Sumqayıt Şəhər Məhkəməsi Qərardad — İş №2(060)-9964/2021

Azərbaycan Respublikası adından QƏRARDAD Sumqayıt şəhəri İş № 2(060)-9964/2021 10.12.2021 SUMQAYIT ŞƏHƏR MƏHKƏMƏSİ Hakim Abdullayev Emin Ağamusa oğlunun sədrliyi, Allahverdili Nuranə Həmzə qızının katibliyi ilə, iddiaçı "xxxx" Açıq Səhmdar Cəmiyyətinin Cavabdeh qarşı pul tələbi barədə iddia ərizəsinə və ona əlavə edilmiş sənədlərə baxaraq, məhkəmə MÜƏYYƏN ETDİ: "xxxx" Açıq Səhmdar Cəmiyyəti (bundan sonra - iddiaçı) Cavabdeh (bundan sonra – cavabdeh) qarşı kiçik iddialara dair işlər üzrə sadələşdirilmiş icraat qaydasında iddia ərizəsi ilə Sumqayıt Şəhər Məhkəməsinə müraciət edərək, cavabdehdən 1100 manat məbləğində vurulmuş zərərin, sadələşdirilmiş qaydada baxılması ilə əlaqədar ərizənin verilməsi üçün 31 manat məbləğində ödənilmiş dövlət rüsumunun və müvəqqəti təminat tədbirinin tətbiqi haqqında ərizəsi üçün 10 manat məbləğində ödənilmiş dövlət rüsumunun (cəmi 1141 manat) alınaraq, iddiaçının hesabına köçürülməsinə dair qətnamə qəbul edilməsini xahiş etmişdir. Göründüyü kimi iddia ərizəsi iddiaçının nümayəndəsi kimi Mübariz Mirzəbutov tərəfindən imzalanmışdır. İş materiallarında "xxxx" Açıq Səhmdar Cəmiyyətinin İdarə Heyəti sədrinin müavini Mətanət Nərimanlı tərəfindən Mübariz Mirzəbutova verilmiş 30 noyabr 2021-ci il tarixli etibarnamə mövcuddur. Lakin həmin səlahiyyətin hüquqi şəxsin rəhbəri tərəfindən Mətanət Nərimanlıya verilməsi barədə iş materiallarında hər hansı bir sənəd mövcud deyildir. Belə ki, Azərbaycan Respublikası Mülki Prosessual Məcəlləsinə (bundan sonra – MPM) əsasən iddia ərizəsi məhkəməyə yazılı şəkildə verilir. O, iddiaçı və ya onun bunu imza etməyə səlahiyyəti olan nümayəndəsi tərəfindən imzalanır (149.1.). İddia ərizəsi imzalanmadıqda və ya onu imzalamağa hüququ olmayan şəxs tərəfindən, yaxud xidməti vəziyyəti göstərilməyən şəxs tərəfindən imzalandıqda, hakim iddia ərizəsini və ona əlavə edilmiş sənədləri geri qaytarır (152.1.2.). Məhkəmə hesab edir ki, iddia ərizəsi onu imzalamaq səlahiyyəti olmayan şəxs tərəfindən imzalandığı üçün ona əlavə edilmiş sənədlərlə birlikdə geri qaytarılmalıdır. Yuxarıda göstərilənlərə əsasən və MPM-in 149-152-ci maddələrini rəhbər tutaraq, Məhkəmə QƏRARA ALDİ : İddiaçı "xxxx" Açıq Səhmdar Cəmiyyətinin Cavabdeh qarşı pul tələbi barədə iddia ərizəsi və ona əlavə edilmiş sənədlər iddiaçıya qaytarılsın. Qərardaddan işdə iştirak edən şəxslərə rəsmi qaydada verildiyi gündən 10 (on) gün müddətində Sumqayıt Şəhər Məhkəməsinə şikayət verilə bilər. Hakim Emin Abdullayev