƏYYƏN ETDİ: Azərbaycan Respublikası Daxili İşlər Nazirliyi Lerik rayon Polis şöbəsi tərəfindən Azərbaycan Respublikası İnzibati Xətalar Məcəlləsinin 510 və 535.1-ci maddələrinə əsasən Şəxs barəsində tərtib olunmuş inzibati material baxılması üçün Lerik Rayon Məhkəməsinə göndərilmişdir. İş materiallarında olan 28 yanvar 2026-cı il tarixdə tərtib edilmiş MN seriyalı, ******* nömrəli inzibati xəta haqqında protokoldan görünür ki, Şəxs xx.xx.2025-ci il tarixdə, saat 17:20 radələrində Lerik şəhərində, Avtovağzal adlanan ərazidə ictimai qaydanı pozmuş və polis əməkdaşlarının qanuni tələblərinə tabe olmamışdır. İş materiallarında olan inzibati qaydada tutma haqqında 28 yanvar 2026-cı il tarixli, 03 nömrəli protokoldan görünür ki, Şəxs xx.xx.2026-cı il tarixdə, saat 20:30-da inzibati qaydada tutulmuşdur. Məhkəmə iclasında iştirak edən inzibati xəta haqqında protokol tərtib etmiş şəxs Lerik RPŞ-nin sahə inspektoru, polis baş leytenantı X7 inzibati xəta haqqında protokolu müdafiə edərək izahatında göstərmişdir ki, xx.xx.2026-cı il tarixdə, saat 17:20 radələrində Lerik RPŞ-nin PPXB-nin polis nəfəri, polis serjantı X3, polis kiçik-serjantı X8 və polis sıravisi X5 ilə birlikdə dislokasiya üzrə Lerik şəhəri, Avtovağzal adlanan ərazidə xidmətdə olduqları zaman bir nəfər şəxsin uca səslə qışqıraraq ictimai qaydanı pozduğunu müşahidə etmişlər. Polis əməkdaşları həmin əraziyə yaxınlaşdıqda adı sonradan onlara məlum olan Lerik şəhər sakini Şəxs Lerik rayon Pirzəkücə kənd sakini X1 üzərinə uca səslə qışqırdığını eşitmişlər. Həmin şəxslərə yaxınlaşaraq özlərini təqdim etmişlər və Şəxs ictimai qaydanı pozmamasını dəfələrlə tələb etmələrinə baxmayaraq o, uca səslə onlara qışqıraraq “gedin işinizlə məşğul olun, sizlik deyil” kimi ifadələr işlədərək polisin qanuni tələbinə qəsdən tabe olmamışdır. Bu səbəbdən Şəxs barəsində Azərbaycan Respublikası İnzibati Xətalar Məcəlləsinin 510 və 535.1-ci maddələri ilə inzibati xəta haqqında protokol tərtib edilmişdir. Göstərilənləri nəzərə alaraq, Şəxs inzibati məsuliyyətə cəlb edilməsini məhkəmədən xahiş etmişdir. Məhkəmə iclasında iştirak edən barəsində inzibati xəta haqqında iş üzrə icraat aparılan şəxs Şəxs törətdiyi inzibati xətanı qismən etiraf edərək izahatında bildirmişdir ki, o idarə etdiyi nəqliyyat vasitəsini xx.xx.2026-cı il tarixdə Lerik şəhəri Avtovağzal adlanan ərazidə təkər sexinin qarşısında saxlamış və dərman almaq üçün aptekə getmişdir. Bu zaman həmin sexdə fəhlə işləyən Əzizağa Kərimov ona yaxınlaşaraq sexə maşınların gəldiyini və sexin qarşısını kəsməməsi üçün nəqliyyat vasitəsini sexin qarşısından çəkməsini bildirmişdir. Lakin o, səsini yüksəldərək həmin şəxslə mübahisə etmiş, avtomaşını sexin qarşısından çəkməmiş, daha sonra marketə ərzaq almaq üçün getmişdir. Bu zaman bir neçə şəxs marketə gələrək onu çağırmış, o həmin şəxslərin polis əməkdaşları olduğunu görmədiyindən həmin şəxslərə kobud cavab vermişdir. Hazırda valideyninin yataq xəstəsi olmasını nəzərə alaraq barəsində yüngül inzibati tənbeh növü tətbiq edilməsini xahiş etmişdir. Məhkəmə iclasında şahid qismində dindirilmiş X2 izahatında bildirmişdir ki, o Lerik şəhəri Avtovağzal adlanan ərazidə təkər sexində fəhlə işləyir. xx.xx.2026-cı il tarixdə Şəxs idarə etdiyi