Bakı Apellyasiya Məhkəməsi Qərardad — İş №8(103)-40/2021

Azərbaycan Respublikası adından QƏRARDAD Bakı şəhəri İş № 8(103)-40/2021 29.01.2021 BAKI APELLYASİYA MƏHKƏMƏSİ Bakı Apelyasiya Məhkəməsinin Mülki Kollegiyası, hakimlər Namiq Cəfərov (sədrlik edən), Xəyal Sarıyev və Vüsalə Baxışovadan ibarət tərkibdə, Nərgiz Qasımovanın katibliyi, Tələbkar iştirakı ilə, Borclu tərəfindən verilmiş “Bakı Apelyasiya Məhkəməsinin 2(103)-10025/2017 nömrəli iş üzrə xx.xx.2017-ci il tarixli qətnaməsinin hissə-hissə icra edilməsi barədə” ərizəsinə dair iş üzrə Suraxanı Rayon Məhkəməsinin xx.xx.2020-ci il tarixli qərardadından Borclu tərəfindən verilmiş şikayət açıq məhkəmə iclasında baxaraq müəyyən etdi: Məhkəmə qətnaməsinə görə Borclu Tələbkar xeyrinə 23.300 ABŞ dolları pul tutulmalıdır. Borclu ərizə ilə məhkəməyə müraciət edərək xahiş etmişdir ki, qətnamənin hissə-hissə icra edilməsi barədə qərardad qəbul edilsin. Borclu ərizəni onunla əsaslandırmışdır ki, maddi vəziyyəti həmin pul məbləğini birdəfəyə ödəməyə imkan vermir. 1-ci instansiya məhkəməsinin qərardadı ilə qərara alınıb ki, ərizə təmin edilməsin. Borclu həmin qərardaddan şikayət verərək tələb edib ki, qərardad ləğv edilsin. Şikayət əsassızdır. Belə ki, Mülki-Prosessual Məcəllənin 231.1-ci maddəsinə və “İcra haqqında” Qanunun 15-ci maddəsinə görə hakim tərəflərin əmlak vəziyyətinə və digər hallara əsasən məhkəmə aktını hissə-hissə icra etdirməyə haqlıdır. Həmin maddədə qeyd olunan “borclunun əmlak vəziyyəti” və “digər hallar” elə hallardır ki, borcluya məhkəmə aktını birdəfəyə icra etməsi üçün çətinlik yaradır, lakin tələbkarın məhkəmə müdafiəsi hüququnun mahiyyətinə xələl gətirmir. Hazırkı işdə borclunun əmlak vəziyyəti əsas tutulmaqla məhkəmə qətnaməsinin hissə-hissə icra edilməsi qərara alınarsa, bu hal tələbkarın məhkəmə müdafiəsi hüququnun mahiyyətinə xələl gətirəcək. Beləliklə, 1-ci instansiya məhkəməsi düzgün nəticəyə gəlib, qərardadın ləğv edilməsi üçün əsas yoxdur. Yuxarıda göstərilənlərə əsasən və Mülki-Prosessual Məcəllənin 397 və 398-ci maddələrinin göstərişlərini rəhbər tutaraq, məhkəmə qərara aldı: Şikayət təmin edilməsin. Hazırkı iş üzrə Suraxanı Rayon Məhkəməsinin xx.xx.2020-ci il tarixli qərardadı dəyişdirilmədən saxlanılsın. Qərardaddan kassasiya şikayəti verilə bilməz. Qərardad çıxarıldığı andan qanuni qüvvəyə minir.