Xızı Rayon Məhkəməsi Qərardad — İş №8(068)-6/2025

Azərbaycan Respublikası adından QƏRARDAD Xızı rayonu İş № 8(068)-6/2025 18.02.2025 XIZI RAYON MƏHKƏMƏSİ X6 Hidayət oğlunun sədrliyi, Mustafayev Mahir Xeyrulla oğlunun katibliyi ilə, Xızı rayon İcra və Probasiya şöbəsinin icra məmuru İsmayıl Babayevin təqdimatına açıq məhkəmə iclasında baxaraq, məhkəmə müəyyən etdi: Xızı rayon İcra və Probasiya şöbəsinin icra məmuru İsmayıl Babayev təqdimatla məhkəməyə müraciət edərək, Xızı Rayon Məhkəməsinin 29 iyun 2022-ci il tarixli, 2(068)- 41/2022 nömrəli icra sənədinin icra olunması üçün Xızı rayonu, Giləzi qəsəbəsində yaşayan Borclu icra yerinə, Xızı rayon İcra və Probasiya şöbəsinə məcburi qaydada gətirilməsi barədə qərardad çıxarılmasını məhkəmədən xahiş etmişdir. Təqdimat əlavə edilmiş sənədlərlə onunla əsaslandırılmışdır ki, 06 iyul 2022-ci il tarixli qərarla icraata başlanılmış, Borclu 22 mart 2014-cü il təvəllüdlü X2, 30 iyun 2015-ci il təvəllüdlü X3 və 25 sentyabr 2016-cı il təvəllüdlü X1 yetkinlik yaşına çatana qədər saxlanmaları üçün hər ay hər uşağa görə 130 manat olmaqla, cəmi 390 (üç yüz doxsan) manat sabit pul məbləğində alimentin tutularaq Tələbkar xeyrinə tutulmasına dair Xızı Rayon Məhkəməsinin 29 iyun 2022-cü il tarixli, 2(068)-41/2022 nömrəli icra sənədi icra olunması üçün Xızı rayon İcra və Probasiya şöbəsinə daxil olmuşdur. Borclu icra sənədini icra etməsi üçün rəsmi qaydada xəbərdarlıq olunmasına baxmayaraq heç bir üzrlü səbəb olmadan borcunu ödəmir və icra məmurunun çağırışlarına gəlməkdən boyun qaçırır. Ona görə də, şöbənin icra məmuru təqdimatın təmin edilməsinə dair qərardad çıxarılmasını xahiş etmişdir. Məhkəmə iş materiallarını araşdırıb hesab edir ki, təqdimat aşağıdakı əsaslara görə təmin edilməlidir. Belə ki, işdən göründüyü kimi Xızı Rayon Məhkəməsinin 29 iyun 2022-cü il tarixli, 2(068)-41/2022 nömrəli icra sənədi icra olunması üçün aidiyyəti üzrə icra şöbəsinə daxil olmuş, icra məmuru tərəfindən 06 iyul 2022-ci il tarixli qərarla icraata başlanılmış, tələbin dərhal könüllü icra edilməsi üçün borcluya xəbərdarlıq edilmiş, lakin tələb könüllü icra edilməmişdir. Həmçinin, borclu çağırış üzrə icra sənədinin icrası yerinə qəsdən gəlməmişdir. Tələb könüllü icra edilmədiyindən müvafiq icra tədbirləri görülmüş, icra məmuru tərəfindən 07 noyabr 2024-cü il tarixdə borclunun məcburi gətirilməsi barədə qərar qəbul etmiş, qərar İcra və Probasiya şöbəsinin rəisi tərəfindən təsdiq olunmuşdur. Beləliklə, məhkəmədə müəyyən edildi ki, barəsində məcburi gətirilmənin tətbiq olunması xahiş edilən şəxs icra məmurunun çağırışı ilə gəlməkdən, icra hərəkətlərinin həyata keçirildiyi yerə gəlməkdən üzrsüz səbəbdən yayınır. Ona görə də, təqdimat təmin edilməlidir. "İcra haqqında" Azərbaycan Respublikası Qanunun 84.2-ci maddəsinə əsasən icra məmurunun çağırışı ilə gəlməkdən və ya icra hərəkətlərinin həyata keçirildiyi yerə gəlməkdən üzrsüz səbəbdən yayınan şəxslər barəsində məhkəmənin qərarı əsasında məcburi gətirilmə tədbiri tətbiq olunur. Yuxarıda göstərilənlərə və Azərbaycan Respublikası MPM-nin 263-264, 266-268-ci maddələrinə əsasən məhkəmə qərara aldı: Təqdimat təmin edilsin. Xızı rayonu, Giləzi qəsəbəsində yaşayan Borclu Xızı Rayon Məhkəməsinin 29 iyun 2022-ci il tarixli, 2(068)-41/2022 nömrəli icra sənədinin icrası ilə əlaqədar Xızı rayon İcra və Probasiya şöbəsinə məcburi qaydada gətirilsin. Qərardadın icrası Xızı rayon İcra və Probasiya şöbəsinə və Xızı RPŞ-yə həvalə edilsin. Qərardaddan tərəfə təqdim edildikdən və ya tərəf onu aldıqdan sonra 10 gün müddətində “Elektron məhkəmə” informasiya sistemində yaradılan elektron kabinet vasitəsilə Xızı Rayon Məhkəməsinə şikayət verilə bilər. Hakim: İlqar Cabbarov