Bakı Şəhəri Binəqədi Rayon Məhkəməsi Qətnamə — İş №e-2(001)-5631/2021

Azərbaycan Respublikası adından QƏTNAMƏ Bakı şəhəri İş № e-2(001)-5631/2021 05.08.2021 BAKI ŞƏHƏRİ BİNƏQƏDİ RAYON MƏHKƏMƏSİ Hakim Nəbizadə Nigar Xeyrulla qızının sədrliyi, Əliyeva Aytən Şəmşir qızının katibliyi, İddiaçı "xxxx" ASC-nin nümayəndəsi X1 iştirakı ilə, İddiaçı "xxxx" ASC-nin Cavabdeh qarşı ödənilmiş sığorta ödənişinin subroqasiya hüququ əsasında geriyə tələb edilməsi barədə iddia ərizəsi üzrə mülki işə Bakı şəhəri Binəqədi Rayon Məhkəməsinin inzibati binasında açıq məhkəmə iclasında baxaraq, MÜƏYYƏN ETDİ: İddiaçı "xxxx" ASC-nin Cavabdeh qarşı ödənilmiş sığorta ödənişinin subroqasiya hüququ əsasında geriyə tələb edilməsi barədə iddia ərizəsi ilə Bakı şəhəri Binəqədi Rayon Məhkəməsinə müraciət etmişdir. Məhkəmə iclasında iştirak edən iddiaçı "xxxx" ASC-nin nümayəndəsi X2 izahatında məhkəməyə bildirdi ki, "xxxx" ASC-nin ödənilmi 1539.90 manat sığorta ödənişini zərər qismində Cavabdeh subroqasiya hüququ qaydasında geri tələb etmək hüququ yaranmışdır. İddiaçı tərəfindən cavabdehə sığorta ödənişinin ödənilməsi üçün bank rekvizitlərini özündə əks etdirən 11.12.2019 tarixli, 19/738 №-li pretenziya məktubu göndərilsə də, bugünə qədər heç bir ödəniş olunmamışdır. Cavabdeh məhkəmə iclasının vaxtı və yeri barədə lazımi qaydada xəbərdar edilməsinə baxmayaraq, məhkəmə iclasına gəlməmiş və gəlməməsinin üzrlü səbəbləri barədə məhkəməyə heç bir məlumat verməmişdir. Məhkəmə Azərbaycan Respublikası Mülki Prosessual Məcəlləsinin 185.5-ci maddəsinin tələblərinə əsasən işə cavabdehin iştirakı olmadan baxılmasını mümkün hesab etdi. Məhkəmə iddiaçının nümayəndəsinin izahatını dinləyib, işdə olan sənədləri tədqiq edib toplanmış sübutların məcmusuna qiymət verərək belə nəticəyə gəlir ki, iddia tələbi təmin edilməlidir. Belə ki, iş materiallarında olan sənədlərdən görünür ki, "xxxx" ASC-də 01.01.2019cu il tarixli, M0001/19_430 №-li şəhadətnamə ilə “Avtonəqliyyat vasitələrinin kompleks sığortası" müqaviləsinə əsasən sığortalanmış “Volkswagen Polo" markalı, 90PR458 dövlət qeydiyyat nişanlı avtomobil 13.09.2019-cu il tarixdə etibarnamə əsasında X3 tərəfindən Bakı şəhəri, Q.Xəlilov küçəsində idarə edilərkən Cavabdeh tərəfindən idarə edilən “Mondial" markalı moped onu vuraraq zədələmişdir. Yasamal RPİ-nin təqdim etdiyi 20.09.2019-cu il tarixli “Cinayət işinin başlanmasının rədd edilməsi haqqında" Qərara və “Avtonəqliyyat vasitələrinin sahiblərinin mülki məsuliyyətinin icbari sığortası üzrə sığorta hadisəsi hesab edilə bilən halın təfərrüatları barədə" 14.10.2019-cu il tarixli, 091-48 1219 №-li arayışa əsasən, “Mondial" markalı mopedin sürücüsü Cavabdeh baş vermiş yolnəqliyyat hadisəsində təqsirli bilinmiş “Volkswagen Polo" markalı, 90PR458 dövlət qeydiyyat nişanlı avtomobilə dəymiş zərərin qiymətləndirilməsində iştirakını təmin etmək üçün "xxxx" ASC tərədindən Cavabdeh 25.10.2019-cu il tarixli, 19/667 №-li