Bakı şəhəri Qaradağ Rayon Məhkəməsi Qərardad — İş №8(5-96)-67/2026

Azərbaycan Respublikası adından QƏRARDAD Bakı şəhəri İş № 8(5-96)-67/2026 11.02.2026 BAKI ŞƏHƏRİ QARADAĞ RAYON MƏHKƏMƏSİ Hakim Əbilov Qamət Mehman oğlunun sədrliyi, Məhkəmə iclas katibi X3, Tələbkar iştirakı ilə, Bakı şəhəri Qaradağ Rayon Məhkəməsinin xx.xx.2023-cü il tarixli 2(002)-211/2023 saylı qətnaməsinin hissə-hissə icra edilməsi barədə borclu X1 ərizəsinə açıq məhkəmə iclasında baxaraq məhkəmə MÜƏYYƏN ETDİ: Borclu X2 ərizə ilə məhkəməyə müraciət edərək, qətnamənin hissə-hissə ayda 1000 manat olmaq icra edilməsi barədə qərardad qəbul edilməsini xahiş etmişdir. Borclu ərizəni onunla əsaslandırmışdır ki, iddiaçı Tələbkar ona, yəni Borclu qarşı “borc” tələbinə dair iddia ərizəsi ilə məhkəməyə müraciət etmişdir. Qaradağ rayon Məhkəməsi verilən iddia tələbinə baxaraq xx.xx.2023-cü il tarixli 2(002)-211/2023 saylı qətnamə qəbul edərək iddiaçı Tələbkar vermiş olduğu iddia tələbini qismən təmin edərək hesablanmış 1167 manat faiz borcu olmaqla cəmi 18667 manat məbləğində borc pul tutulmuşdur. İddia tələbinin təmin edilmiş hissəsinə mütənasib olaraq 146 manat məbləğində dövlət rüsumu cavabdehə aid edilmişdir. Qaradağ Rayon Məhkəməsinin 2(002)-211/2023 saylı qətnaməsi qüvvəyə mindikdən sonra icra edilməsi üçün Qaradağ icra şöbəsinə göndərilmişdir. Məhkəmə qətnaməsi icra edilməsi üçün Qaradağ icra şöbəsinə göndərilsə də, onun imkanı olmadığına görə həmin pulu birdəfəlik verə bilmir. Qətnamənin qəbul edilərək icra olunması üçün göndərilməsindən 2 (iki) ildən çox vaxt keçməsinə baxmayaraq onun başı istintaqa qarışdığı üçün puldan qaytara bilməmişdir. Çünki, buna maddi imkanı yol vermir. Hazırda təzə azadlığa buraxıldığı üçün səhətində yaranan problemlərlə əlaqədar heç yerdə işləmir. Hər hansı bir yerdən qazancı da gəlmir. Elə bir əmlakı, nəqliyyat vasitəsi də yoxdur ki, satıb verə. Onun himayəsində az yaşlı uşağı var. Ailədə bir oğlu işləyir. O, da yeməyini və komunal xərclərini güclə ödəyir. Məhz bu səbəbdən iddiaçıya borclu olduğu pulu birdəfəlik ödəyə bilmir. Lakin bu o demək deyil ki, o iddiaçı Tələbkar olan borcunu ödəməyəcəyək və yaxud yayınır əsla! Abşeron rayon məhkəməsinin qərarı ilə xx.xx.2024-cü il tarixdən xx.xx.2025-ci il tarixədək həbsdə saxlanmışdır. Sumqayıt Ağır cinayətlər məhkəməsinin hökmü ilə təqsirliliyi sübuta yetmədiyi üçün xx.xx.2025-cil tarixdə bəraət alaraq barəsində seçilmiş həbs qətimkan tədbiri ləğv edilərək həbsdən azad olunmuşdur. Belə ki, qətnaməni icra etməyə nə vaxtı nə də imkanı olmuşdur. Tələbkar məhkəmə iclasında iştirak edərək ərizənin təmin olunmamasını xahiş etdi. Borcluya məhkəmə iclasının vaxtı və yeri barədə qanunla müəyyən olunmuş qaydada məlumat verilməsinə baxmayaraq, o məhkəmə iclasına gəlməmiş və məhkəməyə gəlməmələrinin səbəbləri barədə hər hansı məlumat verməmişdir. Azərbaycan Respublikası Mülki