Bakı Şəhəri Sabunçu Rayon Məhkəməsi Qərardad — İş №2(5-101)-702/2026

Azərbaycan Respublikası adından QƏRARDAD Bakı şəhəri İş № 2(5-101)-702/2026 05.02.2026 BAKI ŞƏHƏRİ SABUNÇU RAYON MƏHKƏMƏSİ Mən, Bakı şəhəri Sabunçu Rayon Məhkəməsinin hakimi Mahmudova Həqiqət Sahib qızı, İddiaçı cavabdeh "xxxx" MMC-yə qarşı icra icraatı üzrə icranın dayandırılması və hüquqların müdafiəsi tələblərinə dair iddia ərizəsini və ona əlavə edilmiş sənədləri məhkəmə iclasından kənar ayrıca prosessual hərəkət kimi nəzərdən keçirərək, MÜƏYYƏN ETDİM: İddiaçı cavabdeh "xxxx" MMC-yə qarşı notarial icra icraatı üzrə icranın dayandırılması və hüquqların müdafiəsi tələblərinə dair iddia ərizəsi ilə məhkəməyə müraciət edərək, "xxxx" MMC tərəfindən barəsində başlanmış icra icraatı üzrə icranın məhkəmə baxışı yekunlaşanadək dayandırılması, borcun məbləğinin əsassız şəkildə artırılması, üçüncü şəxslərlə əlaqə saxlanması və iş yerinə məktub göndərilməsinin qanunsuz hesab edilməsi, cavabdehin qanunsuz hərəkətləri nəticəsində əməkhaqqının azaldılması ilə bağlı yaradılmış 500 manat maddi zərərin cavabdehdən tutulması, cavabdehin hərəkətləri nəticəsində kredit tarixçəsinin zədələnməsi faktının nəzərə alınması və məhkəmə xərclərinin cavabdehin üzərinə qoyulmasını məhkəmədən xahiş etmişdir. Məhkəmə iddia ərizəsini və ona əlavə edilmiş sənədləri nəzərdən keçirərək hesab edir ki, ərizə məhkəmənin icraatına qəbul edilmədən iddiaçıya geri qaytarılmalıdır. Belə ki, Azərbaycan Respublikası Mülki-Prosessual Məcəlləsinin 151.1-ci maddəsinə əsasən, iddia ərizəsi bu Məcəllənin tələblərinə riayət edilməklə verildikdə, onun məhkəmə icraatı mümkündür. Lakin məhkəmə tərəfindən müəyyən edilir ki, iddia ərizəsində iddiaçının konkret və aydın şəkildə formalaşdırılmış maddi-hüquqi tələbi göstərilməmiş, irəli sürülən tələblər birbiri ilə hüquqi baxımdan fərqli predmetlərə aid olmaqla, həm hüquqi mahiyyətinə, həm də baxılma qaydasına görə bir-birindən ayrılan tələblər şəklində ümumi və qeyri-müəyyən formada ifadə edilmişdir. İddia ərizəsində sadalanmış tələblərin hüquqi əsasları və məhkəmədən dəqiq olaraq nə tələb edildiyi müəyyən edilməmişdir. Mülki Prosessual Məcəllənin 149.2, 149.2.3-cü maddəsinə əsasən, iddia ərizəsində iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb göstərilməlidir. Məhkəmə hesab edir ki, iddia ərizəsində iddia tələbləri konkretləşdirilmədiyindən, bir neçə fərqli hüquqi münasibətdən irəli gələn tələblər vahid iddia predmeti kimi qeyrimüəyyən formada təqdim edildiyindən, tələblərin məhkəmə tərəfindən icra oluna bilən və hüquqi nəticə doğuran formada ifadə edilmədiyindən, sübutların siyahısı iddia ərizəsində göstərilmədiyindən, ərizənin icraata qəbul edilməsi mümkün deyildir. Azərbaycan Respublikası Mülki-Prosessual Məcəlləsinin 152.1-ci və 152.1.1-ci maddələrinə əsasən, iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə hakim iddia ərizəsini və ona əlavə edilmiş sənədləri geri qaytarır. Azərbaycan Respublikası Mülki-Prosessual Məcəlləsinin 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qeyd olunanlara əsasən və Azərbaycan Respublikası Mülki-Prosessual Məcəlləsinin 152, 263-264 və 268-269-cu maddələrini rəhbər tutaraq, QƏRARA ALDİM: İddiaçı cavabdeh "xxxx" MMC-yə qarşı icra icraatı üzrə icranın dayandırılması və əlaqəli tələblərinə dair iddia ərizəsi və ona əlavə edilmiş sənədlər geri qaytarılsın. İddiaçıya izah olunsun ki, iddia ərizəsinin qaytarılması, nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan rəsmi qaydada alındığı gündən “Elektron məhkəmə” informasiya sistemində yaradılan elektron kabinet vasitəsilə 10 (on) gün müddətində Bakı şəhəri Sabunçu Rayon Məhkəməsinə şikayət verilə bilər. Hakim: Həqiqət Mahmudova