Bakı Şəhəri Yasamal Rayon Məhkəməsi Qərardad — İş №8(004)-378/2023

Azərbaycan Respublikası adından QƏRARDAD Bakı şəhəri İş № 8(004)-378/2023 27.07.2023 BAKI ŞƏHƏRİ YASAMAL RAYON MƏHKƏMƏSİ Hakim Məmmədov Ayaz Süleyman oğlunun sədrliyi, Hacıyeva Aysel Nazim qızının katibliyi, Borclu iştirakı ilə Bakı Şəhəri Yasamal Rayon Məhkəməsinin 2(004)-3340/2021 saylı, xx.xx.2021-ci il tarixli icra sənədi üzrə Borclu ölkədən getmək hüququnun müvəqqəti məhdudlaşdırılması barədə Bakı şəhəri Yasamal Rayon İcra Şöbəsinin icra məmuru Bəxtiyar Babayevin təqdimatına məhkəmə iclasında baxaraq, məhkəmə MÜƏYYƏN ETDİ: Bakı şəhəri Yasamal Rayon İcra Şöbəsinin icra məmuru Bəxtiyar Babayev təqdimatla məhkəməyə müraciət edərək, Bakı Şəhəri Yasamal Rayon Məhkəməsinin 2(004)- 3048/2022 saylı, xx.xx.2022-ci il tarixli icra sənədi üzrə Borclu ölkədən getmək hüququnun müvəqqəti məhdudlaşdırılmasına dair qərardad çıxarılmasını xahiş etmişdir. Təqdimatı onunla əsaslandırmışdır ki, Bakı Şəhəri Yasamal Rayon Məhkəməsinin 2(004)-3340/2021-010 nömrəli, xx.xx.2021-ci il tarixli icra sənədinə əsasən xx.xx.1980-ci ildə Bakı şəhərində anadan olmuş və ünvan 1 ünvanında qeydiyyatda olan Borclu aliment hesablanması 27 aprel 2021-ci il tarixdən başlayaraq xx.xx.2010-cu il təvəllüdlü X1 və xx.xx.2011-ci il təvəllüdlü X2 yetkinlik yaşına çatana kimi saxlanılması üçün hər ay hər uşaq üçün 175 (bir yüz yetmiş beş) manat, cəmi 350 (üç yüz əlli) manat sabit pul məbləğində aliment tutularaq, Tələbkar xeyrinə ödənilməlidir. Yuxarıda qeyd olunan icra sənədi xx.xx.2021-ci il tarixində Bakı şəhəri Yasamal rayon İcra şöbəsinə daxil olmuş və qanuna müvafiq qaydada icraya yönəldilmişdir. İcraata başlamaq haqqında qərar qəbul edilərək, qərarın surəti bildirişlə icra sənədi üzrə Borclu dərhal icra olunması üçün göndərilmişdir. Lakin bu müddət ərzində borclu tərəfindən icra sənədində olan tələb könüllü təmin edilmədiyi üçün borclunun əmlak vəziyyətini yoxlamaq üçün aidiyyəti təşkilatlara sorğular göndərilmişdir. Borclu şöbədə olarkən icra sənədinin icrasının təmin edilməsi ilə bağlı rəsmi xəbərdarlıq təqdim olunmuşdur. Həmçinin təqdimatda bildirilir ki, bu ay daxil olmaqla yaranmış aliment borcu 1900 (min doqquz yüz) manat təşkil edir. İcra işi üzrə təqdimatı təqdim edən icra məmuruna məhkəmə iclasının vaxtı və yeri barədə məlumat göndərilmiş, lakin o, məhkəmə iclasına gəlməmişdir. Azərbaycan Respublikası MPM-nin 231.2-ci maddəsinə əsasən məhkəmə hesab edir ki, işdə iştirak edən şəxslərin gəlməməsi məhkəmə qarşısında qoyulmuş məsələnin həll edilməsinə mane olmur. Məhkəmə iclasında iştirak edən Borclu təqdimatda göstərilən borcu tam şəkildə ödədiyini bildirərək məhkəməyə bununla bağlı ödəniş qəbzləri təqdim etmiş və məhkəmədən təqdimatın təmin olunmamasını xahiş etmişdir. Məhkəmə, təqdimatı, ona əlavə olunmuş sənədləri və borclunun təqdim etdiyi sənədləri araşdıraraq hesab edir ki, təqdimat rədd edilməlidir. Məhkəmə icra işini araşdıraraq, icra işindəki sənədlərə və borclunun təqdim etdiyi sənədlərə hüquqi qiymət verərək hesab edir ki, icra sənədi əsasında Borclu borcu tam şəkildə icra etdiyini nəzərə alaraq, Bakı Şəhəri Yasamal Rayon Məhkəməsinin 2(004)- 3340/2021 saylı, xx.xx.2021-ci il tarixli icra sənədi üzrə Borclu ölkədən getmək hüququnun müvəqqəti məhdudlaşdırılması barədə Bakı şəhəri Yasamal Rayon İcra Şöbəsinin icra məmuru Bəxtiyar Babayevin təqdimatı rədd edilməlidir. “İcra Haqqında” Azərbaycan Respublikasının Qanununun 20.1.5-ci maddəsinə əsasən icra sənədi tam icra olunduqda icra sənədi üzrə icraata xitam verilir. Həmin Qanunun 20.8-ci maddəsinə əsasən icra sənədi məhkəməyə və ya icra sənədini vermiş digər orqana qaytarıldıqdan sonra icra məmuru təyin etdiyi bütün icra tədbirlərini ləğv edir. Göstərilənlərə əsasən və Azərbaycan Respublikasının MPM-nin 492, 263-264, 266- 268-ci maddələrini rəhbər tutaraq, məhkəmə QƏRARA ALDİ: Bakı Şəhəri Yasamal Rayon Məhkəməsinin 2(004)-3340/2021 saylı, xx.xx.2021-ci il tarixli icra sənədi üzrə Borclu ölkədən getmək hüququnun müvəqqəti məhdudlaşdırılması barədə Bakı şəhəri Yasamal Rayon İcra Şöbəsinin icra məmuru Bəxtiyar Babayevin təqdimatı təmin edilməsin. Qərardaddan rəsmi qaydada verildikdən sonra tərəflər 10 (on) gün müddətində “Elektron məhkəmə” informasiya sistemində yaradılan elektron kabinetdən Bakı şəhəri Yasamal Rayon Məhkəməsinə şikayət verə bilərlər. Sədrlik edən: Ayaz Məmmədov