Oğuz Rayon Məhkəməsi Qətnamə — İş №e-2(054)-24/2024

Azərbaycan Respublikası adından QƏTNAMƏ Oğuz rayonu İş № e-2(054)-24/2024 18.01.2024 OĞUZ RAYON MƏHKƏMƏSİ Oğuz Rayon Məhkəməsinin hakimi Zeynalova Səadət Nazim qızının sədrliyi, Rəsulov Aqil Zeynəddin oğlunun katibliyi ilə iddiaçı “İcbari Sığorta Bürosu” X2 Cavabdeh qarşı ödənilmiş sığorta məbləğinin subroqasiya qaydasında tutulması tələbinə dair mülki işə açıq məhkəmə iclasında baxaraq m ü ə y y ə n e t d i: İddiaçı “İcbari Sığorta Bürosu” X3 (iddiaçı) Cavabdeh (cavabdeh) qarşı cavabdehdən subroqasiya qaydasında iddiaçının xeyrinə 2800,00 manat ziyanın və 48,00 manat dövlət rüsumunun tutulması barədə iddia ərizəsi ilə məhkəməyə müraciət etmişdir. İddiaçının etibarnamə üzrə nümayəndəsi məhkəmə iclaslarına gəlməmiş, məhkəməyə göndərdiyi ərizədə işə iddiaçının nümayəndəsinin iştirakı olmadan baxılaraq iddia tələbinin təmin edilməsinə dair qətnamə qəbul edilməsini məhkəmədən xahiş etmişdir. Məhkəmə Azərbaycan Respublikası Mülki Prosessual Məcəlləsinin 185-ci maddəsinin tələblərinə əsasən işə iddiaçının nümayəndəsinin iştirakı olmadan baxılmasını qərara almışdır. İddia tələbi onunla əsaslandırılmışdır ki, LPO ASC "xxxx" Sığorta Şirkəti tərəfindən PST********** nömrəli sığorta şəhadətnaməsi əsasında “Avtonəqliyyat vasitəsi sahiblərinin mülki məsuliyyətinin icbari sığortası” növü üzrə X1 adına sığortalanmış “VAZ 21074” markalı, ** TV *** dövlət qeydiyyat nişanlı avtonəqliyyat vasitəsi xx.xx.2020-ci il tarixində Bakı şəhəri, Nəsimi rayonu Cavadxan küçəsində Cavabdeh tərəfindən idarə olunarkən baş vermiş yol-nəqliyyat hadisəsi nəticəsində Azərbaycan Respublikası Bakı şəhər Baş Səhiyyə İdarəsi “X7 Avtobazası” X5 əmlakına maddi zərər vurulmuşdur. İş materiallarından aydın olur ki, Cavabdeh hadisə yerindən yayınmışdır. Belə ki, sözügedən yol nəqliyyat hadisəsi ilə Cavabdeh barəsində Bakı şəhər DYPİ tərəfindən İXP ******* nömrəli inzibati xəta haqqında protokol tırtib edilmiş və o hadisə yerindən yayındığına görə Azərbaycan Respublikasının İnzibati Xətalar Məcəlləsinin 327.6-cı maddəsi ilə inzibati məsuliyyətə cəlb olunmuşdur. Qeyd edilən hadisə ilə əlaqədar zərərçəkmiş şəxsə dəymiş ziyana görə ona “İcbari Sığorta Bürosu” X3 tərəfindən 2800,00 manat sığorta ödənişi həyata keçirilmişdir. Azərbaycan Respublikası Mərkəzi Bankının ərizəsi üzrə Bakı Kommersiya Məhkəməsinin xx.xx.2020-ci il tarixli qətnaməsi ilə "xxxx" Sığorta Şirkətinin müflis elan edilməsi qət olunmuşdur. “İcbari Sığortalar haqqında” Qanunun 32.1.1-ci maddəsinə əsasən,sığortaçı müvafiq icbari sığorta müqavilələri üzrə sağlamlığa və (və ya) əmlaka dəyən zərərlə bağlı öhdəliklərini ödəmə qabiliyyətinin olmamasına görə yerinə yetirə bilmədikdə Büro tərəfindən kompensasiya ödənişi verilir. “İcbari Sığortalar haqqında” Qanunun 25.4-cü maddəsinə əsasən, Bu Qanunun 32.1.1-ci maddəsində nəzərdə tutulmuş