Bakı Şəhəri Nəsimi Rayon Məhkəməsi Qərardad — İş №2(006)-5619/2022

Azərbaycan Respublikası adından QƏRARDAD Bakı şəhəri İş № 2(006)-5619/2022 12.12.2022 BAKI ŞƏHƏRİ NƏSİMİ RAYON MƏHKƏMƏSİ Bakı şəhəri Nəsimi Rayon Məhkəməsinin hakimi Abidova Günay Çingiz qızı, İddiaçı cavabdehlər Bakı şəhəri Nəsimi Pİ-nin İstintaq Şöbəsinə və Bakı şəhər BPİ-nin İstintaq və Təhqiqat idarəsinin müstəntiqi Samir İsmayılova qarşı “cinayət işnin ləğv edilməsi və s.” tələbinə dair iddia ərizəsinə baxaraq, MÜƏYYƏN ETDİM: İddiaçı cavabdehlər Bakı şəhəri Nəsimi Pİ-nin İstintaq Şöbəsinə və Bakı şəhər BPİ-nin İstintaq və Təhqiqat idarəsinin müstəntiqi Samir İsmayılova qarşı “cinayət işnin ləğv edilməsi və s.” tələbinə dair iddia ərizəsi ilə Bakı şəhəri Nəsimi Rayon Məhkəməsinə müraciət edərək, Azərbaycan Respublikası DİN-nin Nəsimi RPİ-nin İstintaq Şöbəsi tərəfindən və müstəntiqinin tərtib etdiyi qondarma cinayət işi əməlində cinayət tərkibinin olmadığı üçün ləğv edilməsini, şəxsi mülki olan avtomobilinə dair tərtib edilmiş qondarma məhdudiyyətin ləğv edilməsini, Azərbaycan Respublikası DİN-nin X1 bazasında “Elektron informasiya sistemində bu barədə olan qeydiyyatların ləğv edilməsini xahiş etmişdir. Məhkəmə iddia ərizəsini və ona əlavə edilmiş sənədləri nəzərdən keçirərək hesab edir ki, ərizənin yolverilməzliyinə görə qəbulundan imtina olunmalıdır. Belə ki, Azərbaycan Respublikası Cinayət Prosessual Məcəlləsinin 449.1-ci maddəsinə əsasən məhkəmə nəzarətini həyata keçirən məhkəməyə cinayət prosesini həyata keçirən orqanın aşağıdakı şəxslərinin prosessual hərəkətlərindən və ya qərarlarından şikayət verilə bilər: 449.1.1. təhqiqatçının (onun səlahiyyətlərini həyata keçirən şəxsin); 449.1.2. tutulmanı və ya tutulan şəxsin həbs yerlərində saxlanılmasını həyata keçirən şəxsin; 449.1.3. əməliyyat-axtarış fəaliyyətini həyata keçirən şəxsin; 449.1.4. müstəntiqin; 449.1.5. ibtidai araşdırmaya prosessual rəhbərliyi həyata keçirən prokurorun. Mülki işin materiallarından görünür ki, İddiaçı cinayət prosesini həyata keçirən orqan Azərbaycan Respublikası DİN-nin Nəsimi RPİ-nin İstintaq Şöbəsi tərəfindən və müstəntiqinin qərarının ləğv edilməsi barədə şikayətlə məhkəməyə müraciət etmişdir. Göründüyü kimi qanunverciliklə cinayət prosesini həyata keçirən orqanın prosessual hərəkətlərindən və ya qərarlarından məhkəmə nəzarətini həyata keçirən məhkəməyə şikayət verilməsi nəzərdə tutulduğundan, hazırki iş üzrə iddiaçı iddia tələbi ilə bağlı məhkəmə nəzarətini həyata keçirən məhkəməyə şikayət verə bilər. Azərbaycan Respublikası Mülki Prosessual Məcəlləsinin 153.2.1-ci maddəsinin tələbinə görə, iddia ərizəsinə məhkəmə qaydasında və ya mülki məhkəmə icraatı qaydasında baxılmalı deyildirsə, hakim iddianın yolverilməzliyinə görə iddia ərizəsini qəbul etməkdən imtina edir. Mülki Prosessual Məcəllənin 153.3-cü maddəsinə görə, hakim ərizəni qəbul etməkdən imtina barədə əsaslandırılmış qərardad çıxarır. İşə məhkəmə qaydasında və ya mülki məhkəmə icraatı qaydasında baxılmalı deyildirsə, iddiaçının hansı orqana və ya məhkəməyə müraciət etməli olmasını orada göstərir. Qeyd edilənlərə əsasən, hesab edirəm ki, iddia ərizəsinə mülki məhkəmə icraatı qaydasında baxılmalı olmadığından, iddia ərizəsinin yolverilməzliyinə görə qəbulundan imtina edilməli, iddia ərizəsi ona əlavə edilmiş sənədlərlə birlikdə iddiaçıya geri qaytarılmalı, eyni zamanda iddiaçıya iddia ərizəsində göstərilənlə bağlı cinayət prosesini həyata keçirən orqanın prosessual hərəkətlərindən və ya qərarlarından məhkəmə nəzarətini həyata keçirən məhkəməyə şikayət vermək hüququnun olması izah edilməlidir. Qeyd olunanlara əsasən və Azərbaycan Respublikası Mülki Prosessual Məcəlləsinin 153.2.1 və 263-264-cü maddələrini rəhbər tutaraq, QƏRARA ALDİM: İddiaçı cavabdehlər Bakı şəhəri Nəsimi Pİ-nin İstintaq Şöbəsinə və Bakı şəhər BPİ-nin İstintaq və Təhqiqat idarəsinin müstəntiqi Samir İsmayılova qarşı “cinayət işnin ləğv edilməsi və s.” tələbinə dair iddia ərizəsinin qəbulundan imtina edilsin və iddia ərizəsi ona əlavə edilmiş sənədlərlə birlikdə iddiaçıya geri qaytarılsın. Qərardaddan 10 (on) gün müddətində Bakı Şəhəri Nəsimi Rayon Məhkəməsinə şikayət verilə bilər. Hakim: Günay Abidova