məktub göndərilmişdir. “Euro Style" LTD tərəfindən verilmiş Qüsur aktına əsasən, dəymiş ziyan ümumilikdə 1539.90 manat məbləğində qiymətləndirilmişdir. Zərərə uyğun olaraq sığorta ödənişi "xxxx" ASC tərəfindən 15.11.2019-cu il tarixli, MCL-286/19 №-li sığorta ödənişinə dair Akt və 28.11.2019-cu il tarixli, **********3 №-li ödəniş tapşırığı əsasında faydalanan şəxsə ödənilmişdir. Azərbaycan Respublikası Mülki Məcəllənin 936.1-ci maddəsinə müvafiq olaraq, subroqasiya hüququ bu Məcəllənin 936.6-cı maddəsi nəzərə alınmaqla sığorta ödənişi almış şəxsin ona dəymiş zərərə görə məsuliyyət daşıyan şəxsə qarşı malik olduğu hüquqlarından və vasitələrdən həmin ödənişi vermiş sığortaçının istifadə etmək hüququdur. Mülki Məcəllənin 936.2-ci maddəsinə görə, faydalanan şəxsin zərərvuran şəxsə qarşı zərərin əvəzini ödəmək tələbi (iddiası) ilə bağlı hüquq əmlak sığortası üzrə sığortaçı ödənişini vermiş sığortaçıya subroqasiya qaydasında onun verdiyi sığorta ödənişi məbləğində keçir. Mülki Məcəllənin 936.5-ci maddəsinə əsasən, sığortaçı subroqasiya hüququndan zərərvuran şəxsin özünə və (və ya) müvafiq sığorta hadisəsi ilə bağlı risklər üzrə həmin şəxsin məsuliyyətini sığortalamış sığortaçıya, həmçinin qanunvericiliyə əsasən, dəyən zərərə görə sığortalı və ya faydalanan şəxs qarşısında maddi məsuliyyət daşıya bilən digər şəxsə qarşı istifadə edə bilər. Mülki Məcəllənin 1097.1-ci maddəsinə müvafiq olaraq, mülki hüquq pozuntusu (delikt) nəticəsində fiziki şəxsin şəxsiyyətinə və ya əmlakına vurulmuş zərərin, habelə hüquqi şəxsin əmlakına və işgüzar nüfuzuna vurulmuş zərərin əvəzi zərərvuran tərəfindən tam həcmdə ödənilməlidir. Mülki Məcəllənin 1114.1-ci maddəsinə görə, başqa şəxsin (qulluq, mənsəb və ya əmək vəzifələrinin icrası zamanı işçinin, nəqliyyat vasitəsini edən şəxsin və ia.) vurduğu zərərin əvəzini ödəmiş şəxsin həmin şəxsə, əgər qanunla ayrı miqdar müəyyənləşdirilməyibsə, ödənilmiş əvəz miqdarında geriyə (reqres) hüququ vardır. Beləliklə, məhkəmə hesab edir ki, iddia tələbi təmin edilməli, 1539,90 manat məbləğində pul Cavabdeh tutularaq iddiaçı "xxxx" ASC-yə ödənilməlidir. Mülki Prosessual Məcəllənin 119.1-ci maddəsinə əsasən, məhkəmə xərcləri ödənilmiş tələblərin məbləğinə münasib olaraq işdə iştirak edən şəxslərə aid edilir. Şərh edilənlərə əsasən və Azərbaycan Respublikasının Mülki Prosessual Məcəlləsinin 216-220 və 360-cı maddələrini rəhbər tutaraq məhkəmə, QƏT ETDİ: İddia ərizəsi təmin edilsin. 1539,90 (min beş yüz otuz doqquz manat doxsan qəpik) manat məbləğində pul və 30 (otuz) manat ödənilmiş dövlət rüsumu Cavabdeh tutularaq iddiaçı "xxxx" ASC-yə ödənilsin. Qətnamədən 1 (bir) ay müddətində Bakı şəhəri Binəqədi Rayon Məhkəməsi vasitəsi ilə Bakı Apellyasiya Məhkəməsinin Mulki Kollegiyasına apellyasiya şikayəti verilə bilər. Qətnamədən şikayət verilmədiyi təqdirdə qəbul edildiyi gündən 1 (bir) ay keçdikdən sonra qanuni qüvvəyə minir. Sədrlik edən: Nigar Nəbizadə