Prosessual Məcəlləsinin 231.2-ci maddəsinə əsasən işdə iştirak edən şəxslər iclasın vaxtı və yeri haqqında xəbərdar edilirlər, lakin onların gəlməməsi məhkəmə qarşısında qoyulmuş məsələnin həll edilməsinə mane olmur. Məhkəmə ərizəni nəzərdən keçirərək hesab edir ki, ərizə əsassız olduğundan təmin edilməməlidir. Belə ki, “İcra haqqında” Azərbaycan Respublikası Qanununun 15-ci maddəsinə əsasən tərəflər icra sənədinin icrasına möhlət verilməsi və ya onun hissə-hissə icrası yaxud icra sənədinin icrası üsulunun və qaydasının dəyişdirilməsi haqqında işə baxmış məhkəməyə müraciət edə bilərlər. Borclunun əmlak vəziyyətini və digər halları nəzərə alaraq, məhkəmə həmin müraciətlərə Azərbaycan Respublikasının Mülki Prosessual Məcəlləsinin 231-ci maddəsi ilə müəyyən edilmiş qaydada baxır. Azərbaycan Respublikası Mülki Prosessual Məcəlləsinin 231.1-ci maddəsinə əsasən işə baxmış hakim işdə iştirak edən şəxslərin ərizəsi üzrə tərəflərin əmlak vəziyyətinə və digər hallara əsasən qətnamənin icrasına möhlət verməyə və ya qətnaməni hissə-hissə icra etdirməyə, habelə onun icra üsulunu və qaydasını dəyişdirməyə haqlıdır. “Məhkəmə qətnaməsi haqqında” Azərbaycan Respublikasi Ali Məhkəməsinin Plenumunun 24 noyabr 2005-ci il tarixli qərarında qeyd edilir ki, məhkəmələr nəzərə almalıdırlar ki, qətnamənin icrasına möhlət verilməsi və ya onun hissə-hissə icra edilməsi, qətnamənin icra üsulunun və qaydasının dəyişdirilməsi müstəsna hal olub, qətnamənin icrası üçün çətinlik törədən və yaxud borclu üçün yaranmış əlverişsiz hallarda tətbiq oluna bilər. Məhkəmələr bu məsələləri həll etdikdə təkcə borclunun deyil, tələbkarın mənafeyini də nəzərə almalıdırlar. Ali Məhkəmənin “İcra vərəqəsinin verilməsi və icrası ilə əlaqədar məhkəmə təcrübəsinin bəzi məsələləri barədə” xx.xx.2003-cü il tarixli Qərarına əsasən, qətnamənin icra edilməsinə möhlət verilməsi, hissə-hissə icra edilməsi, qətnamənin icra üsulunun və qaydasının dəyişdirilməsi, icra üzrə icraatın dayandırılması və borclunun ölkədən getmək hüququnun müvəqqəti məhdudlaşdırılması məsələləri yalnız birinci instansiya qaydasında işə baxan məhkəmələr tərəfindən həll edilir. Qanunvericiliyin tələblərindən aydın olur ki, hissə-hissə icra barədə ərizə verən şəxsin əmlak vəziyyətinin həmin aktın icrasına maneə törədəcək şəkildə aşağı olmasının müəyyən edilməsindən asılı olduğu qədər, həm də onun təklif etdiyi icra qaydası tələbkarın da hüquqlarını pozmamalı və məhkəmə aktının real icrasını təmin etməli, tələbkarın icranın qısa müddət ərzində təmin olunmasına dair qanuni mənafeyi mütləq nəzərə alınmalıdır. Məhkəmə hesab edir ki, borclunun təklif etdiyi icra qaydası həmin meyara cavab vermir. Belə ki, borclunun ərizədə göstərilən dəlillərinə nəzərən icra sənədinin icra olunmaması nəticəsində tələbkarın məruz qaldığı məhrumiyyətlər nisbətdə daha ciddi olması hazırkı icra sənədi üzrə icra işin materiallarına