halda kompensasiya ödənişi həyata keçirildikdə, müvafiq icbari sığorta müqaviləsi üzrə faydalana şəxsin sığortaçı və ya müvafiq hallarda sığortaçının ləğvetmə komissiyası qarşısındakı tələb hüququ verilmiş kompensasiya ödənişi həcmində bu Qanunun 27-ci maddəsində nəzərdə tutulmuş İcbari Sığorta Bürosuna keçir. Hazırda iddiaçı ziyanın əvəzinin ödənilməsi üçün verilmiş 2800,00 manat sığorta məbləği və 48,00 manat dövlət rüsumunun cavabdehdən tutulmasını tələb edir. Cavabdeh sonuncu məhkəmə iclasına gəlməmiş, əvvəlki məhkəmə iclasında izahat verərək bildirmişdir ki, iddia tələbini qismən qəbul edir. O, etibarnamə ilə idarə etdiyi “VAZ 21074” markalı, ** TV *** dövlət qeydiyyat nişanlı avtomobil ilə xx.xx.2020-ci il tarixdə Bakı şəhəri, Nəsimi rayonu Cavadxan küçəsi ərazisində hərəkətdə olarkən idarə etdiyi avtomobil “X7” avtomobili ilə toqquşmuşdur. Baş vermiş hadisə nəticəsində ** JH *** dövlət qeydiyyat nişanlı “MERCEDES BENZ SPRİNTER 315” markalı avtomobil zədələnmişdir. O, həmin vaxt həyəcan keçirdiyindən hadisə yerindən uzalaşmışdır. Baş vermiş yol nəqliyyat hadisəsi ilə bağlı toplanmış material üzrə o, Azərbaycan Respublikası İnzibati Xətalar Məcəlləsinin 327.6-cı maddəsi ilə inzibati məsuliyyətə cəlb edilərək inzibati cərimə edilmişdir. ** JH *** dövlət qeydiyyat nişanlı “MERCEDES BENZ SPRİNTER 315” markalı avtomobilə dəymiş maddi ziyanın əvəzi kimi iddiaçı tərəfindən 2800,00 manat pul ödənilmişdir. 2800,00 manat məbləğ sonradan ondan tələb edilmişdir, lakin maddi imkanı olmadığına görə həmin məbləği ödəyə bilmir. Eyni zamanda, həmin məbləği ödəmək sığorta şirkətinin vəzifəsi olduğu halda, nə səbəblə yenidən ondan tələb edildiyini başa düşmür. Qeyd etdikləri nəzərə alınmaqla iş üzrə qanuni qərar qəbul edilməsini məhkəmədən xahiş edir. Məhkəmə iş materiallarını nəzərdən keçirib iddiaçının iddia tələbinə münasibətini nəzərə alaraq hesab edir ki, iddia tələbi təmin edilməlidir. İşə əlavə edilmiş xx.xx.2020-ci il tarixli İXP ******* nömrəli inzibati xəta haqqında protokolun, xx.xx.2020-ci il tarixli TP ******* saylı inzibati tənbeh vermə haqqında qərarın, habelə DYP-nin işə əlavə edilmiş avtonəqliyyat vasitəsi sahiblərinin mülki məsuliyyətinin icbari sığortası üzrə sığorta hadisəsi hesab edilə bilən halın təfərrüatları barədə xx.xx.2020-ci il tarixli arayışın surətindən görünür ki, xx.xx.2020-ci il tarixdə Bakı şəhəri, Nəsimi rayonu Cavadxan küçəsi ərazisində X1 adına sığortalanmış Cavabdeh tərəfindən idarə olunan “VAZ 21074” markalı, ** TV *** dövlət qeydiyyat nişanlı avtomobillə Azərbaycan Respublikası Bakı şəhər Baş Səhiyyə İdarəsi “X7 Avtobazası” X6 məxsus “MERCEDES BENZ SPRİNTER 315” markalı, ** JH *** dövlət qeydiyyat nişanlı avtomobilə zərər vurulmuş, Cavabdeh Azərbaycan Respublikası İnzibati Xətalar Məcəlləsinin 327.6-cı maddəsi ilə təqsirli bilinməklə 100 manat məbləğində cərimə olunmuşdur. İşə