Azərbaycan Respublikası adından QƏRARDAD Bakı şəhəri İş № 8(011)-43/2024 25.01.2024 BAKI ŞƏHƏRİ XƏTAİ RAYON MƏHKƏMƏSİ Hakim Eyvazova Samirə Əli qızının sədrliyi, Hüseynli Mehriban Qalib qızının katibliyi X2 iştirakı ilə X1 Bakı şəhəri Xətai Rayon Məhkəməsinin xx.xx.2019-cu il tarixli 2(011)-4464/2019 nömrəli qətnaməsi ilə müəyyən edilmiş borcun hissə-hissə ödənilməsinə dair ərizəsinə açıq məhkəmə iclasında baxaraq, MÜƏYYƏN ETDİ: İşin ərizədə qeyd edilən halları:
1. Bakı şəhəri Xətai Rayon Məhkəməsinin xx.xx.2019-cu il tarixli 2(011)-4464/2019 nömrəli qətnaməsinə əsasən cavabdeh X3 17333 manat pul məbləğinin tutularaq iddiaçı “X9” klinikasına ödənilməsi qət edilmişdir.
2. Daha sonra xx.xx.2019-cu il tarixdə borclu X5 Bakı şəhəri Xətai Rayon Məhkəməsinin xx.xx.2019-cu il tarixli 2(011)-4464/2019 nömrəli qətnaməsi ilə müəyyən edilmiş 15133 manat pul məbləğinin (2200 manat ödənilmişdir) hissə-hissə ödənilməsinə dair ərizə ilə məhkəməyə müraciət etmişdir. O, qeyd etmişdir ki, klinika rəhbərliyinə şifahi olaraq borcun aylıq ödənilməsi ilə bağlı müraciət etmişdir. Hal-hazırda tam olaraq ödəniş etmək imkanı yoxdur, işləmir, 3 qız övladı var. Qalıq borcun aylıq 200 manat hissə-hissə ödənilməsi barədə qərar qəbul edilməsini xahiş edir.
Ərizəçinin xahişi:
3. Bakı şəhəri Xətai Rayon Məhkəməsinin xx.xx.2019-cu il tarixli 2(011)-4464/2019 nömrəli qətnaməsi ilə müəyyən edilmiş 15133 manat (2200 manat ödənilmişdir) pul məbləğinin “X9” klinikasına hissə-hissə (200 manat) ödənilməsi barədə qərar qəbil edilməsini məhkəmədən xahiş etmişdir. Tərəflərin izahatı:
4. Məhkəmə iclasında iştirak edən borclu X5 öz izahatında bildirmişdir ki, onun əvvəl həkimi “Neftçilər” klinikasında Kamran Nağıyev olmuşdur. Lakin, daha sonra əkiz uşaqlara hamilə olduğu zaman ananın və uşaqların həyatına risk olduğu üçün “X9” klinikasına getməli olmuşdur. Həmin klinikada uşaqlar əməliyyatla dünyaya gəmişdirlər. Uşaqlar olandan sonra başqa xəstəxanaya getmək istəsələr də, həyati risk olduğu üçün gedə bilməmişdirlər. Ümumi borcları 36000 olmuş, onun yarısını ödəyə bilmişdirlər. Ondan sonra da 2 ildir ki, aylıq 200 manat olmaqla ödəmələr həyata keçirirlər. Məhkəmədən borcun hissə-hissə ödənilməsi ilə bağlı qərar qəbul etməsini xahiş edir.
5. “X9” klinikasına məhkəmə iclasının vaxtı və yeri barədə əvvəlcədən lazımi qaydada məlumat verilməsinə baxmayaraq, məhkəmə iclasında iştirak etməmiş və iştirak etməməsinin üzrlü səbəbləri barədə məhkəməyə heç bir məlumat verməmişdirlər. Məhkəmə Azərbaycan Respublikası MPM-nin 231.2-ci maddəsinə əsasən, ərizəyə ərizçənin iştirakı olmadan baxılmasını mümkün hesab etmişdir.
Tətbiq edilən hüquq: 6.İnsan hüquqlarının və əsas azadlıqların müdafiəsi haqqında 1950-ci il Konvensiyası : 6.1. Hər kəs, onun mülki hüquq və vəzifələri müəyyən edilərkən və ya ona qarşı hər hansı cinayət ittihamı irəli sürülərkən, qanun əsasında yaradılmış müstəqil və qərəzsiz məhkəmə vasitəsi ilə, ağlabatan müddətdə işinin ədalətli və açıq araşdırılması hüququna malikdir.
