Bərdə Rayon Məhkəməsi Qərardad — İş №8(021)-97/2024

Azərbaycan Respublikası adından QƏRARDAD Bərdə rayonu İş № 8(021)-97/2024 04.03.2024 BƏRDƏ RAYON MƏHKƏMƏSİ Hаkim X3 оğlunun sədrliyi, X1 iclas kаtibliyi ilə, "xxxx" Açıq Səhmdar Cəmiyyətinin icra sənədinin yenidən icraya yönəldilməsinə dair müraciətinə və ona əlavə edilmiş sənədlərə açıq məhkəmə iclasında baxaraq, məhkəmə M ü ə y y ə n e t d i: "xxxx" Açıq Səhmdar Cəmiyyəti məhkəməyə müraciət edərək icra qurumu tərəfindən qəbul olunmuş qərarın ləğv olunmasına və icra sənədini yenidən Yevlax Rayon İcra və Probasiya şöbəsinə göndərilməsinə dair göstəriş verilməsini xahiş etmişdir. Məhkəmə müraciəti və ona əlavə edilmiş sənədləri nəzərdən keçirib belə hesab edir ki, aşağıda göstərilənlərə əsasən müraciət geri qaytarılmalıdır. Belə ki, müraciətdən və ona əlavə edilmiş sənədlərdən görünür ki, ərizə Azərbaycan Respublikası MPM-nin 149-cu maddəsinin tələbləri pozulmaqla tərtib edilmiş, ərizədə tərəflərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı göstərilməmişdir. Bundan başqa müraciətə Bərdə Rayon Məhkəməsinin xx.xx.2017-ci il tarixli, 2(021)- 2480/2017 saylı icra sənədinin icra məmuru tərəfindən qaytarılması və hazırda qeyd olunan icra sənədinin müvafiq İcra və Probasiya Şöbəsinin icraatında olmaması barədə sənəd əlavə edilməmişdir. Azərbaycan Respublikasının MPM-nin: 149.2.2-ci maddəsinə görə, iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) göstərilməlidir. 152.1 və 152.1.1-ci maddələrinə görə, iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə hakim iddia ərizəsini və ona əlavə edilmiş geri qaytarır. 152.2-ci maddəsinə əsasən, iddia ərizəsinin qaytarılması haqqında hakim qərardad çıxarır. 152.3-cü maddəsinə əsasən, iddia ərizəsinin qaytarılması haqqında qərardaddan şikayət verilə bilər. Qərardad ləğv edildikdə, iddia ərizəsi məhkəməyə müraciət edildiyi gündən verilmiş hesab edilir. 152.4-cü maddəsinə görə, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. İstinad edilən qanunvericilik normalarının tələblərinə əsasən "xxxx" Açıq Səhmdar Cəmiyyətinin icra sənədinin yenidən icraya yönəldilməsinə dair müraciəti geri qaytarılmalıdır. "xxxx" Açıq Səhmdar Cəmiyyətinə izah edilir ki, qeyd olunan nöqsanları aradan qaldırdıqdan sonra eyni tələblə yenidən məhkəməyə müraciət edə bilər. Şərh olunanlara əsasən və MPM-in 149-152-ci maddələrini rəhbər tutaraq, məhkəmə Qərara aldı: "xxxx" Açıq Səhmdar Cəmiyyətinin Bərdə Rayon Məhkəməsinin xx.xx.2017-ci il tarixli, 2(021)-2480/2017 saylı icra sənədinin yenidən icraya yönəldilməsinə dair müraciəti geri qaytarılsın. Qərardaddan rəsmi qaydada verildikdən sonra 10 gün müddətində yazılı şəkildə qərardadı qəbul edən məhkəməyə şikayət verilə bilər. Sədrlik edən: Gündüz Abbasov