Bakı Şəhəri Xəzər Rayon Məhkəməsi Qərar — İş №3(5-95)-303/2026

Azərbaycan Respublikası adından QƏRAR Bakı şəhəri İş № 3(5-95)-303/2026 03.02.2026 BAKI ŞƏHƏRİ XƏZƏR RAYON MƏHKƏMƏSİ X2 Hidayət oğlunun sədrliyi ilə, Nəcəfova Səbinə Aydın qızının katibliyi, Bakı şəhəri Xəzər RPİ-nin 1-ci Polis Şöbəsinin sahə inspektoru, polis kapitanı X1, Barəsində inzibati xəta haqqında iş üzrə icraat aparılan şəxs Şəxs iştirakları ilə, xx.xx.1970-ci ildə Bakı şəhərində anadan olmuş, Azərbaycan Respublikası vətəndaşı, evli, ünvan 1 ünvanında qeydiyyatda olan Şəxs Azərbaycan Respublikası İnzibati Xətalar Məcəlləsinin (bundan sonra mətndə İXMnin) 206-cı maddəsi ilə inzibati xətanı törətməsinə dair Bakı şəhər Xəzər Rayon Polis İdarəsinin 2-ci Polis şöbəsindən daxil olmuş inzibati xəta haqqında materiala açıq məhkəmə iclasında baxaraq, məhkəmə Müəyyənetdi: Bakı şəhəri Xəzər RPİ-nin 1-ci Polis Şöbəsindən daxil olmuş xx.xx.2026-ci il tarixli MN seriyalı ******* saylı inzibati xəta haqqında protokola əsasən Şəxs narkotik vasitə qəbul etdiyi müəyyən olunmuşdur. Bununla da onun barəsində İXM-nin 206-cı maddəsi ilə inzibati xəta haqqında protokol tərtib olunmuşdur. Məhkəmə iclasında Bakı şəhəri Xəzər RPİ-nin 1-ci Polis Şöbəsinin sahə inspektoru, polis kapitanı X4 protokolun məzmununa uyğun izahat verərək bildirmişdir ki, Şəxs narkotik vasitə istifadəsində şübhəli bilinərək polis şöbəsinə dəvət edilmiş, ambulator məcburi-narkoloji tibbi yoxlamanın rəyinə görə Şəxs sidiyində narkotik vasitə aşkar olunmuş, İXM-nin 206-cı maddəsində nəzərdə tutulmuş xətanı törətdiyinə görə barəsində xx.xx.2026-cı il tarixli protokol tərtib olunmuşdur. Şəxs barəsində inzibati tənbeh tədbirinin tətbiq edilməsini xahiş etmişdir. Barəsində inzibati xəta haqqında iş üzrə icraat aparılan şəxs Şəxs izahatında əvvəllər içki içən olduğunu, lakin son 19 ildə spirtli içki işmədiyini, narkotik vasitədən ümumiyyətlə istifadə etmədiyini, məcburi-narkoloji tibbi yoxlama zamanı ona içmək üçün su verildiyini, suyu içdikdən sonra onun sidiyində narkotik vasitə aşkar olunduğunu, lakin heç vaxt narkotik vasitədən istifadə etmədiyini bildirmişdir. Ambulator məcburi narkoloji tibbi yoxlamanın 03 fevral 2026-cı il tarixli, 828 nömrəli rəyindən görünür ki, Şəxs sidiyində narkotik vasitə olan MET (+), aşkar olunur, psixostumulyatorların istifadə halları olub, narkomaniya xəstəliyinin əlamətləri aşkar olunmur, narkomaniya xəstəliyindən əzab çəkmir. Narkomaniyadan məcburi müalicəyə ehtiyacı yoxdur. Ərazi narkoloji tibb müəssisəsində profilaktik qeydiyyata alınması məsləhət görülür. “İnzibati qaydada tutma haqqında” 02 fevral 2026-cı il tarixli protokoldan görünür ki, Şəxs həmin tarixdə, saat 23:40-da tutulmuşdur. Bakı şəhəri Xəzər Rayon Polis İdarəsinin 1-ci Polis Şöbəsinin sahə inspektoru, polis kapitanı X4 tərəfindən tərtib edilmiş xx.xx.2026-ci il tarixli MN seriyalı ******* saylı protokoldan görünür ki, İXM-nin 