Abşeron Rayon Məhkəməsi Qərardad — İş №8(5-105)-195/2026

Azərbaycan Respublikası adından QƏRARDAD Xırdalan şəhəri İş № 8(5-105)-195/2026 23.02.2026 ABŞERON RAYON MƏHKƏMƏSİ Mən, Abşeron Rayon Məhkəməsinin hakimi Habil Yunis oğlu Əhmədov X1 qətnaməyə izah verilməsinə dair ərizəsinə baxaraq MÜƏYYƏN ETDİM : X2 qətnaməyə izah verilməsinə dair ərizə ilə Abşeron Rayon Məhkəməsinə müraciət edərək, qətnaməyə izah verilməklə sözügedən mənzilin təhvil verilməsinin Abşeron rayon icra şöbəsi tərəfindən də icra olunmasını ehtiva etməsini əks etdirməsini xahiş etmişdir. Məhkəmə ərizəni araşdırıb hesab edir ki, ərizə Azərbaycan Respublikası Mülki Prosessual Məcəlləsinin (bundan sonra Mülki Prosessual Məcəllə adlanacaq) 149 və 151ci maddələrinin, eyni zamanda, “İcra haqqında Azərbaycan Respublikası Qanunu”nun (bundan sonra İcra haqqında Qanun adlanacaq) 84.3-cü maddəsinin tələblərinə cavab vermədiyindən geri qaytarılmalıdır. Mülki Prosessual Məcəllənin 13.4. maddəsinə əsasən, barəsində mübahisə edilən hüquq münasibətlərini tənzimləyən hüquq norması olmadıqda məhkəmə analoji münasibətləri tənzimləyən hüquq normalarına müraciət edir. Bu səbəbdən də, məhkəmə qanunun tələblərinə istinad edərək, tələbkar tərəfindən verilmiş ərizənin geri qaytarılması əsası olaraq, analoji münasibətləri tənzimləyən hüquq normalarına müraciət etmək qənaətinə gəlir. Azərbaycan Respublikası Mülki Prosessual Məcəlləsinin: 149.2.3. maddəsinə əsasən iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb ərizədə göstərilməlidir. 149.2.5. maddəsinə əsasən iddia ərizəsi verilərkən forma və məzmunda göstərilnlərdən biri də ərizəyə əlavə edilən sənədlərin siyahısıdır. 150.1.1. maddəsinə əsasən iddia ərizəsinə əlavə edilmiş sənədlər siyahısına daxildircavabdehlərin və üçüncü şəxslərin sayına görə iddia ərizəsinin surətləri (iddia ərizəsi elektron formada verildiyi hal istisna olmaqla); 151.1 maddəsinə əsasən, iddia ərizəsi bu Məcəllənin tələblərinə riayət edilməklə verildikdə onun məhkəmə icraatı mümkündür. 152.1.1. maddəsinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə hakim iddia ərizəsini və ona əlavə edilmiş sənədləri geri qaytarır. 152.4. iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. İddia ərizəsindən göründüyü kimi iddiaçı məhkəməyə iddia ərizəsi ilə müraciət etmiş, lakin iddia ərizəsinə sübutların siyahısı əlavə edilməmişdir. Beləliklə də, iddia ərizəsinin verilməsinin forma və məzmununa riayət edilməmişdir. İşin faktiki hallarından göründüyü kimi tələbkar məhkəməyə yalnız ərizə ilə müraciət etmiş, izah edilməsi tələb edilən qətnamə, sözügedən icra vərəqi və digər lazımi sənədləri, həmçinin sənədlərin siyahısı işə əlavə etməmişdir. Beləliklə ərizənin verilməsinin forma və məzmununa riayət edilməmişdir. Yuxarıda sadalananlara əsasən məhkəmə hesab edir ki, təqdimatın formasına riayət edilmədiyindən geri qaytarılmalıdır. Azərbaycan Respublikası Mülki– Prosessual Məcəlləsinin 35.1, 152.1.3, 263, 264, 267 və 268-ci maddələrini rəhbər tutaraq, QƏRARA ALDİM : X1 qətnaməyə izah verilməsinə dair ərizəsi geri qaytarılsın. Nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan rəsmi qaydada verildikdən sonra 10 (on) gün müddətində (“Elektron məhkəmə” informasiya sistemində yaradılan elektron kabinet vasitəsilə) Abşeron Rayon Məhkəməsinə şikayət verilə bilər. Hakim: Habil Əhmədov