Bakı Şəhəri Binəqədi Rayon Məhkəməsi Qərardad — İş №2(001)-3950/2020

Azərbaycan Respublikası adından QƏRARDAD Bakı şəhəri İş № 2(001)-3950/2020 16.07.2020 BAKI ŞƏHƏRİ BİNƏQƏDİ RAYON MƏHKƏMƏSİ Mən, Bakı şəhəri Binəqədi Rayon Məhkəməsinin hakimi Əliyev İlkin Əli oğlu, İddiaçı ərizəsini Bakı şəhəri Binəqədi Rayon Məhkəməsinin inzibatı binasında nəzərdən keçirərək, M Ü Ə Y Y Ə N E T D İ M: İddiaçı ərizə ilə Bakı şəhəri Binəqədi Rayon Məhkəməsinə müraciət edərək, X1 onun evindən qeydiyyatdan çıxarılmasını xahiş etmişdir. İddia ərizəsini nəzərdən keçirərək hesab edirəm ki, iddia ərizəsinin forması və məzmunu Azərbaycan Respublikası Mülki-Prosessual Məcəlləsinin 149-cu maddəsinin tələblərinə riayət edilməklə məhkəməyə verilmədiyindən ərizə və ona əlavə edilmiş sənədlər geri qaytarılmalıdır. Belə ki, iddia ərizəsinin forması və məzmunu barədə Mülki-Prosessual Məcəllənin 149-cu maddəsində izah verilmişdir. Həmin Məcəllənin 150-ci maddəsində iddia ərizəsinə əlavə edilən sənədlərin siyahısı qeyd edilmişdir. Mövcud ərizədən görünür ki, iddia tələbi hər hansı bir iddiaçı tərəfindən və hər hansı bir cavabdehə qarşı qaldırılmamış, ümumiyyətlə iddia ərizəsi formasında məhkəməyə müraciət edilməmiş, məhkəməyə müraciətin prosessual qaydalarına əməl edilməmiş, dövlət rüsumunun ödənilməsi barədə sənəd əlavə edilməmişdir. Mülki-Prosessual Məcəllənin 151.1-ci maddəsinə əsasən iddia ərizəsi bu Məcəllənin tələblərinə riayət edilməklə verildikdə, onun məhkəmə icraatı mümkündür. Həmin Məcəllənin 152.1.1-ci və 152.1.5-ci maddələrinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə, müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə hakim iddia ərizəsini və ona əlavə edilmiş sənədləri geri qaytarır. Göstərilənlərə əsasən məhkəmə hesab edir ki, hazırki ərizə prosessual qanunvericiliklə nəzərdə tutulmuş iddia ərizəsinin forma və məzmununa uyğun məhkəməyə verilmədiyindən ona əlavə edilmiş sənədlərlə birlikdə geri qaytarılmalıdır. MPM-nin 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Bundan başqa məhkəmə ərizəçinin nəzərinə çatdırır ki, şəxsin yaşayış yeri üzrə qeydiyyatdan çıxarılma tələbinə dair işlərə mülki qaydada baxılmır. Analoji mübahisələrə dair işlərdə şəxsin istifadə hüququnun itirilməsi, isifadə hüququna xitam verilməsi tələbi ilə məhkəmədə iddia qaldırılır. Belə ki, “Yaşayış yeri və olduğu yer üzrə qeydiyyat haqqında” Azərbaycan Respublikasının Qanununun 9-cu maddəsində müvafiq icra hakimiyyəti orqanları tərəfindən şəxsin yaşayış yeri üzrə qeydiyyatdan çıxarılma hallarına şəxs yaşayış sahəsindən çıxarıldıqda və ya yaşayış sahəsindən istifadə hüququna xitam verildikdə məhkəmənin qanuni qüvvəyə minmiş qətnaməsi əsasında aid edilmişdir. Şərh olunanlara əsaslanaraq və Azərbaycan Respublikası MPM-nin 263-264-cü, 267-268-ci maddələrini rəhbərt utaraq, QƏRARA ALDİM : İddiaçı ərizəsi geri qaytarılsın. Ərizəçiyə izah olunsun ki, Azərbaycan Respublikası MPM-nin 152.4-cü maddəsinə əsasən ərizənin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan 10 gün müddətində Bakı şəhəri Binəqədi Rayon Məhkəməsinə şikayət verilə bilər. Hakim İlkin Əliyev