Bakı şəhəri Qaradağ Rayon Məhkəməsi Qərardad — İş №8(5-96)-116/2026

Azərbaycan Respublikası adından QƏRARDAD Bakı şəhəri İş № 8(5-96)-116/2026 25.02.2026 BAKI ŞƏHƏRİ QARADAĞ RAYON MƏHKƏMƏSİ Bakı şəhəri Qaradağ Rayon Məhkəməsinin hakimi Əsədov Kamran Bağır oğlu, Borclu qətnamənin hissə-hissə icra edilməsi barədə ərizəsini məhkəmənin binasında nəzərdən keçirərək, MÜƏYYƏN ETDİ: Borclu qətnamənin hissə-hissə icra edilməsi barədə ərizə ilə Bakı şəhəri Qaradağ Rayon Məhkəməsinə müraciət etmişdir. Ərizəni nəzərdən keçirərək hesab edirəm ki, aşağıdakı əsaslara görə ərizə geri qaytarılmalıdır. Belə ki, Azərbaycan Respublikası Mülki Prosessual Məcəlləsinin 152.1 və 152.1.1-ci maddələrinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə hakim iddia ərizəsini və ona əlavə olunmuş sənədləri geri qaytarır. Məhkəmə tərəfindən müəyyən edilmişdir ki, Borclu Azərbaycan Respublikası Mülki Prosessual Məcəlləsinin 152.1 və 152.1.1-ci maddələrinə əsasən ərizənin bu Məcəllənin 149-cu maddəsi ilə müəyyən olunmuş formasına və məzmununa riayət etməmişdir. Belə ki, borclunun təqdim etdiyi ərizədə hansı məhkəmə qətnaməsi üzrə borcun hissə-hissə icra edilməsinin xahiş olunduğu qeyd edilməmişdir. Bununla yanaşı, ərizənin məzmunundan borlunun ödəmə qrafikinin tərtib edilməsini xahiş etdiyi anlaşılsa da, borcun məbləği, ödənişlərin müddətləri və digər zəruri hallar göstərilməmiş, tələb konkretləşdirilməmişdir. Belə olan halda ərizə və ona əlavə olunmuş sənədlər mümkün hesab edilmir və geri qaytarılmalıdır. Azərbaycan Respublikası Mülki Prosessual Məcəlləsinin 152.4-cü maddəsinə əsasən iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Şərh edilənlərə əsasən və Azərbaycan Respublikası Mülki Prosessual Məcəlləsinin 149, 150.0.1,152.2.4, 263-264, 266-267-ci maddələrini rəhbər tutaraq, QƏRARA ALDİ: Borclu qətnamənin hissə-hissə icra edilməsi barədə ərizəsi geri qaytarılsın. Borclu izah edilsin ki, ərizənin qaytarılması nöqsanları aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan rəsmi qaydada verildikdən sonra tərəflər 10 (on) gün müddətində işə baxan Bakı şəhəri Qaradağ Rayon Məhkəməsinə şikayət verə bilərlər. Hakim: Kamran Əsədov