Bakı Şəhəri Nizami Rayon Məhkəməsi Qərardad — İş №3(5-99)-483/2026

Azərbaycan Respublikası adından QƏRARDAD Bakı şəhəri İş № 3(5-99)-483/2026 09.02.2026 BAKI ŞƏHƏRİ NİZAMİ RAYON MƏHKƏMƏSİ Mən, Bakı şəhəri Nizami Rayon Məhkəməsinin hakimi Mehdiyev Nəriman Hüseynqulu oğlu, Şəxs barəsində Azərbaycan Respublikası İXM-nin 333.1-ci maddəsi ilə olan inzibati materialı nəzərdən keçirərək, MÜƏYYƏN ETDİM: Bakı şəhər Baş Polis İdarəsinin X1 İdarəsindən daxil olmuş 18 yanvar 2026-cı il tarixli, İXP seriyalı, ******* nömrəli inzibati xəta haqqında protokola görə, Şəxs 18 yanvar 2026-cı il tarixdə, saat 02:07-də Bakı şəhəri C.Məmmədquluzadə küçəsində “Changan Deepal S 07 Plung-in Hibrid minik” markalı, **-MQ-*** dövlət qeydiyyat nişanlı nəqliyyat vasitəsini idarə edərkən Azərbaycan Respublikası İXM-nin 333.1-ci maddəsində nəzərdə tutulmuş inzibati xətanı törətmişdir. Daxil olmuş materialı nəzərdən keçirib, hesab edirəm ki, inzibati xəta haqqında protokol və ona əlavə olunmuş sənədlər protokolu tərtib etmiş orqana geri qaytarılmalıdır. Törədilməsi ehtimal edilən Azərbaycan Respublikası İXM-nin 333.1-ci maddəsinin mənasına görə, nəqliyyat vasitəsini idarə etmək hüququ olan şəxs tərəfindən nəqliyyat vasitəsinin alkoqoldan istifadə olunması nəticəsində sərxoş vəziyyətdə idarə edilməsi - hərəkətdə ifadə olunur və belə inzibati xətalara dair işlərə onun törədildiyi yerdə baxılmalıdır. Həmin Məcəllənin 110.1-ci maddəsinə əsasən inzibati xəta haqqında işə onun törədildiyi yerdə baxılır. Tərtib olunan protokoldan və digər sənədlərdən görünür ki, ehtimal olunan inzibati xəta Bakı şəhəri C.Məmmədquluzadə küçəsində törədilmişdir. Eyni zamanda inzibati xəta haqqında işin aidiyyəti üzrə göndərilməsi haqqında 18 yanvar 2026-cı il tarixli qərardadın özündə də protokolun baxılması üçün Bakı şəhəri Nəsimi Rayon Məhkəməsinə göndərilməsi qərara alınmışdır. Belə olan halda, materiala həmin yerin məhkəməsi tərəfindən baxılmalıdır. Lakin material Nəsimi rayonunun deyil, Nizami rayonunun məhkəməsinə göndərildiyindən, qeyd olunan səbəbdən, həmin məhkəmə tərəfindən materialın düzgün aidiyyətinin müəyyən edilməsi mümkün olmamışdır, ona görə ərazi üzrə məhkəmə aidiyyətinin düzgün müəyyənləşdirilərək materialın həmin yerin məhkəməsinə göndərilməsi üçün inzibati xəta haqqında protokol onu tərtib edən orqana qaytarılmalıdır. Azərbaycan Respublikası İXM-nin 106-cı maddəsinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən həmin maddədə imperativ formada sadalanmış digər məsələlərlə yanaşı həmçinin işin baxılmasının onun səlahiyyətinə aid olub-olmadığını, eləcə də işin digər materiallarının bu Məcəllənin tələblərinə müvafiq tərtib edilib-edilmədiyini həll etməlidir. Həmin Məcəllənin 109.1.6-cı maddəsinə əsasən inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Beləliklə, hesab edirəm ki, inzibati xəta haqqında protokol ərazi aidiyyəti üzrə məhkəmənin müəyyən olunaraq göndərilməsi məsələsinin həlli üçün onu tərtib edən orqana geri qaytarılmalıdır. Qeyd edilməlidir ki, inzibati xətalar haqqında işlər üzrə məhkəmə qərardadları məsələni mahiyyəti üzrə həll etmədiyi üçün, onlardan şikayət verilməsi nəzərdə tutulmamışdır. Şərh olunanlara əsaslanaraq və Azərbaycan Respublikası İXM-nin 106, 109 və 118-ci maddələrini rəhbər tutaraq, QƏRARA ALDİM: Şəxs barəsində Azərbaycan Respublikası İXM-nin 333.1-ci maddəsi ilə tərtib edilmiş 18 yanvar 2026-cı il tarixli, İXP seriyalı, ******* nömrəli inzibati xəta haqqında protokola dair material Bakı şəhər Baş Polis İdarəsinin X1 İdarəsinə geri qaytarılsın. Qərardaddan şikayət verilə bilməz. Hakim Nəriman Mehdiyev