Naxçıvan MR Naxçıvan Şəhər Məhkəməsi Qərardad — İş №8(078)-111/2025

Azərbaycan Respublikası adından QƏRARDAD Naxçıvan şəhəri İş № 8(078)-111/2025 08.04.2025 NAXÇIVAN MR NAXÇIVAN ŞƏHƏR MƏHKƏMƏSİ Mən, Naxçıvan Şəhər Məhkəməsinin hakimi Əliyeva Gülsüm Kamal qızı X1 qətnamənin hissə-hissə icra edilməsi tələbinə dair ərizəsini nəzərdən keçirərək, müəyyənetdim: X2 ərizə ilə Naxçıvan Şəhər Məhkəməsinə müraciət edərək qeyd etmişdir ki, Naxçıvan Şəhər Məhkəməsinin 14 mart 2025-ci il tarixli, 2(078)-416/2025 nömrəli qətnaməsi üzrə xx.xx.2024 tarixli RGTK8107867B500 saylı müqaviləyə əsasən ondan "xxxx" Açıq Səhmdar Cəmiyyətinin xeyrinə 10385.67 manat əsas borc 367.79 manat faiz borcu olmaqla cəmi 10753.46 manat borcun və dövlət rüsumu olaraq ödənilmiş 122.26 manat məbləğində vəsaitin tutulması qət edilmişdir. Hazırda işsizdir. Yalnız həyat yoldaşı işləyir. O hərbi qulluqçudur. Himayəsində bir yetkinlik yaşına çatmayan övladı var. Bu günkü gün kredit öhdəliyini ödəməyə maddi imkanı çatmır. O yalnız ayda 300 (üç yüz) manat ödəniş edə bilər. Qeyd edir ki, o uzun müddət dövlət qulluqçusu kimi NMR Kənd Təsərrüfatı Nazirliyinin baş məsləhətçi-hüquqşünası kimi fəaliyyət göstərmişdir. İşlə təmin olunan kimi kredit ödənişini də vaxtında icra edəcəkdir. Ərizəni və ona əlavə edilmiş sənədləri qanunvericiliyin tələbləri daxilində nəzərdən keçirən məhkəmə aşağıdakıları qeyd edir: Ərizənin giriş hissəsində X2 özünün prosessual statusunu qeyd etməmişdir. Eyni zamanda tələbkarın adını, yerləşdiyi ünvanı da ərizədə göstərməmişdir. Bununla bağlı məhkəmə hesab edir ki, ərizədə borclunun və tələbkarın yuxarıda qeyd olunan məlumatlarının göstərilməməsi onların məhkəmə iclasında iştirakının təmin olunması və qanunvericiliklə müəyyən edilmiş hüquqlardan istifadə edilməsinin təmin olunmasına çətinlik yaradır. Həmçinin borclu özünün faktiki yaşadığı ünvanı da ərizədə göstərməmiş, yalnız qeydiyyatda olduğu ünvanı qeyd etmişdir. “İcra haqqında” Azərbaycan Respublikası Qanununun 1.1-ci maddəsinə əsasən, icra haqqında Azərbaycan Respublikasının qanunvericiliyi Azərbaycan Respublikası Konstitusiyasından, bu Qanundan, “İcra məmurları haqqında” Azərbaycan Respublikası Qanunundan, Azərbaycan Respublikasının Mülki Prosessual Məcəlləsindən, habelə digər qanunvericilik aktlarından ibarətdir. Azərbaycan Respublikası Mülki-Prosessual Məcəlləsinin 13.4-cü maddəsinə əsasən, mübahisə edilən hüquq münasibətlərini tənzimləyən hüquq norması olmadıqda, məhkəmə analoji münasibətləri tənzimləyən hüquq normalarına müraciət edir. Məhkəmə qeyd edir ki, icra icraatı qaydasında verilmiş ərizənin geri qaytarılmasının hüquqi həlli ilə bağlı Azərbaycan Respublikası “İcra haqqında” Qanunu və Azərbaycan Respublikası Mülki-Prosessual Məcəlləsində müvafiq prosessual hüquq norması olmadığından, həmin Qanunun 1.1-ci və Mülki-Prosessual Məcəllənin 13.4-cü maddələrinin tələbini nəzərə almaqla həmin Məcəllənin iddia ərizəsinin geri qaytarılmasını nizamlayan hüquq normaları tətbiq olunmalıdır. Azərbaycan Respublikası Mülki-Prosessual Məcəlləsinin 149.2 və 149.2.2-ci maddələrinə əsasən ərizədə iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) göstərilməlidir. Azərbaycan Respublikası Mülki-Prosessual Məcəlləsinin 151.1-ci maddəsinə əsasən, iddia ərizəsi Bu Məcəllənin tələblərinə riayət edilməklə verildikdə, onun məhkəmə icraatı mümkündür. Azərbaycan Respublikası Mülki-Prosessual Məcəlləsinin 152.1 və 152.1.1-ci maddələrinə müvafiq olaraq, iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə, hakim iddia ərizəsini və ona əlavə edilmiş sənədləri geri qaytarır. Həmçinin “İcra haqqında” Azərbaycan Respublikası Qanununun 15-ci maddəsinə əsasən tərəflər icra sənədinin icrasına möhlət verilməsi və ya onun hissə-hissə icrası yaxud icra sənədinin icrası üsulunun və qaydasının dəyişdirilməsi haqqında işə baxmış məhkəməyə müraciət edə bilərlər. Qeyd edilən qanun normasına əsaslanaraq məhkəmə X1 diqqətinə çatdırır ki, hazırda hissə-hissə icra edilməsini istədiyi Naxçıvan Şəhər Məhkəməsinin 14 mart 2025-ci il tarixli, 2(078)-416/2025 nömrəli qətnaməsi qanuni qüvvəyə minməmiş, icraya yönəldilməmiş və icra sənədi mövcud deyildir. Beləliklə, məhkəmə ərizəni araşdırıb hesab edir ki, X1 qətnamənin hissə-hissə icra edilməsi tələbi barədə ərizəsi qanunvericiliyin tələblərinə əməl edilmədən verildiyi üçün geri qaytarılmalıdır. Yuxarıda göstərilənlərə əsasən və Azərbaycan Respublikası MPM-nin 152.2, 152.3, 263, 264, 267 və 268-ci maddələrini rəhbər tutaraq, q ə r a r a a l d ı m: X1 qətnamənin hissə-hissə icra edilməsi tələbi barədə ərizəsi və ona əlavə edilmiş sənədlər geri qaytarılsın. Qərardaddan, o tərəfə rəsmi qaydada verildikdən sonra 10 gün müddətində Naxçıvan Şəhər Məhkəməsinə şikayət verilə bilər. Hakim: Gülsüm Əliyeva.