Bərdə Rayon Məhkəməsi Qərardad — İş №8(021)-343/2023

Azərbaycan Respublikası adından QƏRARDAD Bərdə rayonu İş № 8(021)-343/2023 08.06.2023 BƏRDƏ RAYON MƏHKƏMƏSİ Hakim Babaşov Fuad Bəhruz oğlunun sədrliyi, X2 iclas katibliyi ilə, Tələbkar icra sənədinin yenidən icraya yönəldilməsi barədə ərizəsinə açıq məhkəmə iclasında baxaraq, məhkəmə MÜƏYYƏN ETDİ: Tələbkar məhkəməyə ərizə ilə müraciət edərək, Bərdə rayon İcra və Probasiya Şöbəsinin icra məmuru Sahil İsbəndiyarov tərəfindən qəbul edilmiş xx.xx.2021-ci il tarixli qərarın ləğv edilməsi, Bərdə Rayon Məhkəməsinin 07 may 2013-cü il tarixli, 2(021)- 671/2013 nömrəli qətnaməsinin yenidən icraya yönəldilməsi barədə qərardad qəbul edilməsini məhkəmədən xahiş etmişdir. Ərizə onunla əsaslandırılmışdır ki, Bərdə Rayon Məhkəməsinin 07 may 2013-cü il tarixli, 2(021)-671/2013 nömrəli qətnaməsinə birgə nikahlarından xx.xx.2012-ci ildə anadan olmuş X1 üçün cavabdeh X3 hər ay 50 manat aliment, 20 manat məbləğində müalicə xərci tutularaq onun xeyrinə verilməlidir. Həmin icra sənədi Bərdə rayon İcra və Probasiya şöbəsinin icra məmuru Sahil İsbəndiyarovun icraatında olmuşdur. Bərdə rayon İcra və Probasiya şöbəsinin icra məmuru Sahil İsbəndiyarov tərəfindən xx.xx.2021-ci il tarixdə qərar qəbul edilərək icra sənədi geri qaytarılmışdır. İcra məmuru Sahil İsbəndiyarov qərarı onunla əsaslanıdırmışdır ki, Tələbkar ərizə ilə müraciət edərək icra sənədinin geri qaytarılmasını xahiş etmişlər. Bərdə rayon İcra və Probasiya şöbəsinin icra məmuru Sahil İsbəndiyarov tərfindən qəbul edilmiş xx.xx.2021-ci il tarixli qərar ləğv edilməlidir. Belə ki, hazırda uşaqların hər ikisi onun himayəsində yaşayır, uşaqların saxlanmasında maddi çətinlik çəkir, borclu X5 uşaqların saxlanması üçün heç bir maddi köməklik göstərmir. Yuxarıda qeyd edilənlərə əsasən hesab edir ki, Bərdə rayon İcra və Probasiya şöbəsinin icra məmuru Sahil İsbəndiyarov tərəfindən qəbul edilmiş xx.xx.2021ci il tarixli qərarı ləğv edilməli, Bərdə Rayon Məhkəməsinin 07 may 2013-cü il tarixli, 2(021)-671/2013 nömrəli qətnaməsi yenidən icraya yönəldilməlidir. Ərizəyə baxılması ilə əlaqədar tərəflər məhkəmə iclasının vaxtı və yeri barəsində lazımi qaydada xəbərdar edilmələrinə baxmayaraq onlar məhkəmə iclasına gəlməmişlər. Məhkəmə onların məhkəmə iclasına gəlməmələrinin səbəbini üzürsüz sayaraq işə onların iştirakları olmadan baxılmasını mümkün hesab etmişdir. Məhkəmə iş materiallarını nəzərdən keçirərək hesab edir ki, ərizə təmin edilməlidir. İş materiallarında olan və məhkəmə iclasında tədqiq edilmiş: AZE seriyalı, ******** nömrəli Tələbkar xx.xx.1981-ci ildə Bərdə şəhərində anadan olmuşdur. Bərdə şəhəri, H.Əliyev prospekti, ev 38-də yaşayır və qeydiyyatdadır. İş materiallarında olan İcra və Probasiya Şöbəsinin icra məmuru Sahil İsbəndiyarovun xx.xx.2021-ci il tarixli icra sənədinin məhkəməyə qaytarılmasına dair qərarının surətindən görünür ki, Bərdə rayon Məhkəməsinin 2(021)-1199/2011 nömrəli, xx.xx.2011-ci il tarixli icra sənədi tələbkarın icra sənədinin məhkəməyə qaytarılması barədə xahişi nəzərə alınaraq məhkəməyə geri qaytarılmışdır. Azərbaycan Respublikası Konstitusiyasının 129-cu maddəsinə görə məhkəmənin qəbul etdiyi qərarlar dövlətin adından çıxarılır və onların icrası məcburidir. Azərbaycan Respublikası Mülki Prosessual Məcəlləsinin 15.2-ci maddəsinə görə məhkəmələrin qanuni qüvvəyə minmiş qərarları bütün şəxslər üçün məcburidir və Azərbaycan Respublikası ərazisində hökmən icra olunmalıdır. İş materiallarından aydın olur ki, Bərdə rayon Məhkəməsinin 2(021)-1199/2011 nömrəli, xx.xx.2011-ci il tarixli qətnaməsinə