Qusar Rayon Məhkəməsi Qərardad — İş №2(029)-1222/2021

Azərbaycan Respublikası adından QƏRARDAD Qusar şəhəri İş № 2(029)-1222/2021 24.12.2021 QUSAR RAYON MƏHKƏMƏSİ Mən, Qusar rayon məhkəməsinin hakimi Vəliyev Adil Yaqub oğlu "xxxx" ASC-nin Cavabdeh qarşı 2081,80 (iki min səksən bir manat səksən qəpik) manat sığorta ödənişi məbləğinin və 40,81 (qırx manat səksən bir qəpik) manat dövlət rüsumunun, cəmi 2122,61 (iki min yüz iyirmi iki manat altmış bir qəpik) manat məbləğində pul vəsaitinin tutulması tələbinə dair iddia ərizəsini və ona əlavə edilmiş sənədləri nəzərdən keçirib, Müəyyən etdim: "xxxx" ASC Cavabdeh qarşı 2081,80 (iki min səksən bir manat səksən qəpik) manat sığorta ödənişi məbləğinin və 40,81 (qırx manat səksən bir qəpik) manat dövlət rüsumunun, cəmi 2122,61 (iki min yüz iyirmi iki manat altmış bir qəpik) manat məbləğində pul vəsaitinin tutulması tələbinə dair iddia ərizəsi ilə məhkəməyə müraciət etmişdir. Azərbaycan Respublikasının MPM-nin 149.2.2-ci maddəsinə əsasən ərizədə iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) göstərilməlidir. İş materiallarından görünür ki, Cavabdeh Rusiya Federasiyasının vətəndaşı olmaqla daimi olaraq orada yaşayır. İddia ərizəsində həmin şəxsin Azərbaycan Respublikasında olduğu ünvan göstərilsə də, onun hazırkı faktiki və rəsmi qeydə alındığı ünvan (yaşayış yeri və ya olduğu yer üzrə Dövlət Miqrasiya Xidmətində qeydiyyata alındığı ünvan), Rusiya Federasiyasındakı ünvanı, yazışmaların aparılmasının (o cümlədən gələcəkdə məhkəmə tapşırığının icrasının) mümkün olduğu digər ünvan, elektron poçt ünvanı və s. göstərilməmişdir. Bununla da, ərizə Azərbaycan Respublikasının MPM-nin 149-cu maddəsinin tələbləri pozulmaqla məhkəməyə verilmişdir. Azərbaycan Respublikasının MPM-nin 152.1.1-ci maddəsinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə hakim iddia ərizəsini və ona əlavə edilmiş sənədləri geri qaytarır. Ona görə də, hesab edirəm ki, iddia ərizəsi geri qaytarılmalıdır. Yuxarıda göstərilənlərə əsasən və Azərbaycan Respublikasının MPM-nin 152.1.1, 152.1.5, 263-264, 267-268-ci maddələrini rəhbər tutaraq, Qərara aldım: İddia ərizəsi və ona əlavə edilmiş sənədlər "xxxx" ASC-yə geri qaytarılsın. "xxxx" ASC-yə izah edilsin ki, göstərilən nöqsanlar aradan qaldırıldıqdan sonra yenidən ümumi qaydada iddia ərizəsi ilə məhkəməyə müraciət edilə bilər. Qərardaddan tərəfə rəsmi qaydada verildikdən sonra 10 gün müddətində Qusar rayon məhkəməsinə şikayət vermək olar. Qusar rayon məhkəməsinin hakimi Adil Vəliyev