7.Azərbaycan Respublikası Mülki Prosessual Məcəlləsi: 231.1. İşə baxmış hakim, işdə iştirak edən şəxslərin ərizəsi üzrə tərəflərin əmlak vəziyyətinə və digər hallara əsasən qətnamənin icrasına möhlət verməyə və ya qətnaməni hissə-hissə icra etdirməyə, habelə onun icra üsulunu və qaydasını dəyişdirməyə haqlıdır. 231.2. Həmin ərizələrə məhkəmə iclasında baxılır. İşdə iştirak edən şəxslər iclasın vaxtı və yeri haqqında xəbərdar edilirlər, lakin onların gəlməməsi məhkəmə qarşısında qoyulmuş məsələnin həll edilməsinə mane olmur. 231.4. Qətnamə icrasına möhlət verilməsi və ya onun hissə-hissə icra edilməsi barədə məhkəmə qərardadından şikayət verilə bilər. 231.5. Qanunla nəzərdə tutulmuş hallar istisna olmaqla, ipoteka predmetinə tutmanın yönəldilməsi barədə məhkəmə qərarının icrasına möhlət verilməsinə, məhkəmə qətnaməsinin hissə-hissə icra edilməsinə, icra üsulunun və qaydasının dəyişdirilməsinə, habelə icra üzrə icraatın dayandırılmasına yalnız ipoteka saxlayanın razılığı ilə yol verilir.
8. Məhkəmə qətnaməsi haqqında Azərbaycan Respublikası Ali Məhkəməsinin Plenumunun 24 oktyabr 2005-ci il tarixli Qərarı
12. Məhkəmələr nəzərə almalıdırlar ki, qətnamənin icrasına möhlət verilməsi və ya onun hissə-hissə icra edilməsi, qətnamənin icra üsulunun və qaydasının dəyişdirilməsi müstəsna hal olub, qətnamənin icrası üçün çətinlik törədən və yaxud borclu üçün yaranmış əlverişsiz hallarda tətbiq oluna bilər.
İşə baxan məhkəmənin mövqeyi:
9. Məhkəmə ərizəni və ərizəyə əlavə olunan sənədləri araşdırıb hesab edir ki, ərizə təmin edilməməlidir.
10. Məhkəmə qeyd edir ki, Avropa İnsan Hüquqları Məhkəməsi özünün bir çox qərarlarında məhkəmə aktlarının vaxtında icra edilməməsini ədalətli məhkəmə araşdırmasının həyata keçirilməsinin təmin edilməməsi kimi qiymətləndirmişdir. Belə ki, İnsan hüquqlarının və əsas azadlıqların müdafiəsi haqqında Konvensiyanın 6-cı maddəsinə əsasən hər kəs, onun mülki hüquq və vəzifələri müəyyən edilərkən və ya ona qarşı hər hansı cinayət ittihamı irəli sürülərkən, qanun əsasında yaradılmış müstəqil və qərəzsiz məhkəmə vasitəsi ilə, ağlabatan müddətdə işinin ədalətli və açıq araşdırılması hüququna malikdir.
11. Məhkəmə hesab edir ki, tələbkar borcun hissə-hissə icra edilməsinə razılıq verməməsi, o cümlədən ərizəçi borcun ödənilməsi ilə bağlı yaranmış əlverişsiz hallarla bağlı hər hansı çötəbər sübutu ərizəyə əlavə etməməsi səbəbindən ərizə rəmin edilməməlidir. Qeyd edilənlərə əsasən məhkəmə hesab edir ki, ərizə rədd edilməlidir.
12. Şərh olunanlara əsasən və Azərbaycan Respublikasının MPM-nin 231, 263-264cü maddələrini rəhbər tutaraq, məhkəmə
QƏRARA ALDİ:
1. X1 Bakı şəhəri Xətai Rayon Məhkəməsinin xx.xx.2019-cu il tarixli 2(011)- 4464/2019 nömrəli qətnaməsi ilə müəyyən edilmiş borcun hissə-hissə ödənilməsinə dair ərizəsi rədd edilsin.
2. Qərardaddan rəsmi qaydada verildiyi gündən 10 (on) gün müddətində Bakı şəhəri Xətai Rayon Məhkəməsinə (“Elektron məhkəmə” informasiya sistemində yaradılan kabinetdən elektron qaydada) şikayət verilə bilər.
Sədrlik edən Samirə Eyvazova