Bakı Şəhəri Suraxanı Rayon Məhkəməsi Qərardad — İş №8(010)-159/2025

Azərbaycan Respublikası adından QƏRARDAD Bakı şəhəri İş № 8(010)-159/2025 24.02.2025 BAKI ŞƏHƏRİ SURAXANI RAYON MƏHKƏMƏSİ Bakı şəhər Suraxanı rayon məhkəməsinin hakimi Mirzəyeva Firuzə Fuad qızının sədrliyi, Quliyeva Leyla Məmməd qızının katibliyi, Tələbkar (ərizəçi) Gəraylı Ayşə Bayram qızının iştirakı ilə, Tələbkar (ərizəçi) Gəraylı Ayşə Bayram qızının alimentin indeksasiya edilməsi barədə ərizəsinə açıq məhkəmə iclasında baxaraq, məhkəmə MÜƏYYƏN ETDİ: Tələbkar (ərizəçi) Gəraylı Ayşə Bayram qızı alimentin indeksasiya edilməsi barədə ərizə ilə məhkəməyə müraciət edərək, Bakı şəhəri Suraxanı rayon Məhkəməsinin 2(010)-2630/2024 saylı 03.06.2024-cü il tarixli qətnaməsinə əsasən 21.07.2021-ci il təvəllüdlü Gəraylı Məryəm Şirazı qızının yetkinlik yaşına çatanadək saxlanılması üçün hər ay sabit pul məbləğində tutulan 193 manat alimentin miqdarının 2025-ci il üçün 246 manat minimum əmək haqqına uyğun indeksasiya olunması barədə qərardad qəbul edilməsini xahiş etmişdir. Tələbkar (ərizəçi) Gəraylı Ayşə Bayram qızı məhkəmə iclasında izahatı və məhkəməyə təqdim etdiyi ərizəsi ilə indeksasiya ilə bağlı ərizəsinin baxılmamış saxlanılmasını xahiş etmiş, indeksasiya olunmasını istəmədiyini bildirmişdir. Borclu Gəraylı Şirazi Bayram oğlu ərizəyə baxılması üçün təyin edilmiş məhkəmə iclasının vaxtı və yeri haqqında xəbərdar edilməklə məhkəmə iclasına çağırılmış, lakin məhkəmə iclasına gəlməmişdir. Borclunun gəlməməsi məhkəmə qarşısında qoyulmuş məsələnin həll edilməsinə mane olmadığından, Azərbaycan Respublikası MPM-nin 231.2-ci maddəsinə əsasən məhkəmə şikayətə onların iştirakı olmadan baxılmasını mümkün hesab etmişdir. Azərbaycan Respublikası Mülki Prosessual Məcəlləsinin 259.0 və 259.0.11-ci maddələrinin tələblərinə görə, iddia ərizəsinin qaytarılması barəsində ərizə verildikdə və cavabdeh işin mahiyyəti üzrə həll olunmasını tələb etmədikdə, məhkəmə ərizəni baxılmamış saxlayır. Azərbaycan Respublikası Mülki Prosessual Məcəlləsinin 260.4-cü maddəsinə əsasən, iddianın baxılmamış saxlanması üçün səbəb olan şərait aradan qaldırıldıqdan sonra maraqlı şəxs ümumi qaydada ərizə ilə məhkəməyə yenidən müraciət etməyə haqlıdır. Beləliklə, təsvir olunanlara əsasən, məhkəmə yuxarıda göstərilmiş mülki prosessual qanunvericiliyinin müddəalarını analogiya üzrə tətbiq edərək hesab edir ki, tələbkar (ərizəçi) Gəraylı Ayşə Bayram qızının alimentin indeksasiya edilməsi barədə ərizəsi baxılmamış saxlanılmalı, əlavə olunmuş sənədlərlə birlikdə ərizəçiyə geri qaytarılmalıdır. Yuxarıda göstərilənlərə əsasən və Azərbaycan Respublikası Mülki Prosessual Məcəlləsinin 259, 260, 263, 264, 267 və 268-ci maddələrini rəhbər tutaraq, məhkəmə QƏRARA ALDI: Tələbkar (ərizəçi) Gəraylı Ayşə Bayram qızının alimentin indeksasiya edilməsi barədə ərizəsi baxılmamış saxlanılsın və əlavə olunmuş sənədlərlə birlikdə ərizəçiyə geri qaytarılsın. Qərardaddan rəsmi qaydada verildikdən sonra 10 gün müddətində “Elektron Məhkəmə” informasiya sistemində yaradılan elektron kabinetlə Bakı şəhər Suraxanı rayon Məhkəməsinə şikayət verilə bilər. Hakim: Firuzə Mirzəyeva