Naxçıvan MR Şahbuz Rayon Məhkəməsi Qərardad — İş №2(090)-194/2024

Azərbaycan Respublikası adından QƏRARDAD Şahbuz şəhəri İş № 2(090)-194/2024 09.08.2024 NAXÇIVAN MR ŞAHBUZ RAYON MƏHKƏMƏSİ Mən, Şahbuz Rayon Məhkəməsinin hakimi Səfərov Daşqın Yaqub oğlu, İddiaçı Cavabdeh qarşı pul tələbinə dair iddia ərizəsinə, ərizəyə əlavə edilmiş sənədlərə baxaraq, müəyyən etdim : İddiaçı iddia ərizəsi ilə Şahbuz Rayon Məhkəməsinə müraciət edərək, Cavabdeh ona olan 22 000 (iyirmi iki min) manat borcun və ödənilmiş olduğum 128 (bir yüz iyirmi səkkiz) manat dövlət rüsumunun alınaraq ona qaytarılması barədə qətnamə qəbul edilməsini məhkəmədən xahiş etmişdir. İddia ərizəsini, ərizəyə əlavə edilmiş sənədləri nəzərdən keçirib müəyyən etdim ki, aşağıda göstərilənlərə görə iddia ərizəsi geri qaytarılmalıdır. Belə ki, Azərbaycan Respublikası Mülki-Prosessual Məcəlləsinin (bundan sonra – MPM) 152.1.1-ci maddəsinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə hakim iddia ərizəsini və ona əlavə edilmiş sənədləri geri qaytarır. Həmin Məcəllənin 149.2.2-ci və 149.2.3-cü maddələrinin tələbinə görə iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları), iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb ərizədə göstərilməlidir. İddia ərizəsi nəzərdə keçirilən zaman onun yuxarıda qeyd edilən qanunvericiliyin tələblərinə uyğun tərtib edilmədiyi müəyyən edilir. Belə ki, MPM-in 149.2.2-ci maddəsinə əsasən cavabdehin şəxsiyyəti eyniləşdirməyə imkan verən digər məlumatlarını, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, cavabdehin eyniləşdirmə məlumatlarını (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) göstərməmişdir. Belə olan halda məhkəmə hesab edir ki, iddia ərizəsi MPM-in 152.1.1-ci maddəsinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə iddia ərizəsi və ona əlavə edilmiş sənədlər geri qaytarılmalıdır. Həmçinin məhkəmə iddia ərizəsi üzrə qeyd edir ki, iddiaçı ərizəsini əsaslandırarkən cavabdeh şəxsin onu aldadaraq, işə düzəltmək adı ilə ondan pul tələb etdiyini bildirmişdir. Sözügedən hal ilə bağlı məhkəmə qeyd edir ki, iddiaçının ərizəsində göstərdiyi məlumatlara hüquqi qiymət verilməsi cinayət mühakimə icraatının predmetidir. Bununla bağlı şəxs tərəfindən aidiyyatı qurumlara müraciət etməlidir. Yalnız iddiaçının ərizəsində göstərilən hallara hüquqi qiymət verildikdən sonra, yəni cinayət mühakimə icraatı çərçivəsində dəymiş ziyanın müəyyən olunması və ödənilməsi, yaxud cinayət işi üzrə məhkəmənin ittiham hökmü qanuni qüvəyyə mindikdən sonra hökmlə müəyyən olunmuş vurulmuş ziyanın ödənilməsi ilə bağlı müstəqil iddianın qaldırılması mümkündür. Eyni zamanda Azərbaycan Respublikası Mülki-Prosessual Məcəlləsinin 152.1.5-ci maddəsinə əsasən müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə hakim iddia ərizəsini geri qaytarır. İddia tələbi üzrə iddiaçı tərəfindən 22000 (iyirmi iki min) manat pulun ödənilməsi xahiş edilməsinə baxmayaraq, iddia ərizəsinə əlavə edilmiş 02 oktyabr 2023-cü il tarixli, 23911 (GPP **********) nömrəli qəbz üzrə 127 (bir yüz iyirmi yeddi) manat və 26 iyul 2024-cü il tarixli, 30526 (GPP **********) nömrəli qəbz üzrə 28 (iyirmi səkkiz) manat olmaqla, cəmi 155 (bir yüz əlli beş) manat rüsum ödənilmişdir. Halbuki iddia tələbi üzrə 156 (bir yüz əlli altı) manat miqdarında dövlət rüsumu ödənilməli idi. Yuxarıda qeyd olunanları nəzərə alan məhkəmə belə nəticəyə gəlir ki, İddiaçı Cavabdeh qarşı pul tələbinə dair iddia ərizəsi və ona əlavə olunmuş sənədlər iddiaçıya geri qaytarılmalıdır. İddiaçıya izah olunmalıdır ki, Azərbaycan Respublikası Mülki-Prosessual Məcəlləsinin 152.4-cü maddəsinin tələbinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Azərbaycan Respublikası Mülki-Prosessual Məcəlləsinin 114.1 və 114.1.3-cü maddələrində bu Məcəllə ilə nəzərdə tutulmuş əsaslarla ərizə geri qaytarılarsa dövlət rüsumu geri qaytarılmalı olması nəzərdə tutulduğundan, İddiaçı tərəfindən 02 oktyabr 2023-cü il tarixli, 23911 (GPP **********) nömrəli qəbzlə ödənilmiş 127 (bir yüz iyirmi yeddi) manat və 26 iyul 2024-cü il tarixli, 30526 (GPP **********) nömrəli qəbzlə ödənilmiş 28 (iyirmi səkkiz) manat miqdarında dövlət rüsumu ona geri qaytarılmalıdır. Qeyd olunanlara əsasən və Azərbaycan Respublikası Mülki-Prosessual Məcəlləsinin 152.2, 152.3, 263, 264, 267 və 268-ci maddələrini rəhbər tutaraq, qərara aldım: İddiaçı Cavabdeh qarşı pul tələbinə dair iddia ərizəsi və ərizəyə əlavə edilmiş sənədlər iddiaçıya geri qaytarılsın. İddiaçı tərəfindən 02 oktyabr 2023-cü il tarixli, 23911 (GPP **********) nömrəli qəbzlə ödənilmiş 127 (bir yüz iyirmi yeddi) manat və 26 iyul 2024-cü il tarixli, 30526 (GPP **********) nömrəli qəbzlə ödənilmiş 28 (iyirmi səkkiz) manat miqdarında dövlət rüsumu ona geri qaytarılsın. İddiaçıya izah edilsin ki, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan o, tərəfə rəsmi qaydada verildikdən sonra 10 (on) gün müddətində (elektron qaydada) Şahbuz Rayon Məhkəməsinə şikayət verilə bilər. Sədrlik edən: Daşqın Səfərov.