Bakı Şəhəri Xətai Rayon Məhkəməsi Qərardad — İş №2(011)-4595/2020

Azərbaycan Respublikası adından QƏRARDAD Bakı şəhəri İş № 2(011)-4595/2020 21.08.2020 BAKI ŞƏHƏRİ XƏTAİ RAYON MƏHKƏMƏSİ Bakı şəhəri Xətai Rayon Məhkəməsinin hakimi Əliyev Şəhriyar İbrahim oğlu, İddiaçı iddia ərizəsini və ona əlavə edilmiş sənədləri nəzərdən keçirərək müəyyən etdi: İddiaçı iddia ərizəsi ilə məhkəməyə müraciət edərək, hər hansı dövlət orqanının cinayət törətdiyini aşkar etmək üçün, korrupsiya və ya prokuraturada araşdırılmasını təmin edilməsini və “əgər adı çəkilən əmlak DRX-də Qasımov Səxavət adına qeydiyyatdan keçmişsə, nə üçün Xətai Rayon Probasiya Şöbəsi qanunsuz olaraq hərraca çıxarılmışdır?; Əgər əmlak DRX-də hərracdan onun adına qeydiyyatdan keçmişdirsə, nə üçün DRX-i Qasımov Səxavətə qanunsuz olaraq başqasının adına olan əmlaka saxta məktub vermişdir?; Əgər doğurdan da alqı-satqı müaviləsi uydurma əqd deyilsə, nə üçün 3 nömrəli notariat ofisi sistemə vurmayıb və bir iş günü müddətində sifarişli məktubda DRX-ə göndərməyib?” suallarının müvafiq dövlət orqanları tərəfindən cavablandırılmasını məhkəmədən xahiş etmişdir. Məhkəmə, iddia ərizəsini və ona əlavə edilmiş sənədləri nəzərdən keçirərək hesab edir ki, ərizə və ona əlavə edilmiş sənədlər iddia ərizəsinin qəbul edilməsindən iddianın yolverilməzliyinə görə imtina edilməlidir. Belə ki, iddia ərizəsindən və iş materiallarından görünür ki, iddiaçı tərəfindən ərizənin inzibati orqanın qanunsuz hərəkətləri barədə olması göstərilmiş, iddiaçı iddia ərizəsində cavabdeh kimi isə Bakı şəhəri Xətai rayonu İcra və Probasiya Şöbəsini, Bakı şəhəri 3 saylı Notariat Ofisini, Azərbaycan Respublikası Daşınmaz Əmlakın Dövlət Reyestri Xidmətini göstərmişdir, iddiaçının cavabdehlərə mülki mübahisə ilə bağlı hər hansı bir tələbi yoxdur, mövcud tələb inzibati orqanın qanunla ona həvalə edilmiş inzibati funksiyanı yerinə yetirməsi və ərizəçiyə münasibətdə hakimiyyət səlahiyyətlərinin tətbiq edilməsi ilə bağlıdır. Belə olan halda məhkəmə qeyd edir ki, iddia ərizəsi mülki mübahisə ilə əlaqədar deyil, cinayətin araşdırılmasının təmin edilməsi ilə bağlı olduğundan, iddiaçı bu barədə müvafiq istintaq orqanına, tələb müvafiq inzibati orqanın qanunsuz aktlarından irəli gəldiyi halda isə, müvafiq inzibati orqana, onun nəticəsindən asılı olaraq isə müvafiq inzibati məhkəməyə müraciət etməlidir. Belə olan halda məhkəmə hesab edir ki, ərizəyə məhkəmə qaydasında baxılmalı deyil və buna görə də ərizə və ona əlavə edilmiş sənədlər iddia ərizəsinin qəbul edilməsindən iddianın yolverilməzliyinə görə imtina edilməli və ərizə və ona əlavə edilmiş sənədlər rəsmi qaydada ərizəçiyə verilməldir. Azərbaycan Respublikasının Mülki Prosessual Məcəlləsinin 151.1-ci maddəsinə əsasən, iddia ərizəsi bu Məcəllənin tələblərinə riayət edilməklə verildikdə, onun məhkəmə icraatı mümkündür. Həmin Məcəllənin 153.2.1-ci maddəsinə görə isə, ərizəyə məhkəmə qaydasında baxılmalı deyildirsə hakim, yolverilməzliyinə görə iddia ərizəsini qəbul etməkdən imtina edir. Həmin Məcəllənin 153.3-cü maddəsinə əsasən, hakim ərizəni qəbul etməkdən