206-cı maddəsi ilə nəzərdə tutulmuş inzibati xətanı törətmişdir. Məhkəmə, tərəflərin izahatlarını, eləcə də inzibati xəta haqqında materialı araşdırıb hesab edir ki, Şəxs izahatı özünümüdafiə xarakteri daşıyır, onun təqsiri əsaslığı heç bir şübhə doğurmayan məcburi narkoloji tibbi yoxlamanın 03 fevral 2026-cı il tarixli, 828 nömrəli rəyi ilə təsdiq olunur, Şəxs İXM-nin 206-cı maddəsi ilə nəzərdə tutulmuş inzibati xətanı törətməsi tam sübuta yetirilir. İXM-nin 206-cı maddəsinə əsasən qanunsuz olaraq narkotik vasitələrin, psixotrop maddələrin istehlakına, satış məqsədi olmadan az miqdarda hazırlanmasına, əldə edilməsinə, saxlanılmasına, daşınmasına və ya göndərilməsinə görə üç yüz manatdan dörd yüz manatadək məbləğdə cərimə edilir, işin hallarına görə və xətanı törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda isə iki ayadək müddətə inzibati həbs tətbiq edilir. İXM-nin müddəalarına görə fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır (maddə 31.2). İXM-nin Xüsusi hissəsində inzibati xətanın törədilməsinə görə müəyyən edilən inzibati tənbehin yalnız yuxarı həddi müəyyən edildikdə, tətbiq edilən inzibati tənbeh onun yuxarı həddinin üçdə birindən az ola bilməz (maddə 31.4). İnzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz (maddə 31.4.-1). İnzibati tənbeh tətbiq edilərkən bu Məcəllənin 32.1.1 - 32.1.7-ci maddələrində göstərilməmiş başqa hallar da hakim tərəfindən məsuliyyəti yüngülləşdirən hal qismində nəzərə alına bilər (maddə 32.2). İnzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir (maddə 84.1). İnzibati xətaya görə inzibati tənbeh tətbiq etmə ilə eyni vaxtda vurulmuş maddi zərərin ödənilməsi, həmçinin inzibati həbs nəzərdə tutan inzibati xəta törətmiş, narkomaniyadan müalicəyə ehtiyacı olan şəxsə məcburi müalicənin təyin edilməsi məsələləri hakim tərəfindən həll edilir (maddə 115.2). Məhkəmə iş üzrə tədqiq olunmuş digər halları araşdırıb hesab edir ki, Şəxs İXM-nin 206-cı maddəsi ilə təqsirli bilinərək, inzibati məsuliyyətə cəlb edilməli, onun ilk dəfə inzibati məsuliyyətə cəlb edilməsi, cinayət məsuliyyətinə alınmaması, eləcə də 01 (bir) gün müddətində inzibati qaydada tutulması nəzərə alınmaqla barəsində 300 (üç yüz) manat məbləğində inzibati cərimə tənbeh tədbiri tətbiq edilməli və dərhal məhkəmə iclas zalında həbsdən azad olunmalıdır. Şərh olunanlara əsasən və İXM-nin 40, 43, 114-115, 128-130-cu maddələrini rəhbər tutaraq, məhkəmə Q ə r a r a a l d ı: Şəxs İXM-nin 206 maddəsində nəzərdə tutulmuş inzibati xətanı törətməkdə təqsirli bilinsin, barəsində 300 (üç yüz) manat məbləğində inzibati cərimə tənbeh tədbiri tətbiq edilsin. Şəxs dərhal məhkəmə iclas zalında həbsdən azad olunsun. Şəxs ərazi narkoloji tibb müəssisəsində profilaktik qeydiyyata alınsın. Qərardan rəsmi qaydada verildiyi vaxtdan on gün müddətində Bakı şəhəri Xəzər Rayon Məhkəməsinin vasitəsilə şikayət və ya protest verilə bilər. X3