Lənkəran Rayon Məhkəməsi Qərardad — İş №2(049)-1619/2023

Azərbaycan Respublikası adından QƏRARDAD Lənkəran şəhəri İş № 2(049)-1619/2023 05.04.2023 LƏNKƏRAN RAYON MƏHKƏMƏSİ Mən, Lənkəran Rayon Məhkəməsinin hakimi X1 - İddiaçı Cavabdeh qarşı qətnamənin hissə-hissə icra edilməsi tələbinə dair ərizəsinə 05 aprel 2023-cü il tarixdə Lənkəran Rayon Məhkəməsində baxaraq MÜƏYYƏN ETDİM: İddiaçı Cavabdeh qarşı qətnamənin hissə-hissə icra edilməsi tələbinə dair iddia ərizəsi ilə məhkəməyə müraciət etmişdir. Azərbaycan Respublikasının MPM-nin 151.1-ci maddəsinə əsasən, iddia ərizəsinin bu Məcəllənin tələblərinə riayət edilməklə verilməsi yoxlanılmalıdır. İddia ərizəsini nəzərdən keçirərək hesab edirəm ki, ərizə geri qaytarılmalıdır. Belə ki, bu tələbə iddia icraatı qaydasında baxıla bilməz. İddiaçı özünü ərizəçi, Cavabdeh isə tələbkar qismində göstərtməklə hazırki tələblə bağlı sadə ərizə ilə məhkəməyə müraciət etməlidir. Qətnamənin hissə-hissə icra edilməsi tələbinə iddia icraatı qaydasında deyil, icra icraatı qaydasında baxılır. Belə ki, Azərbaycan Respublikasının MPM-nin 231.1-ci maddəsinə əsasən hakim, işdə iştirak edən şəxslərin ərizəsi üzrə tərəflərin əmlak vəziyyətinə və digər hallara əsasən qətnamənin icrasına möhlət verməyə və ya qətnaməni hissə-hissə icra etdirməyə, habelə onun icra üsulunu və qaydasını dəyişdirməyə haqlıdır. İddiaçı özü də tələbində məhz qətnamənin hissə-hissə icra edilməsi tələbini qoymuşdur. Qeyd edirəm ki, Azərbaycan Respublikası MPM-nin 149.2.2-ci maddəsinə əsasən ərizədə iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) göstərilməlidir. Həmin Məcəllənin 149.2.5-ci maddəsinə əsasən ərizədə ərizəyə əlavə edilən sənədlərin siyahısı göstərilməlidir. İddiaçı MPM-nin 149-cu maddəsində nəzərdə tutlmuş ərizənin məzmununa riayət etməmiş, ərizəsinə əlavə etdiyi sənədlərin siyahını göstərməmiş, yalnız “Qoşma 28 vərəqə” yazmaqla kifayətlənmişdir. Azərbaycan Respublikası MPM-nin 152.1.1.-ci maddəsinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə hakim iddia ərizəsini və ona əlavə edilmiş sənədləri geri qaytarır. Hesab edirəm ki, iddiaçı iddia ərizəsinin məzmununa riayət etmədiyindən, ərizə iddiaçıya geri qaytarılmalı və ona Azərbaycan Respublikası MPM-nin 152.4-cü maddəsinin tələbləri izah olunmalıdır. Göstərilənlərə əsasən və Azərbaycan Respublikası MPM-nin 152, 263-264, 268-269-cu maddələrini rəhbər tutaraq, QƏRARAALDİM: İddiaçı Cavabdeh qarşı qətnamənin hissə-hissə icra edilməsi tələbinə dair iddia ərizəsi və ona əlavə edilmiş sənədlər geri qaytarılsın. İddiaçı izah olunsun ki, ərizənin qaytarılmasına əsas olmuş nöqsanlar aradan qaldırıldıqdan sonra o, sadə ərizə ilə həmin tələblə bağlı məhkəməyə müraciət edə bilər. Qərardaddan on gün müddətində Lənkəran Rayon Məhkəməsinə şikayət verilə bilər. Hakim:Muradağa Qasımov