Mingəçevir Şəhər Məhkəməsi Qərardad — İş №2(051)-497/2022

Azərbaycan Respublikası adından QƏRARDAD Mingəçevir şəhəri İş № 2(051)-497/2022 21.01.2022 MİNGƏÇEVİR ŞƏHƏR MƏHKƏMƏSİ Hakim Hüseynov Ələkbər Məmmədtağı oğlu, Məhkəmə iclas katibi X3 iştirakı ilə, İddiaçı Cavabdeh qarşı mərhum valideyinlərindən, atası X1 və anası X2 miras qalmış Mingəçevir şəhəri, A.Məmmədov küçəsi, 9 saylı evin 5 saylı mənzilindən və Nizami küçəsi 5 saylı evin 13 saylı mənzilinin ½ hissəsində vərəsəlik hüququ əsasında mülkiyyət hüququnun tanınması tələbinə dair iddia ərizəsinə və ona əlavə olunmuş sənədləri nəzərdən keçirərək, məhkəmə Müəyyən etdi: İddiaçı Cavabdeh qarşı mərhum valideyinlərindən atası X1, anası X2 miras qalmış Mingəçevir şəhəri, A.Məmmədov küçəsi 9 saylı evin 5 saylı mənzilindən və Nizami küçəsi 5 saylı evin 13 saylı mənzilinin ½ hissəsində vərəsəlik hüququ əsasında mülkiyyət hüququnun tanınması tələbinə dair iddia ərizəsi ilə məhkəməyə müraciət etmişdir. İddia ərizəsinin məhkəmənin icraatına qəbulu araşdırılarkən müəyyən olunmuşdur ki, iddia ərizəsi Azərbaycan Respublikasının Mülki Prosessual Məcəlləsi ilə nəzərdə tutulmuş zəruri tələblərə əməl edilmədən məhkəməyə verilmişdir. Belə ki, iddiaçı iddia ərizəsində işdə iştirak edən şəxslərin adları, telefon nömrələri, o cümlədən mobil telefon nömrələri, elektron poçt ünvanı, o cümləıdən cavabdehin şəxsiyyətini eyniləşdirməyə imkan verən məlumatları (şəxsiyyət vəsiqəsinin seriya nömrəsi) qeyd edilməmiş, eləcə də iddia ərizəsində göstərilən bütün yazılı sübutlar vahid nüsxədə verilmişdir. Azərbaycan Respublikası MPM-in 149.2.2-ci maddəsinə əsasən məhkəməyə təqdim edilmiş iddia ərizəsində iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) göstərilməlidir. Eləcə də iddiaçı iddia ərizəsinin forma və məzmununa əməl etməmişdir. Belə ki, iddiaçı iddia ərizəsində öz tələbinin əsası kimi istinad etdiyi fakt və halları göstərməli olduğu halda, onları etməmiş, lakin iddia ərizəsində iddianın predmetinə və əsasına aidiyyəti olmayan hallarla bağlı əsassız olaraq, yuxarı instansiya məhkəməsinin hakimlərinin ünvanına qeyri-etik ifadələr işlətmiş, yəni iddiaçı cavabdehə qarşı məhkəməyə müraciət etdiyi iddia ərizəsində yuxarı instansiya məhkəməsi hakimlərinin iş fəaliyyətini şübhə altına alan, nalayiq ifadələr işlətməkdən çəkinməmişdir. Bu isə onu deməyə əsas verir ki, iddiaçı prosessual qanunvericilikdə iddia ərizəsinin məzmununa dair tələblərə riayət etməyərək, MPM-n 149-cu maddəsinin tələblərini pozmuşdur. Belə ki, qeyd olunan maddə, iddia ərizəsinin forma və məzmununa dair tələblərə əməl edilməsini iddiaçıya aid etmişdir, yəni iddia ərizəsinin giriş, təsviri, əsaslandırıcı və nəticə hissələrinə dair qanunla nəzərdə tutulmuş qaydalara əməl edilməsi iddiaçının vəzifəsi kimi təsbit edilmişdir. Məhkəmə, həmçinin qeyd edir ki, iddiaçı iddia ərizəsində tələbini əsaslandırdığı halları göstərməmiş, tələbin mahiyyətindən kənara çıxaraq iddia ərizəsinin forma və məzmununa riayət etməmiş, mövcud qanunvericiliyin tələblərinə əməl etməyərək daha çox iddia predmetinə və əsasına aidiyyatı olmayan xüsusatlara toxunmuşdur. Odur ki, məhkəmə hesab edir ki, iddia ərizəsi, iddia ərizəsinin forma və məzmununa riayət edilmədiyinə görə ərizə və ona əlavə edilmiş sənədlər geri qaytarılmalıdır. Azərbaycan Respublikası Mülki Prosessual Məcəllənin 149.2.3-cü maddəsinə əsasən ərizədə iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb göstərilməlidir. Mülki Prosessual Məcəllənin 151.1-ci maddəsinə görə iddia ərizəsi bu Məcəllənin tələblərinə riayət edilməklə verildikdə onun məhkəmə icraatı mümkündür. Mülki Prosessual Məcəllənin 152.1.1-ci maddəsinə görə ərizənin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə hakim ərizəni və ona əlavə olunmuş sənədləri geri qaytarır. Göstərilənlərə əsasən İddiaçı iddia ərizəsi geri qaytarılmalıdır. Həmçinin, iddiaçıya izah olunmalıdır ki, Mülki Prosessual Məcəllənin 152.4-cü maddəsinə görə iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Azərbaycan Respublikası Mülki Prosessual Məcəllənin 263, 264, 267 və 268-ci maddələrini rəhbər tutaraq Qərara aldım: İddiaçı Cavabdeh qarşı mərhum valideyinlərindən atası, X1, anası X2 miras qalmış Mingəçevir şəhəri, A.Məmmədov küçəsi 9 saylı evin 5 saylı mənzilindən və Nizami küçəsi 5 saylı evin 13 saylı mənzilinin ½ hissəsində vərəsəlik hüququ əsasında mülkiyyət hüququnun tanınması tələbinə dair iddia ərizəsi və ona əlavə edilmiş sənədlər geri qaytarılsın. İddiaçıya izah edilsin ki, qeyd olunan nöqsanlar aradan qaldırıldıqdan sonra ümumi qaydada yenidən məhkəməyə müraciət etmək hüququna malikdir. Qərardaddan rəsmi qaydada verildikdən sonra 10 gün müddətində Mingəçevir şəhər məhkəməsinə şikayət verilə bilər. HAKİM: Ələkbər Hüseynov