əlavə edilmiş AE 051937 saylı sürücülük vəsiqəsinin surətindən görünür ki, Cavabdeh xx.xx.2019-cu il tarixdən xx.xx.2029-cu il tarixədək BC dərəcəsi ilə avtomobil idarə etmək hüququ verilmişdir. İş materiallarına əlavə edilmiş xx.xx.2020-ci il tarixli əmlaka dair qiymətləndirmə aktından, dəymiş zərər barədə razılaşma sənədindən və təmir xidməti sənədindən müəyyən edilir ki, “MERCEDES BENZ SPRİNTER 315” markalı, ** JH *** dövlət qeydiyyat nişanlı avtomobilə dəymiş maddi ziyanın miqdarı dəyişilməli ehtiyat hissələrinin qiyməti və təmir xərcləri ilə birlikdə 2800,00 manat müəyyən edilmişdir. İşə əlavə edilmiş xx.xx.2020-ci il tarixli sığorta aktının və xx.xx.2020-ci il tarixli ödəniş tapşırığının surətindən görünür ki, “MERCEDES BENZ SPRİNTER 315” markalı, ** JH *** dövlət qeydiyyat nişanlı avtomobilə xx.xx.2020-ci il tarixdə yol-nəqliyyat hadisəsi nəticəsində vurulmuş 2800,00 manat zərər məbləği iddiaçı tərəfindən həmin avtomobilin mülkiyyətçisi tərəfindən göstərilən şəxsin bank hesabına ödənilmişdir, iddiaçının subroqasiya tələbi hüququ yaranmışdır. “İcbari sığortalar haqqında” Azərbaycan Respublikası Qanununun 23.1 və 23.1.6-cı maddələrinə əsasən sığortaçının sığorta ödənişini verdikdən sonra müvafiq şəxslərə qarşı Azərbaycan Respublikası Mülki Məcəlləsinin 936-cı maddəsində və bu Qanunun 25-ci maddəsində nəzərdə tutulmuş qaydada subroqasiya hüququndan istifadə etmək hüququ vardır. Həmin Qanunun 25.1 və 25.1.3-cü maddələrinə əsasən icbari sığorta şəhadətnaməsində göstərilən əmlakın onu istifadə etməyə, idarə etməyə, işlətməyə və digər qaydada istismar etməyə hüququ olmayan şəxs tərəfindən istismar edilməsi hallarında sığortaçının mülki məsuliyyətin icbari sığortası üzrə verdiyi sığorta ödənişi məbləğində sığortalıya və (və ya) müvafiq hallarda sığorta olunana qarşı subroqasiya hüququ yaranır. Həmin Qanunun 25.1 və 25.1.8-ci maddələrinə əsasən bu Qanunun 63.1-ci maddəsində nəzərdə tutulmuş halda hallarda sığorta olunana qarşı subroqasiya hüququ yaranır. Həmin Qanunun 63.1-ci maddəsinə əsasən bu Qanunun 63.2-ci maddəsi nəzərə alınmaqla, avtonəqliyyat vasitələrinin sahiblərinin mülki məsuliyyətinin icbari sığortası üzrə baş vermiş sığorta hadisəsi zamanı sürücü hadisə yerindən yayınmış olduqda da sığorta ödənişi vermiş sığortaçının hadisəni törətmiş şəxsə qarşı verilmiş sığorta ödənişi məbləğində subroqasiya hüququ yaranır. Azərbaycan Respublikası Mülki Məcəlləsinin (MM) 21-ci maddəsinə əsasən zərərin əvəzinin ödənilməsini tələb etmək hüququna malik olan şəxs ona vurulmuş zərərin əvəzinin tam ödənilməsini tələb edə bilər, bu şərtlə ki, qanunda və ya müqavilədə zərərin əvəzinin daha az miqdarda ödənilməsi nəzərdə tutulmasın. Zərər dedikdə, hüququ pozulmuş şəxsin pozulmuş hüququnu bərpa etmək üçün çəkdiyi və ya çəkməli olduğu xərclər, əmlakından məhrum olması və ya əmlakının zədələnməsi (real zərər), habelə