imtina barədə əsaslandırılmış qərardad çıxarır. İşə məhkəmə qaydasında baxılmalı deyildirsə, iddiaçının hansı orqana müraciət etməli olmasını orada göstərir. Həmin Məcəllənin 153.4-cü maddəsinə əsasən, ərizəni qəbul etməkdən imtina haqqında qərardad ərizəyə əlavə olunmuş bütün sənədlərlə birlikdə ərizəçiyə rəsmi qaydada verilməlidir Həmin Məcəllənin 153.6-cı maddəsinə əsasən, iddia ərizəsini qəbul etməkdən imtina barədə qərardaddan şikayət verilə bilər. Qərardad ləğv edildikdə, iddia ərizəsi məhkəməyə müraciət edildiyi ilk gündən verilmiş hesab edilir. “İnzibati və mülki hüquq münasibətlərindən irəli gələn mübahisələrin məhkəmə aidiyyətinə dair”Azərbaycan Respublikası Ali Məhkəməsi Plenumunun xx.xx.2015-ci il tarixli Qərarının 5.1-ci bəndinə əsasən, inzibati mübahisələr inzibati orqanla fiziki və hüquqi şəxslər arasında inzibati aktın qəbul edilməsi, qəbul edilməsindən imtina olunması, ləğv edilməsi, dəyişdirilməsi, etibarsız sayılması, habelə inzibati orqanın faktiki xarakterli hərəkətləri (fəaliyyəti) və s. ilə bağlı yaranan münasibətlərdən irəli gəlir. Bu səbəbdən inzibati orqanların xaricə yönələn və maraqlı şəxsin publik hüquq sahəsindən irəli gələn bu və ya digər hüququn əldə edilməsi, hüququnun tanınması və ya hüquqlarının həyata keçirilməsi ilə bağlı inzibati orqana müraciətinin nəticəsi olaraq, yaxud inzibati orqanın öz təşəbbüsü ilə qəbul etdiyi aktlarının ləğv edilməsi və ya dəyişdirilməsi barədə (mübahisələndirmə haqqında), yaxud həmin aktların etibarsızlığının (qanunsuz) tanınması barədə (müəyyən etmə və tanınma haqqında) iddialara inzibati məhkəmə icraatı qaydasında baxılır. Qeyd olunanlara əsaslanaraq və Azərbaycan Respublikası Mülki Prosessual Məcəlləsinin 149, 153, 263, 264, 266-268 maddələrini rəhbər tutaraq qərara aldı: İddiaçı Bakı şəhəri Xətai rayonu İcra və Probasiya Şöbəsinə, Bakı şəhəri 3 saylı Notariat Ofisinə, Azərbaycan Respublikası Daaşınmaz Əmlakın Dövlət Reyestri Xidmətinə qarşı hər hansı dövlət orqanının cinayət törətdiyini aşkar etmək üçün, korrupsiya və ya prokuraturada araşdırılmasını təmin edilməsini və “əgər adı çəkilən əmlak DRX-də Qasımov Səxavət adına qeydiyyatdan keçmişsə, nə üçün Xətai Rayon Probasiya Şöbəsi qanunsuz olaraq hərraca çıxarılmışdır?; Əgər əmlak DRX-də hərracdan onun adına qeydiyyatdan keçmişdirsə, nə üçün DRX-i Qasımov Səxavətə qanunsuz olaraq başqasının adına olan əmlaka saxta məktub vermişdir?; Əgər doğurdan da alqı-satqı müaviləsi uydurma əqd deyilsə, nə üçün 3 nömrəli notariat ofisi sistemə vurmayıb və bir iş günü müddətində sifarişli məktubda DRX-ə göndərməyib?” suallarının müvafiq dövlət orqanları tərəfindən cavablandırılması tələbinə dair iddia ərizəsinin qəbul edilməsindən iddianın yolverilməzliyinə görə imtina edilsin. İddiaçıya izah edilsin ki, qanunla nəzərdə tutulmuş əsaslarla və qaydada ərizə ilə müvafiq istintaq orqanına, cavabdehlərə və Bakı İnzibati Məhkəməsinə müraciət edə bilər. Qərardaddan, onun rəsmi qaydada verilməsindən sonra 10 (on) gün müddətində, Bakı şəhəri Xətai Rayon Məhkəməsinə şikayət verilə bilər. Sədrlik edən: Şəhriyar Əliyev