Bakı Şəhəri Xətai Rayon Məhkəməsi Qərardad — İş №8(011)-791/2023

Azərbaycan Respublikası adından QƏRARDAD Bakı şəhəri İş № 8(011)-791/2023 24.10.2023 BAKI ŞƏHƏRİ XƏTAİ RAYON MƏHKƏMƏSİ Hakim Zamanlı Pərviz Mirsiyaf oğlunun sədrliyi, Həsənova Elnarə Daşdəmir qızının katibliyi, X1 iştirakı ilə, X1 qətnamənin hissə-hissə icra edilməsi barədə ərizəsinə açıq məhkəmə iclasında baxaraq M Ü Ə Y Y Ə N E T D İ: Borclu ərizə ilə məhkəməyə müraciət edərək, Bakı Apellyasiya Məhkəməsinin 2(103)-2652/2023 saylı xx.xx.2023-cü il tarixli qətnaməsi ilə onun tərəfindən Tələbkar Bakı filialına ödənilməli olan 3400 manat məbləğində pul vəsaitinin hər ay 100 manat ödənilməklə hissə-hissə icra edilməsi barədə qərar qəbul edilməsini xahiş etmişdir. Ərizəçi qeyd etmişdir ki, Bakı Apellyasiya Məhkəməsinin 2(103)-2652/2023 saylı xx.xx.2023-cü il tarixli qətnaməsi ilə ondan 3400 manat məbləğində pul vəsaitinin tutularaq Tələbkar Bakı Filialına ödənilməsi qət edilmişdir. Bakı şəhəri Xətai Rayon İcra Şöbəsi tərəfindən icra sənədi üzrə icraata başlanılmışdır. Onun Azərbaycan Respublikasında qazanc yeri və əmlakı mövcud deyil, tək anadır, himayəsində iki yelkinlik yaşma çatmayan uşaq var və kirayə mənzildə yaşayır. Belə olan halda qətnamənin onun tərəfindən birdəfəlik qaydada ödənilməsi maddi imkanları həddində deyil. Tələbin birdəfəlik qaydada ödənilməsi ilə məcburi icra tədbirlərinin həyata keçirilməsi nəinki icra sənədinin icrasına xidmət edir, əksinə onun icrasını mümkünsüz edir. Lakin icra sənədinin hissə- hissə icrası ilə bağlı qərardad qəbul edildiyi təqdirdə, özü və onun ailə üzvlərinin qazancı hesabına müəyyən bir müddət ərzində borcun tamamilə ödənilməsi mümkündür. Borcludan tələb olunan 3400 manat pul vəsaitinin hər ay 100 manat ödəməklə qaytarılması borclunun maddi imkanları çərçivəsindadir. Borclu məhkəmə baxışı zamanı ərizəyə uyğun izahat verərək ərizənin təmin edilməsini xahiş etdi. Bakı şəhəri Xətai rayon İcra şöbəsi və tələbkar təqdimata baxılması üçün təyin edilmiş məhkəmə iclasının vaxtı və yeri haqqında xəbərdar edilməklə məhkəmə iclasına çağırılmışdır. Lakin onlar məhkəmə iclasına gəlməmişlər. Bakı şəhəri Xətai rayon İcra şöbəsinin icra məmurunun və tələbkarın məhkəmə iclasına gəlməmələri məhkəmə qarşısında qoyulmuş məsələnin həll edilməsinə mane olmadığından, Azərbaycan Respublikası MPM-nin 231.2-ci maddəsinə əsasən məhkəmə təqdimata onların iştirakı olmadan baxılmasını mümkün hesab etmişdir. Məhkəmə borclunun izahatını dinləyərək, ərizənin dəlillərini araşdıraraq hesab edir ki, ərizə əsassızdır. “İcra haqqında” Azərbaycan Respublikası Qanununun 15-ci maddəsinə əsasən, tərəflər icra sənədinin icrasına möhlət verilməsi və ya onun hissə-hissə icrası, yaxud icra sənədinin icrası üsulunun və qaydasının dəyişdirilməsi haqqında işə baxmış məhkəməyə müraciət edə bilərlər. Borclunun əmlak vəziyyətini və digər halları nəzərə alaraq, məhkəmə həmin müraciətlərə Azərbaycan Respublikasının Mülki Prosessual Məcəlləsinin 231-ci maddəsi ilə müəyyən edilmiş qaydada baxır. Azərbaycan Respublikası MPM-nin 231.1-ci maddəsinə əsasən, işə baxmış hakim, işdə iştirak edən şəxslərin ərizəsi üzrə tərəflərin əmlak vəziyyətinə və digər hallara əsasən qətnamənin icrasına möhlət verməyə və ya qətnaməni hissə-hissə icra etdirməyə, habelə onun icra üsulunu və qaydasını dəyişdirməyə haqlıdır. Qeyd edilən müddəaların mənasından da göründüyü kimi, qanunvericilik qətnamə çıxarıldıqdan sonra, məzmununa toxunmadan qətnaməni çıxarmış məhkəmə tərəfindən onun icra olunması qaydasının dəyişdirilməsi ilə bağlı müəyyən imkanları nəzərdə tutmuşdur. Bunlar 3 formada - qətnamənin icrasına möhlət vermə, qətnaməni hissə-hissə icra etmə və qətnamənin icra üsulunun və qaydasının dəyişdirməsi qaydasında ola bilər. Qətnamənin icra üsulunun bu formalara uyğun dəyişdirilməsinin başlıca şərti isə işdə iştirak edən şəxslərin əmlak vəziyyəti və digər hallarla (məsələn, qətnamə çıxarıldıqdan sonra əvvəlki vəziyyətin dəyişməsi və bu halın qətnamənin icrasında çətinliklər yaratması və s.) bağlı ola bilər. Borclu Bakı Apellyasiya Məhkəməsinin 2(103)-2652/2023 saylı, xx.xx.2023-cü tarixli qətnaməsinin hissə-hissə icra edilməsinə imkan verən qanunla müəyyən edilmiş əsaslarını və bununla bağlı sübutlarını məhkəməyə təqdim etməmişdir. Azərbaycan Respublikası MPM-nin 77.1-ci maddəsinə əsasən, hər bir tərəf öz tələblərinin və etirazının əsası kimi istinad etdiyi halları sübut etməlidir. Həmin Məcəllənin 14.2-ci maddəsinə əsasən, məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Şərh olunanlara əsaslanaraq və Azərbaycan Respublikası MPM-nin 231, 263-264 və 266-268-ci maddələrini rəhbər tutaraq məhkəmə QƏRARAALDİ: X1 qətnamənin hissə-hissə icra edilməsi barədə ərizəsi təmin edilməsin. Qərardaddan rəsmi qaydada verildikdən sonra 10 (on) gün müddətində Bakı şəhəri Xətai Rayon Məhkəməsinə şikayət verilə bilər. Sədrlik edən: Pərviz Zamanlı