Bakı Şəhəri Xəzər Rayon Məhkəməsi Qərardad — İş №3(5-95)-322/2026

Azərbaycan Respublikası adından QƏRARDAD Bakı şəhəri İş № 3(5-95)-322/2026 17.02.2026 BAKI ŞƏHƏRİ XƏZƏR RAYON MƏHKƏMƏSİ Hakim Rüstəmov Emin Şahin oğlunun sədrliyi, Şükürlü Murad Şahin oğlunun katibliyi ilə, Azərbaycan Respublikası Daxili İşlər Nazirliyi Baş X4 İdarəsinin Mərkəzi İnformasiya Sisteminin xx.xx.2025-ci il tarixli inzibati tənbeh vermə haqqında qərarından şikayət verilməsi üçün buraxılmış prosessual müddətin bərpasına dair X1 vəsatətinə açıq məhkəmə iclasında baxaraq, məhkəmə, MÜƏYYƏN ETDİ: Azərbaycan Respublikası İnzibati Xətalar Məcəlləsinin (İXM) 469.3-cü maddəsinə əsasən 50 manat məbləğində cərimə edilməsinə dair Azərbaycan Respublikası Daxili İşlər Nazirliyi Baş X4 İdarəsinin Mərkəzi İnformasiya Sisteminin xx.xx.2025-ci il tarixli inzibati tənbeh vermə haqqında qərarından vətəndaş X2 şikayət verilməsi üçün buraxılmış prosessual müddətin bərpası ilə əlaqədar vəsatətlə məhkəməyə müraciət etmişdir. Vəsatət onunla əsaslandırmışdır ki, barəsində qəbul edilmiş inzibati tənbeh vermə haqqında EQ 29094762 saylı protokol rəsmi qaydada ona təqdim edilməmiş, xx.xx.2025-ci il tarixdə “Asan Pay” tətbiqi vasitəsi ilə adına inzibati cərimələr olduğunu öyrənmişdir. O, nəqliyyat vasitəsini faktiki idarə edən şəxsin cərimələri ödəməsini gözləmiş, lakin cərimələr ödənməmişdir. Bu səbəbdən mübahisələndirdiyi qərardan məhkəməyə şikayət vermə müddətini buraxmışdır. Məhkəmə iclasının vaxtı və yeri barədə lazımi qaydada məlumat verilməsinə baxmayaraq şikayətçi və səlahiyyətli orqanın nümayəndəsi məhkəmə iclasına gəlməmiş və bunun səbəbləri barədə məhkəməyə məlumat verməmişdir. Məhkəmə onların iştirakı olmadan məhkəmə iclasının keçirilməsini mümkün hesab etmişdir. İXM-nin müddəalarına görə barəsində inzibati xəta haqqında iş üzrə qərar qəbul edilmiş şəxs yol hərəkəti qaydaları, yol hərəkəti təhlükəsizliyinin təmin edilməsi və avtomobil yollarından istifadə qaydaları əleyhinə olan inzibati xətaların törədilməsinə görə inzibati tənbeh tətbiq etmə haqqında qərar ona bu Məcəllənin 57-ci maddəsində nəzərdə tutulmuş rəsmi qaydada verildiyi vaxtdan 20 (iyirmi) gün müddətində yuxarı səlahiyyətli orqana (vəzifəli şəxsə) və ya məhkəməyə şikayət edə bilər. Şikayət şəxsən verilə və ya poçt, yaxud internet vasitəsilə göndərilə bilər. Yuxarı səlahiyyətli orqana (vəzifəli şəxsə) inzibati xəta haqqında iş üzrə qərardan şikayət verildikdə, yuxarı səlahiyyətli orqan (vəzifəli şəxs) videomüşahidə vasitələrinin qeydə aldığı videoyazıya baxış keçirməklə və araşdırma aparmaqla qərarın ləğv edilməsi üçün əsaslar müəyyən etdikdə, inzibati xəta haqqında iş üzrə qərarı ləğv edir, belə əsaslar müəyyən