hüququ pozulmasaydı, həmin şəxsin adi mülki dövriyyə şəraitində əldə edəcəyi gəlirlər (əldən çıxmış fayda) başa düşülür. Zərərin əvəzinin ödənilməsi ilə bağlı tələbin həcminin müəyyənləşdirilməsi zamanı zərərçəkənin, onun işçisinin və qanunvericiliklə nəzərdə tutulmuş hallarda üçüncü şəxslərin davranışının zərərin yaranmasına və artmasına hansı həcmdə şərait yaratması nəzərə alınmalıdır. Həmin Məcəllənin 936.1-ci maddəsinə görə subroqasiya hüququ bu Məcəllənin 936.6cı maddəsi nəzərə alınmaqla, sığorta ödənişi almış şəxsin ona dəymiş zərərə görə məsuliyyət daşıyan üçüncü şəxsə qarşı malik olduğu hüquqlardan və vasitələrdən həmin ödənişi vermiş sığortaçının istifadə etmək hüququdur. Həmin Məcəllənin 936.2-ci maddəsinə görə faydalanan şəxsin zərərvuran şəxsə qarşı zərərin əvəzini ödəmək tələbi (iddiası) ilə bağlı hüquq əmlak sığortası üzrə sığorta ödənişini vermiş sığortaçıya subroqasiya qaydasında onun verdiyi sığorta ödənişi məbləğində keçir. Həmin Məcəllənin 1096.1-cı maddəsinə görə mülki hüquq pozuntusu (delikt) hüquqla və ya qanunla müdafiə edilən başqa şəxsə (zərərçəkənə) birbaşa ziyan və ya zərər vurulmasına gətirib çıxaran təqsirli, hüquqa zidd (mülki qanunvericiliyin normalarını pozan) əməldir (hərəkət və ya hərəkətsizlikdir). Həmin Məcəllənin 1097.1-ci maddəsinə əsasən mülki hüquq pozuntusu (delikt) nəticəsində fiziki şəxsin şəxsiyyətinə və ya əmlakına vurulmuş zərərin, habelə hüquqi şəxsin əmlakına və işgüzar nüfuzuna vurulmuş zərərin əvəzi zərərvuran tərəfindən tam həcmdə ödənilməlidir. Həmin Məcəllənin 1108.1-ci maddəsinə görə ətrafdakılar üçün yüksək təhlükə ilə bağlı fəaliyyəti (nəqliyyat vasitələrindən, mexanizmlərdən, yüksək gərginlikli elektrik enerjisindən, atom enerjisindən, partlayıcı maddələrdən, güclü təsir edən zəhərlərdən və i.a. istifadə edilməsi; tikinti fəaliyyətinin və onunla bağlı digər fəaliyyətin həyata keçirilməsi və s.) nəticəsində mülki hüquq pozuntusu törətmiş fiziki və hüquqi şəxslər yüksək təhlükə mənbəyinin vurduğu zərərin əvəzini ödəməyə borcludurlar, bu şərtlə ki, zərərin qarşısıalınmaz qüvvənin təsiri və ya zərərçəkənin qəsdi nəticəsində əmələ gəldiyini sübuta yetirməsinlər. Zərərin əvəzini ödəmək vəzifəsi yüksək təhlükə mənbəyinə mülkiyyət hüququ ilə və ya digər qanuni əsasla (icarə hüququ ilə, nəqliyyat vasitəsini idarə etmək hüququna dair etibarnamə üzrə və i.a.) sahiblik edən fiziki və ya hüquqi şəxsin öhdəsinə qoyulur. Həmin Məcəllənin 1114.1-ci maddəsinə əsasən başqa şəxsin (qulluq, mənsəb və ya əmək vəzifələrinin icrası zamanı işçinin, nəqliyyat vasitəsini idarə edən şəxsin və i.a.) vurduğu zərərin əvəzini ödəmiş şəxsin həmin şəxsə, əgər qanunla ayrı miqdar müəyyənləşdirilməyibsə, ödənilmiş əvəz miqdarında geriyə tələb (reqres) hüququ vardır. Məhkəmə icraatı zamanı aparılmış araşdırma və iş materialları ilə müəyyən edildi ki, Cavabdeh tərəfindən xx.xx.2020-ci