nəqliyyat vasitəsini sexin qarşısında saxlamışdır. O, Rüfətə yaxınlaşaraq sexə maşınların gəldiyini və sexin qarşısını kəsməməsi üçün nəqliyyat vasitəsini sexin qarşısından çəkməsini bildirsə də, Rüfət səsini yüksəldərək onunla mübahisə etmiş, avtomaşını sexin qarşısından çəkməmiş, daha sonra marketə ərzaq almaq üçün getmişdir. Bu zaman yaranmış səs-küyə görə ərazidə xidmət aparan polis əməkdaşları yaxınlaşmış, Rüfət onlara da kobud cavab vermişdir. Məhkəmə iclasında şahid qismində dindirilmiş Lerik RPŞ-nin PPXB-nin polis nəfəri, polis kiçik serjantı X8 izahatında bildirmişdir ki, xx.xx.2026-cı il tarixdə, saat 17:20 radələrində Lerik RPŞ-nin PPXB-nin polis nəfəri, polis serjantı X3 və polis sıravisi X5 ilə birlikdə xidmətdə olduqları zaman Lerik şəhəri Avtovağzal ərazisində səs-küy gəldiyini eşitmişlər. Onlar həmin şəxslərə yaxınlaşaraq özlərini təqdim etmişlər və Şəxs ictimai qaydanı pozmamasını dəfələrlə tələb etmələrinə baxmayaraq o, uca səslə onlara qışqıraraq “gedin işinizlə məşğul olun, sizlik deyil” kimi ifadələr işlədərək onların qanuni tələbinə qəsdən tabe olmamışdır. Məhkəmə proses iştirakçılarının və şahidlərin izahatlarını dinləyib, inzibati xəta haqqında işin materiallarını araşdıraraq hesab edir ki, Şəxs Azərbaycan Respublikasının İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xətanı törətməsi tam sübuta yetirilir. Məhkəmə Şəxs ifadəsinə tənqidi yanaşaraq hesab edir ki, o məsuliyyətini yüngülləşdirmək üçün belə ifadə verir. Onun göstərdikləri işin faktiki hallarına uyğun gəlmir və inandırıcı deyildir. Onun əməli protokolu tərtib etmiş orqanın nümayəndəsinin, şahidlərin izahatları və iş materialları ilə tam sübuta yetirilir. Belə ki, iş materiallarında olan Lerik RPŞ-nin PPXB-nin polis nəfəri, polis serjantı X3 tərəfindən tərtib olunmuş xx.xx.2026-cı il tarixli raportdan görünür ki, xx.xx.2026-cı il tarixdə, saat 17:20 radələrində Lerik RPŞ-nin PPXB-nin polis nəfəri, polis kiçik-serjantı X8 və polis sıravisi X5 ilə birlikdə dislokasiya üzrə 2 saylı marşrutda, Lerik şəhəri Avtovağzal adlanan ərazidə xidmətdə olduqları zaman bir nəfər şəxsin uca səslə qışqıraraq ictimai qaydanı pozduğunu müşahidə etmişlər. Həmin əraziyə yaxınlaşdıqda adı sonradan onlara məlum olan Lerik şəhər sakini Şəxs Lerik rayon Pirzəkücə kənd sakini X1 üzərinə uca səslə qışqırdığını görmüşlər. Həmin şəxslərə yaxınlaşaraq özlərini təqdim etmiş və Şəxs ictimai qaydanı pozmamasını dəfələrlə tələb etmələrinə baxmayaraq o, uca səslə onlara qışqıraraq “gedin işinizlə məşğul olun, sizlik deyil” kimi ifadələr işlədərək polisin qanuni tələbinə qəsdən tabe olmamışdır. İş materiallarında olan videgörüntüyə məhkəmə iclasında tərəflərin iştirakı ilə keçirilmiş baxış zamanı Şəxs ona yaxınlaşan şəxsə tərəf çevrilərək həmin şəxsin polis əməkdaşı olduğunu görür, polis əməkdaşına “gedin işinizlə məşğul olun, sizlik deyil” kimi ifadələr işlədərək polisin qanuni tələblərinə tabe olmadığı müəyyən edilir. Beləliklə, araşdırma zamanı müəyyən edilmişdir ki, Şəxs xx.xx.2026-cı il tarixdə, saat 17:20 radələrində Lerik şəhəri, Avtovağzal adlanan ərazidə yüksək səslə nalayiq ifadələr işlədərək və polisin qanuni tələblərinə tabe olmayaraq Azərbaycan Respublikasının İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xətanı