Bakı Şəhəri Xətai Rayon Məhkəməsi Qərardad — İş №2(011)-5923/2025

Azərbaycan Respublikası adından QƏRARDAD Bakı şəhəri İş № 2(011)-5923/2025 09.07.2025 BAKI ŞƏHƏRİ XƏTAİ RAYON MƏHKƏMƏSİ Bakı şəhəri Xətai Rayon Məhkəməsinin hakimi Nağıyev Vüqar Güloğlan oğlu, İddiaçı Cavabdeh qarşı “pul” tələbinə dair iddia ərizəsini və ona əlavə edilmiş sənədləri nəzərdən keçirərək MÜƏYYƏN ETDİ: İddiaçı Cavabdeh 5150 manat maddi ziyanın tutulması, cavabdehin anası Mətanət xanımın onun şərəf və ləyaqətini alçaldan davranışları üzrə ondan üzr istəməsi və məhkəmə xərclərinin cavabdehin üzərinə qoyulması barədə iddia ərizəsi ilə məhkəməyə müraciət etmişdir. Məhkəmə iddia ərizəsini və ona əlavə edilmiş sənədləri nəzərdən keçirərək hesab edir ki, iddia ərizəsi geri qaytarılmalıdır. Belə ki, Azərbaycan Respublikasının Mülki Məcəlləsinin (bundan sonra - Mülki Prosessual Məcəllə) 152.1.7-ci maddəsinə əsasən, bir və ya bir neçə cavabdehə bir-biri ilə əlaqədar olmayan bir neçə tələb birləşdirildikdə hakim iddia ərizəsini və ona əlavə edilmiş sənədləri geri qaytarır. Mülki Prosessual Məcəllənin 151.1-ci maddəsinə əsasən, ərizə bu Məcəllənin tələblərinə riayət edilməklə verildikdə, onun məhkəmə icraatı mümkündür. Mülki Prosessual Məcəllənin 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Belə ki, iddia ərizəsinin məzmunundan da müəyyən olunduğu kimi iddiaçının iddia tələbi iki hissədən ibarətdir. İddiaçı iddia ərizəsində Cavabdeh 5150 manat məbləğində pulun tutulmasını və Cavabdeh anası Mətanət xanımın iddiaçının şərəf və ləyaqətini alçaldan davranışları üzrə ondan üzr istənilməsini tələb etsə də, məhkəmə hesab edir ki, İddiaçı tərəfindən bir-biri ilə əlaqədar olmayan tələblər cavabdehə qarşı irəli sürülmüşdür. İddiaçı hazırkı tələblərinə isə bir icraatda baxıla bilməz. Məhkəmənin mövqeyinə əsasən iddiaçı Cavabdeh 5150 manat məbləğində pulun alınaraq iddiaçıya ödənilməsi barədə və iddiaçının şərəf və ləyaqətini alçaldan davranışlara görə ondan üzr istənilməsi öhdəliyinin cavabdehin üzərinə qoyulması barədə ayrı-ayrılıqda iddia ərizələri ilə məhkəməyə müraciət etməlidir. Şərh edilənlərə əsasən məhkəmə hesab edir ki, iddia ərizəsi Mülki Prosessual Məcəllənin tələblərinə riayət edilmədən verildiyindən, yəni irəli sürülən iddia tələbləri birbiri ilə əlaqədar olmadığından iddia ərizəsi, ona əlavə edilmiş sənədlərlə birlikdə geri qaytarılmalıdır. Bununla yanaşı, Mülki Prosessual Məcəllənin 114.1.3-cü maddəsinin tələbinə əsasən ərizə geri qaytarılarsa, ödənilmiş dövlət rüsumu qaytarılır. Məhkəmə hesab edir ki, iddia ərizəsi geri qaytarıldığı üçün İddiaçı tərəfindən Bakı Şəhəri Xətai Rayon Məhkəməsinə ərizə ilə müraciət edilən zaman ödənilmiş 72 manat məbləğində dövlət rüsumu (qəbz nömrəsi **********) dövlət büdcəsindən ona geri qaytarılmalıdır. Şərh olunanlara əsaslanaraq və Azərbaycan Respublikası MPM-nin 152-ci maddəsini rəhbər tutaraq məhkəmə QƏRARA ALDİ: İddiaçı Cavabdeh qarşı “pul” tələbinə dair iddia ərizəsi və ona əlavə edilmiş sənədlər iddiaçıya geri qaytarılsın. İddiaçı tərəfindən dövlət rüsumu olaraq ödənilmiş 72 (yetmiş iki) manat məbləğində pul dövlət büdcəsindən ona geri qaytarılsın. Dövlət rüsumunun qaytarılması hissəsində qərardadın icrası Bakı şəhəri üzrə Baş Maliyyə İdarəsinə həvalə edilsin. İddiaçıya izah edilsin ki, iddia ərizəsinin geri qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan 10 (on) gün müddətində Bakı Şəhəri Xətai Rayon Məhkəməsinə (“Elektron məhkəmə” informasiya sistemində yaradılmış elektron kabinet vasitəsilə) şikayət verilə bilər. Hakim Vüqar Nağıyev