əsasən müəyyən edilir. Belə ki, icra sənədi üzrə 10.000 manatdan çox borc məbləği ödənilməmiş qalmaqla, borclu həmin məbləği hazırda ödəmək imkanında olmadığını məhkəmə iclasında bildirmişdir. Azərbaycan Respublikası Konstitusiyasının 129-cu maddəsinə əsasən, məhkəmənin qəbul etdiyi qərarlar dövlətin adından çıxarılır və onların icrası məcburidir. Əgər məhkəmə qərarları hər hansı bir səbəblə icra edilmirsə, o zaman, ədalət mühakiməsinin məqsədlərinə nail olunmasından söhbət gedə bilməz. İnsan Hüquqları üzrə Avropa Məhkəməsi “Hornsbi Yunanıstana qarşı” işdə bu prinsipi belə vurğulamışdır: “....Razılığa gələn Dövlətlərin daxili hüquq sistemləri məcburi qüvvəyə malik yekun məhkəmə qərarının tərəflərdən birinin ziyanına olaraq icra olunmadan qalmasına yol versəydi, 6-cı maddə ilə təmin olunan məhkəməyə müraciət hüququ xəyali hüquq olardı”. Həmin Məhkəmənin “Əfəndiyeva Azərbaycana qarşı” və “Tarıverdiyev Azərbaycana qarşı” qərarları da məhz məhkəmə qərarlarının icra edilməməsi ilə bağlı qəbul edilmiş və Məhkəmə qeyd etmişdir ki, məhkəmə qərarının icra olunması İnsan hüquqları haqqında Avropa Konvensiyasının 6-cı maddəsində təsbit olunmuş ədalətli məhkəmə araşdırması hüququnun ayrılmaz tərkib hissəsi kimi nəzərdən keçirilməlidir. Məhkəmə araşdırması zamanı müəyyən olunmuşdur ki, borclu hissə-hissə icra olunmaya dair tələbini müvafiq məbləği birdəfəlik ödəmək iqtidarında olmaması kimi hallarla əlaqələndirsə də, istinad etdiyi həmin hallara hər hansı sübutu məhkəməyə təqdim etməmiş, uzun müddət keçməsinə baxmayaraq məhkəmə qətnaməsini icra etməmişdir. Bununla da, məhkəmə tərəfindən borclu tərəfindən müvafiq icra icraatına çətinlik törədən və ya borclu üçün yaranmış əlverişsiz halların olmasına, başqa sözlə qətnamənin hissə-hissə icra olunmasına əsas verən müstəsna halın olmasını, habelə bununla bağlı tələbkarın razılığının olmasını müəyyən etmək mümkün olmamışdır. Ona görə də məhkəmə hesab edir ki, tələbkarın mənafeyi nəzərə alınmaqla borclu tərəfindən verilmiş ərizə təmin edilməməlidir. Beləliklə, məhkəmə qeyd olunan normaları əsas tutaraq, habelə borclu ilə yanaşı tələbkarın mənafeyini nəzərə alaraq, habelə hissə-hissə icra edilmə üçün müstəsna halın olmasının müəyyən edilməməsini əsas götürərək hesab edir ki, borclu X1 qətnamənin hissəhissə icra edilməsi barədə ərizəsi təmin edilməməlidir. Məhkəmə şərh olunanlara əsasən və Azərbaycan Respublikasının Mülki Prosessual Məcəlləsinin 231, 263-264 və 266-268-ci maddələrini rəhbər tutaraq QƏRARA ALDİ: Bakı şəhəri Qaradağ Rayon Məhkəməsinin xx.xx.2023-cü il tarixli 2(002)-211/2023 saylı qətnaməsinin hissə-hissə icra edilməsi barədə borclu X2 tərəfindən verilmiş ərizə təmin edilməsin. Qərardaddan tərəflərə rəsmi qaydada verildikdən sonra 10 (on) gün müddətində, elektron kabinet vasitəsilə Bakı şəhəri Qaradağ Rayon Məhkəməsinə şikayət verilə bilər. Hakim Qamət Əbilov