törətmişdir. Məhkəmə qeyd edir ki, Azərbaycan Respublikasının İnzibati Xətalar Məcəlləsinin 510-cu maddəsinə əsasən, xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə - əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. Azərbaycan Respublikasının İnzibati Xətalar Məcəlləsinin 535.1-ci maddəsinə əsasən, polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə - fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Azərbaycan Respublikasının İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 9.1-ci maddəsinin tələbinə görə inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, müvafiq icra hakimiyyəti orqanının müəyyən etdiyi orqanın (qurumun) informasiya sistemində, habelə digər dövlət informasiya sistemlərində (ehtiyatlarında) aşkar olunan məlumatlarla, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Azərbaycan Respublikası İnzibati Xətalar Məcəlləsinin 31.2-ci maddəsinə əsasən, fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Barəsində inzibati xəta haqqında icraat aparılan şəxs Şəxs məsuliyyətini yüngülləşdirən və ya ağırlaşıran hallar müəyyən edilməmişdir. Həmin Məcəllənin 31.4-cü maddəsinə əsasən, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yalnız yuxarı həddi müəyyən edildikdə, tətbiq edilən inzibati tənbeh onun yuxarı həddinin dörddə birindən az ola bilməz. Həmin Məcəllənin 34.3-cü maddəsinə əsasən şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Məhkəmə, Şəxs barəsində inzibati tənbeh tətbiq edərkən işin hallarını, törətdiyi inzibati xətanın xarakterini, təqsirinin dərəcəsini, o cümlədən məsuliyyəti yüngülləşdirən və ağırlaşdıran halların olmamasını nəzərə alaraq, Şəxs cəmiyyətdən təcrid edilmədən islah edilməsini mümkün hesab etmir və Azərbaycan Respublikasının İXM-nin 34.3-cü maddəsi tətbiq edilməklə onun barəsində təqsirli bilindiyi daha ciddi xəta olan Azərbaycan Respublikasının İXM-nin 535.1-ci maddəsinin sanksiyasında nəzərdə tutulmuş inzibati həbs tənbeh tədbirinin 08 (səkkiz) gün müddətinə tətbiq edilməsinin qanuni və əsaslı olması ilə yanaşı, həm də inzibati tənbehin məqsədinə uyğun olması nəticəsinə gəlir. Qeyd edilənləri nəzərə alaraq məhkəmə hesab edir ki, Şəxs Azərbaycan Respublikası İnzibati Xətalar Məcəlləsinin 510 və 535.1-ci maddələri ilə nəzərdə tutulmuş inzibati xətanı törətməkdə təqsirli bilinməli və həmin Məcəllənin 34.3-cü maddəsinə əsasən barəsində 08 (səkkiz) gün müddətinə inzibati həbs tətbiq edilməli və inzibati həbs müddətinin əvvəli 28 yanvar 2026-cı il tarixdən, saat 20:30-dan hesablanmalıdır. Göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 48-51, 115, 128-130-cu maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikasının İnzibati Xətalar Məcəlləsinin 510 və 535.1-ci maddələri ilə təqsirli bilinsin və həmin Məcəllənin 34.3-cü maddəsinə əsasən barəsində 08 (səkkiz) gün müddətinə inzibati həbs tətbiq edilsin. İnzibati həbs müddətinin əvvəli 28 yanvar 2026-cı il tarixdən, saat 20:30-dan hesablansın. Qərarın icrası Lerik rayon Polis şöbəsinə həvalə edilsin. Qərarın surəti rəsmi qaydada verildiyi gündən 10 (on) gün müddətində Lerik rayon Məhkəməsi vasitəsi ilə və ya birbaşa Şirvan Apellyasiya Məhkəməsinə apellyasiya şikayəti verilə bilər. Hakim: Yusif Zeynalov