olunmadıqda isə inzibati xəta haqqında iş üzrə qərarın dəyişdirilmədən saxlanılması barədə qərar qəbul edilir. Bu Məcəllənin 126.2-ci maddəsində nəzərdə tutulmuş qərarlar müvafiq icra hakimiyyəti orqanının müəyyən etdiyi orqanın (qurumun) müvafiq informasiya sistemində yerləşdirilir və barəsində inzibati xəta haqqında iş üzrə icraat aparılan şəxsə həmin qərar barədə bu Məcəllənin 125.2-ci maddəsində nəzərdə tutulmuş qaydada məlumat verilir (İXM-nin 126cı maddəsi). İXM-nin 126.1-ci maddəsində nəzərdə tutulmuş hallar istisna olmaqla, qərarın surəti bu Məcəllənin 57.1-57.5-ci maddələrində nəzərdə tutulmuş rəsmi qaydada verildiyi vaxtdan on gün müddətində inzibati xəta haqqında iş üzrə qərardan şikayət və ya protest verilə bilər. Bu Məcəllənin 130.1-ci maddəsində nəzərdə tutulmuş müddət üzrlü səbəbdən buraxıldıqda, şikayət və ya protest verən şəxsin vəsatəti ilə bu müddət hakim, səlahiyyətli orqan (vəzifəli şəxs) tərəfindən bərpa edilir. Buraxılmış müddətin bərpası qeyri-mümkün hesab edildikdə, bu halda vəsatəti rədd etmə haqqında qərardad qəbul edilir (İXM-nin 130cu maddəsi). Göründüyü kimi, X2 Azərbaycan Respublikası Daxili İşlər Nazirliyi Baş X4 İdarəsinin Mərkəzi İnformasiya Sisteminin qərarı ilə xx.xx.2025-ci il tarixli inzibati qaydada tənbeh edilmiş, özünün deməsinə görə isə yalnız xx.xx.2025-ci il tarixdə bu barədə məlumat almış və xx.xx.2026-cı il tarixdə məhkəməyə müraciət edib sözügedən qərarı mübahisələndirmişdir. Məhkəmə iş üzrə materialları araşdırıb, qanunvericiliyin tələblərini nəzərə alıb hesab edir ki, müraciət müəllifinin nəqliyyat vasitəsini faktiki idarə edən şəxsin cərimələri ödəməsini gözlədiyi üçün həmin qərarı vaxtında mübahisələndirməməsi müddətin bərpası üçün əsas sayıla bilməz, bu səbəbdən də onun yuxarıda göstərilən qərardan şikayət verilməsi üçün buraxılmış müddət bərpa edilməməlidir. Göstərilənlərə əsasən və Azərbaycan Respublikası İnzibati Xətalar Məcəlləsinin 128-130-cu maddələrini rəhbər tutub, məhkəmə QƏRARA ALDİ: Azərbaycan Respublikası Daxili İşlər Nazirliyi Baş X4 İdarəsinin Mərkəzi İnformasiya Sisteminin xx.xx.2025-ci il tarixli inzibati tənbeh vermə haqqında qərarından X2 tərəfindən verilmiş şikayətin verilməsi üçün buraxılmış prosessual müddətinin bərpa olunması barədə vəsatəti əsassız olduğundan rədd edilsin. X2 tərəfindən zərbaycan Respublikası Daxili İşlər Nazirliyi Baş X4 İdarəsinin xx.xx.2025-ci il tarixli inzibati tənbeh vermə haqqında qərarından verdiyi şikayət geri qaytarılsın. Qərardadın surəti təqdim edildiyi və ya alındığı gündən 10 gün muddətində Bakı şəhəri Xəzər Rayon Məhkəməsinin vasitəsi ilə Bakı Apellyasiya Məhkəməsinə apellyasiya şikayəti və protesti verilə bilər. Sədrlik edən Emin Rüstəmov