il tarixdə yüksək təhlükə mənbəyi olan nəqliyyat vasitəsi ilə digər avtomobilə ziyan vurulmuş, nəticədə iddiaçı tərəfindən sığortalı zərərçəkənə 2800,00 manat ödənilmiş, iddiaçının cavabdehə qarşı 2800,00 manat məbləğində subroqasiya hüququ yaranmışdır. İddiaçı hazırda sığorta ödənişinin əvəzi 2800,00 manat pul, 48,00 manat dövlət rüsumu məbləğinin ödənilməsini cavabdehdən tələb edir. Cavabdeh iddia tələbini qismən qəbul edir, iş üzrə qanuni qərar qəbul edilməsini xahiş edir. Qeyd edilən xüsusatlar iddia ərizəsinə əlavə edilmiş sübutlarla öz təsdiqini tapdığından məhkəmə hesab edir ki, iddia tələbi təmin edilməli, cavabdehdən zərər çəkmiş nəqliyyat vasitəsinin bərpası üçün təmir xərcləri və ƏDV məbləği hesablanmaqla həyata keçirilmiş sığorta ödənişinin əvəzi 2800,00 manat pul və 48,00 manat dövlət rüsumu məbləğinin tutulub iddiaçının xeyrinə verilməlidir. «Mahmudov Rusiyaya qarşı» iş üzrə 26 iyul 2007-ci il tarixli qərarında İnsan Hüquqları üzrə Avropa Məhkəməsi qeyd etmişdir ki, konvensiya araşdırmalarında sübutları qiymətləndirərkən bir qayda olaraq, affirmanti, non neganti incumbit probation (sübut etmək yükü təkzib edənin deyil, iddia edənin üzərinə düşür) prinsipi rəhbər tutulur. Sübut kifayət qədər güclü, aydın və bir-birinə uyğun qənaətlərin həm mövcudluğundan, həmçinin təkzib olunmaz oxşar fakt ehtimallarından irəli gələ bilər. (§68) Yenə Avropa Məhkəməsinin «Qavazov Bolqarıstana» qarşı 06 mart 2008-ci il tarixli qərarında qeyd edilmişdir ki, sübutlar qiymətləndirilərkən, bir qayda olaraq əsaslı şübhədən kənar standartlar tətbiq edilir. (§93) Azərbaycan Respublikası Mülki Prossesual Məcəlləsinin 14.2-ci maddəsinə görə məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 77.1-ci maddəsinə əsasən hər bir tərəf öz tələblərinin və etirazlarının əsası kimi istinad etdiyi halları sübut etməlidir. Azərbaycan Respublikası Mülki Prosessul Məcəlləsinin 119.1.-ci maddəsinə əsasən məhkəmə xərcləri ödənilmiş tələblərin məbləğinə münasib olaraq işdə iştirak edən şəxslərə aid edilməlidir. Həmin Məcəllənin 119.2-ci maddəsinə əsasən dövlət rüsumu iddianın təmin edilmiş hissəsinə münasib olaraq cavabdehdən tutularaq dövlət gəlirlərinə alınır. İddia tələbi təmin edildiyindən cavabdehdən 48,00 manat dövlət rüsumu məbləği iddiaçının xeyrinə tutulmalıdır. Məhkəmə yuxarıda göstərilənlərə və Azərbaycan Respublikası Mülki Prosessual Məcəlləsinin 216-220 və 360-cı maddələrinə əsasən qətetdi: İddia tələbi təmin edilsin. Cavabdeh 2800,00 manat sığorta ödənişi və 48,00 manat dövlət rüsumu məbləği alınaraq iddiaçı “İcbari Sığorta Bürosu” X2 xeyrinə ödənilsin. Qətnamədən rəsmi qaydada verildiyi gündən bir ay müddətində Oğuz Rayon Məhkəməsi vasitəsi ilə (“Elektron məhkəmə” informasiya sistemində yaradılan kabinetdən elektron qaydada) Şəki Apelyasiya Məhkəməsinə apelyasiya şikayəti verilə bilər. Hakim : Səadət Zeynalova