Ağcabədi Rayon Məhkəməsi Qətnamə — İş №2(017)-105/2023

Azərbaycan Respublikası adından QƏTNAMƏ Ağcabədi rayonu İş № 2(017)-105/2023 26.01.2023 AĞCABƏDİ RAYON MƏHKƏMƏSİ Ağcabədi Rayon Məhkəməsi hakim Quliyev Etibar Bəhrəm oğlunun sədrliyi, məhkəmə iclasının katibi X2, iddiaçı və iddiaçılar İddiaçı1 və İddiaçı3 Mübariz qızının nümayəndəsi İddiaçı2 iştirakı ilə Torpaq sahəsindən payın naturada ayrılması tələbinə dair mülki işə Ağcabədi şəhərində açıq məhkəmə iclasında baxaraq, m ü ə y y ə n e t d i: İddiaçılar İddiaçı2, İddiaçı1 və İddiaçı3 Mübariz qızı Cavabdeh qarşı iddia ərizəsi ilə məhkəməyə müraciət edərək, paylı mülkiyyətdə olan Ağcabədi rayonunun Hüsülü kəndi ərazisində yerləşən ümumi sahəsi 1,50 ha torpaq sahəsinin paylara uyğun olaraq onlara aid hissənin naturada ayrılması və onlara təhvil verilməsi barədə qətnamə çıxarılmasını xahiş etmişlər. Məhkəmə iclasında iddiaçı və iddiaçılar İddiaçı1 və İddiaçı3 Mübariz qızının nümayəndəsi İddiaçı2 iddia tələbini müdafiə etdi və izahatında göstərdi ki, Ağcabədi rayon Aqrar İslahat Komissiyasının 15 yanvar 1998-ci il tarixli 01 nömrəli qərarına əsasən Ağcabədi rayonunun Hüsülü kəndi ərazisindən 1,50 ha torpaq sahəsi 4 nəfərdən ibarət ailə üzvlərinə, o cümlədən iddiaçıların və cavabdehin paylı mülkiyyətinə verilmişdir. Buna dair onların adlarına Torpağa mülkiyyət hüququna dair JN 132 kod 60807018 nömrəli dövlət aktı verilmişdir. Onlar bir ailənin üzvləri olmuşlar. Onların payları müəyyən olunsa da naturada ayrılmamışdır. Cavabdeh onun atası, iddiaçılar isə onun anası və bacısıdır. Atası ilə aralarında mübahisə yaranmış, bu səbəbdən torpağı bir yerdə əkib-becərə bilmirlər. Payların ayrılması barədə cavabdehlə razılığa gələ bilmədiklərinə görə torpağın naturada bölünməsi və sənədləşdirilməsi mümkün olmamışdır. İddiaçıların payına düşən torpaq sahəsi bir tərəfdən bölünərək onlara verilməlidir. Qeyd olunanlara əsasən iddianın təmin olunması barədə qətnamə çıxarılmasını xahiş etdi. Cavabdeh məhkəmə iclasının yeri və vaxtı barədə lazımi qaydada xəbərdarlıq edilməsinə baxmayaraq, məhkəmə iclasına gəlməmiş və gəlməməsinin səbəbi barədə məhkəməyə məlumat verməmişdir. Məhkəmə Azərbaycan Respublikası Mülki Prosessual Məcəlləsinin 185.5-ci maddəsinə əsasən işə onun iştirakı olmadan baxılmasını mümkün hesab edir. Məhkəmə iddiaçı və iddiaçıların nümayəndəsinin izahatını dinləyib iş materiallarını tədqiq etməklə hesab edir ki, iddia təmin edilməlidir. Belə ki, iş materiallarında olan Torpağa mülkiyyət hüququna dair JN 132 kod 60807018 nömrəli dövlət aktının surətindən görünür ki, Ağcabədi rayonunun Hüsülü kəndi ərazisində 1,50 ha torpaq sahəsi Cavabdeh, İddiaçı1, X1 və İddiaçı2 paylı mülkiyyətinə verilmişdir. Həmin torpaq sahəsində mülkiyyətçilərin payı bərabər olmaqla, hər birinin payı 0,375 ha təşkil edir. İş materiallarında olan AZE ******** nömrəli şəxsiyyət vəsiqəsinin, Xİİİ-jq 385771 nömrəli doğum və AZ-İ 615466 nömrəli nikah haqqında şəhadətnamənin surətindən görünür ki, X1 xx.xx.1988-ci il tarixdə Ağcabədi rayonunun Hüsülü kəndində anadan