Bakı Kommersiya Məhkəməsi Qərardad — İş №e-2-2(113)-1047/2020

Azərbaycan Respublikası adından QƏRARDAD Bakı şəhəri İş № e-2-2(113)-1047/2020 10.03.2020 BAKİ KOMMERSİYA MƏHKƏMƏSİ Hakim Nuriyeva Səbinə Vidadi qızı, İddiaçı “xxxxxxxxxxxxxxxxxxxxxxx” ASC-nın cavabdeh “xxxxxxxx” ASC-yə qarşı “borcun hissə-hissə ödənilməsi” tələbinə dair iddia ərizəsini və ona əlavə edilmiş sənədləri nəzərdən keçirərək, MÜƏYYƏN ETDİ: İddiaçı “xxxxxxxxxxxxxxxxxxxxxxx” ASC cavabdeh “xxxxxxxx” ASC-yə qarşı “borcun hissəhissə ödənilməsi” tələbinə dair iddia ərizəsi ilə məhkəməyə müraciət edərək, iddiaçı “xxxxxxxxxxxxxxxxxxxxxxx” ASC ilə cavabdeh “xxxxxxxx” ASC-nin x1 Abonetlərlə iş idarəsi arasında bağlanmış 25 noyabr 2019-cu il tarixli Razılaşma protokoluna dəyişiklik edilməsini və təbii itkilər çox olduğuna görə yazılan borcunun yarı hissəsinə güzəşt edərək, qalan borcun her ay 5000 (beş min) manat hissə-hissə ödənilməsi öhdəliyinin cavabdehin üzərinə qoyulmasına dair qətnamə qəbul edilməsini xahiş etmişdir. Məhkəmə iddia ərizəsini və ona əlavə olunmuş sənədləri nəzərdən keçirərək, hesab edir ki, iddia ərizəsi geri qaytarılmalıdır. Azərbaycan Respublikası Mülki-Prosessual Məcəlləsinin 150.0.7-ci maddəsinə əsasən, müqavilə ilə və ya həmin kateqoriya mübahisələr üçün qanunda bu nəzərdə tutulmuşsa, cavabdehlə mübahisənin məhkəməyə qədər və ya pretenziya qaydasında nizama salınmasına riayət edilməsini təsdiq edən sənəd iddia ərizəsinə əlavə edilir. Azərbaycan Respublikasının Mülki Prosessual Məcəlləsinin 152.1.6.-ci maddəsinə əsasən müqavilə ilə və ya həmin kateqoriya işlər üçün qanunla nəzərdə tutulmuşsa, iddiaçı cavabdehlə mübahisənin məhkəməyə qədər (pretenziya) nizama salınmasına riayət edilməsinə dair sənəd təqdim etmədikdə hakim iddia ərizəsini və ona əlavə edilmiş sənədləri geri qaytarır. İddiaçı “xxxxxxxxxxxxxxxxxxxxxxx” ASC tərəfindən verilmiş elektron iddia ərizəsində qeyd olunub ki, “pretenziya məktubu, şəxsən təqdim edilmişdir, cavabdeh “xxxxxxxx” ASC-nin nümayndəsi “Zülfüqarov” soyadlı pretenziya məktubuna imza edərək 16.02.2020-ci il tarixdə təhvil almışdır”. Belə ki, iş materiallarına əlavə edilmiş pretenziya məktubunda “Zülfüqarov” soyadlı şəxs tərəfindən sənədin təhvil alınması barədə imza mövcud olsa da, onun “xxxxxxxx” ASC-nin səlahiyyətli nümayəndəsi olduqunu müəyyən etmək mümkün olmayıb. Göstərilənləri nəzərə alaraq məhkəmə hesab edir ki, iddiaçı tərəfindən cavabdehlə mübahisənin məhkəməyə qədər (pretenziya) nizama salınmasına riayət edilməsinə dair sənədin cavabdehə çatdırılmasına dair sübut əlavə edilməmişdir. Azərbaycan Respublikası Mülki Prosessual Məcəlləsinin 151.1-ci maddəsinə əsasən, iddia ərizəsi bu Məcəllənin tələblərinə riayət edilməklə verildikdə, onun məhkəmə icraatı mümkündür. Azərbaycan Respublikası Mülki Prosessual Məcəlləsinin 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qeyd edilənlərə əsasən, məhkəmə hesab edir ki, iddia ərizəsi geri qaytarılmalı, iddiaçıya qeyd edilən nöqsanlar aradan qaldırıldıqdan sonra məhkəməyə müraciət etmək hüququ izah edilməlidir. Şərh olunanlara əsasən və Azərbaycan Respublikası Mülki Prosessual Məcəlləsinin 150- 152, 263-264, 267-268-ci maddələrini rəhbər tutaraq, QƏRARA ALDİ: İddiaçı “xxxxxxxxxxxxxxxxxxxxxxx” ASC-nın cavabdeh “xxxxxxxx” ASC-yə qarşı “borcun hissə-hissə ödənilməsi” tələbinə dair iddia ərizəsi və ona əlavə edilmiş sənədlər geri qaytarılsın. İddia ərizəsinin qaytarılması nöqsanlar aradan qaldırıldıqdan sonra ümumi qaydada təkrar məhkəməyə müraciət etməyə mane olmur. Qərardaddan, onun rəsmi qaydada verildiyi gündən 10 (on) gün müddətində Bakı Kommersiya Məhkəməsinə şikayət verilə bilər. Hakim Səbinə Nuriyeva