əsasən icra vərəqəsi verilmiş və icra olunması üçün Bərdə rayon İcra və Probasiya Şöbəsinə göndərilmişdir. İcraat dövründə tələbkar ərizə ilə müraciət edərək icra sənədinin məhkəməyə qaytarılmasını xahiş etmiş və icra sənədi icra məmurunun xx.xx.2021-ci il tarixli qərarı ilə “İcra haqqında” Azərbaycan Respublikası Qanununun 23.1.1-ci maddəsinə uyğun olaraq məhkəməyə qaytarılmışdır. Lakin, sonradan ərizəçi uşaqlarının saxlanmasında çətinlik çəkdiyindən məhkəmənin aliment tutulmasına dair icra sənədinin yenidən icraya yönəldilməsi zərurəti yaranmışdır. Belə olan halda məhkəmə hesab edir ki, ərizə təmin edilməlidir. «İcra haqqında» Azərbaycan Respublikası Qanununun 2.1-ci maddəsinə görə, Azərbaycan Respublikasında məhkəmə və digər orqanların qərarlarının məcburi icrası icra məmurları tərəfindən həyata keçirilir. Həmin Qanunun 12.1-ci maddəsinə görə, icra məmuru icra sənədini aldığı gündən iki ay müddətində icra hərəkətlərini həyata keçirməli və icra sənədində göstərilən tələblərin icra olunmasını təmin etməlidir. Həmin Qanunun 3.1-ci maddəsinin tələbinə görə, məhkəmə və digər orqanların qərarlarının icrası ilə əlaqədar icra məmurunun tələbləri Azərbaycan Respublikasının ərazisində bütün orqanlar, hüquqi şəxslər, onların vəzifəli şəxsləri və fiziki şəxslər üçün məcburidir. Həmin Qanunun 3.2-ci maddəsinin tələbinə görə, məhkəmə və digər orqanların qərarlarının icrası ilə əlaqədar icra məmurlarının tələblərini yerinə yetirməyən, onlara həvalə edilmiş vəzifələrin icrasına mane olan şəxslər Azərbaycan Respublikasının qanunvericiliyi ilə nəzərdə tutulmuş qaydada məsuliyyət daşıyırlar. «İnsan hüquqlarının və əsas azadlıqlarının müdafiəsi haqqında» Avropa Konvensiyasının 6-cı maddəsi (ədalətli məhkəmə araşdırması hüququ) məhkəmə qərarlarının icrası prosedurunu da əhatə edir. İnsan Hüquqları üzrə Avropa Məhkəməsi «Hornsbi Yunanıstana qarşı» işdə bu prinsipi belə vurğulamışdır: «....Razılığa gələn Dövlətlərin daxili hüquq sistemləri məcburi qüvvəyə malik yekun məhkəmə qərarının tərəflərdən birinin ziyanına olaraq icra olunmadan qalmasına yol versəydi, 6-cı maddə ilə təmin olunan məhkəməyə müraciət hüququ xəyali hüquq olardı». “İcra haqqqında” Qanunun 23.3-cü maddəsinə əsasən icra sənədinin qaytarılması bu Qanunun 23.1-ci maddəsində nəzərdə tutulan əsaslar aradan qalxdıqdan sonra tələbkar müraciət etdikdə sənəd yenidən icraya yönəldilir. Bu Qanunun 23.1-ci maddəsində nəzərdə tutulan əsaslar aradan qalxdıqdan sonra tələbkar icra sənədinin icrası üçün yenidən aidiyyəti icra qurumuna müraciət edə bilər. Bu hallarda icra qurumu icra sənədini icraata qəbul etməli və bu Qanunla nəzərdə tutulan tədbirləri görməlidir. Beləliklə, məhkəmə hesab edir ki, Bərdə rayon İcra və Probasiya Şöbəsinin icra məmuru Sahil İsbəndiyarovun xx.xx.2021-ci il tarixli icra sənədinin məhkəməyə qaytarılması haqqında qərarı ləğv edilməli, Bərdə Rayon Məhkəməsinin 2(021)-1199/2011 nömrəli, xx.xx.2011-ci il tarixli icra sənədi yenidən icraya yönəldilməlidir. Göstərilənlərə əsasən və MPM-in 263-264, 266-269-cu maddələrini rəhbər tutaraq, məhkəmə QƏRARA ALDİ: Ərizə təmin edilsin. Bərdə rayon İcra və Probasiya Şöbəsinin icra məmuru Sahil İsbəndiyarovun xx.xx.2021-ci il tarixli icra sənədinin məhkəməyə qaytarılması haqqında qərarı ləğv edilsin. Bərdə rayon Məhkəməsinin 2(021)-1199/2011 nömrəli, xx.xx.2011-ci il tarixli icra sənədi yenidən icraya yönəldilsin. Qərardadın surəti tərəflərə göndərilsin. Qərardaddan rəsmi qaydada verildikdən sonra 10 gün müddətinə yazılı şəkildə qərardadı qəbul edən məhkəməyə şikayət verilə bilər. Hakim: Fuad Babaşov