olmuş, nikaha daxil olduqdan sonra ona “Dünyamalıyeva” soyadı verilmişdir. Azərbaycan Respublikası Mülki Məcəlləsinin 140-cı maddəsində göstərilir ki, reyestrin məzmunun qeyri-dəqiqliyi sübuta yetirilməyincə, həmin məzmunun həqiqiliyi və tamamlığı prezumpziyası qüvvədədir. Azərbaycan Respublikası Mülki Məcəlləsinin 220.1 maddəsinə əsasən paylı mülkiyyətdə olan əşya mülkiyyətçiləri arasındakı razılaşmaya əsasən onlar arasında bölünə bilər. Həmin Məcəllənin 220.2 maddəsinə əsasən paylı mülkiyyətin mülkiyyətçisi öz payının ayrılmasını tələb edə bilər. Həmin Məcəllənin 220.3 maddəsinə əsasən paylı mülkiyyətin mülkiyyətçiləri ümumi əşyanın bölünməsi və ya ondan payın ayrılması üsulu və şərtləri haqqında razılığa gələ bilmədikdə paylı mülkiyyətin mülkiyyətçisi öz payının naturada ayrılmasını məhkəmə qaydasında tələb edə bilər. Həmin Məcəllənin 213.1 maddəsinə əsasən əşya mülkiyyət hüququnda mülkiyyətçilərin hər birinin payı müəyyənləşdirilməklə (paylı) və ya belə paylar müəyyənləşdirilmədən (birgə mülkiyyət) ümumi mülkiyyətdə ola bilər. Həmin Məcəllənin 214.1 maddəsinə əsasən əgər paylı mülkiyyətin mülkiyyətçilərinin payları Mülki Məcəlləyə əsasən təyin edilə bilmirsə və bütün mülkiyyətçilərin razılaşması ilə müəyyənləşdirilməyibsə, paylar bərabər sayılır. Məhkəmə iş üzrə toplanmış sübutlara məcmu halda qiymət verərək hesab edir ki, iddia təmin edilərək Torpağa mülkiyyət hüququna dair JN 132 kod 60807018 nömrəli dövlət aktına əsasən verilmiş, Ağcabədi rayonunun Hüsülü kəndi ərazisində yerləşən 1,50 ha torpaq sahəsindən iddiaçılar İddiaçı2, İddiaçı1 və İddiaçı3 Mübariz qızının hər birinin payına düşən 0,375 ha torpaq sahəsi (torpaq sahəsinin ölçü plan-cizgisinə uyğun olaraq sərhədləri müəyyən olunaraq bir tərəfdən) naturada bölünərək (ayrılaraq) onlara təhvil verilməlidir. Azərbaycan Respublikası Mülki Prosessual Məcəlləsinin 14.2-ci maddəsinin tələbinə görə, məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Azərbaycan Respublikası Mülki Prosessual Məcəlləsinin 77.1-ci maddəsinə əsasən hər bir tərəf öz tələb və etirazlarının əsası kimi istinad etdiyi halları sübut etməlidir. Azərbaycan Respublikası Mülki Prosessual Məcəlləsinin 217.4-cü maddəsinin tələblərinə görə, məhkəmə (hakim) öz qətnaməsini yalnız məhkəmə iclasında tədqiq olunmuş sübutlarla əsaslandırır. Qeyd olunanlara əsasən və Azərbaycan Respublikası MPM-nin 216-220 maddələrini rəhbər tutaraq, məhkəmə q ə t e t d i: İddia təmin edilsin. Torpağa mülkiyyət hüququna dair JN 132 kod 60807018 nömrəli dövlət aktına əsasən verilmiş, Ağcabədi rayonunun Hüsülü kəndi ərazisində yerləşən 1,50 ha torpaq sahəsindən iddiaçılar İddiaçı2, İddiaçı1 və İddiaçı3 Mübariz qızının hər birinin payına düşən 0,375 ha torpaq sahəsi (torpaq sahəsinin ölçü plan-cizgisinə uyğun olaraq sərhədləri müəyyən olunaraq bir tərəfdən) naturada bölünərək (ayrılaraq) onlara təhvil verilsin. Qətnamədən rəsmi qaydada verildiyi gündən bir ay müddətinə Ağcabədi Rayon Məhkəməsi vasitəsi ilə Şirvan Apellyasiya Məhkəməsinə apellyasiya şikayəti verilə bilər. Hakim Etibar Quliyev