Sumqayıt Kommersiya Məhkəməsi Qərardad — İş №e-2-2(119)-427/2021

Azərbaycan Respublikası adından QƏRARDAD Sumqayıt şəhəri İş № e-2-2(119)-427/2021 26.02.2021 SUMQAYIT KOMMERSİYA MƏHKƏMƏSİ Sumqayıt Kommersiya Məhkəməsinin hakimi Məmmədov Zahid Tahir oğlu, iddiaçı “Azərişıq” Açıq Səhmdar Cəmiyyətinin “AAAF-İnşaat” Məhdud Məsuliyyətli Cəmiyyətinə qarşı pul tələbinə dair iddia ərizəsini və ərizəyə əlavə olunmuş sənədləri nəzərdən keçirib, M Ü Ə Y Y Ə N E T D İ: İddiaçı cavabdehə qarşı istifadə edilmiş elektrik enerjisi üzrə yaranmış borc tələbinə dair iddia ərizəsi ilə məhkəməyə müraciət etmişdir. Azərbaycan Respublikası Mülki-Prosessual Məcəlləsinin 151.1-ci maddəsinə əsasən, iddia ərizəsi Mülki-Prosessual Məcəllənin tələblərinə riayət edilməklə verildikdə onun məhkəmə icraatı mümkündür.Məhkəmə iddia ərizəsini və ərizəyə əlavə edilmiş sənədləri tədqiq edib hesab edir ki, iddia ərizəsi və ona əlavə edilmiş sənədlər geri qaytarılmalıdır. Belə ki, Mülki-Prosessual Məcəllənin 149.2.2-ci maddəsinə əsasən iddia ərizəsində işdə iştirak edən şəxslərin adları, onların poçt ünvanları, 149.2.3-cü maddəsinə əsasən isə iddiaçının tələbi, onların öz tələblərini əsaslandırdıqları hallar, iddia bir neçə cavabdehə verildikdə isə onların hər birinə qarşı yönələn tələb göstərilməlidir. Lakin, hazırkı iş üzrə iddia ərizəsinin “Tərəflər” bölməsində cavabdeh qismində “AAAF-İnşaat” Məhdud Məsuliyyətli Cəmiyyətinin göstərilməyinə baxmayaraq, iddia ərizəsinin “xahiş edirəm” hissəsində abonent kodu **********9 olan “AAAF-İNŞAAT” Məhdud Məsuliyyətli Cəmiyyətinin istifadə etdiyi elektrik enerjisi üzrə yaranmış 197 083,97 (bir yüz doxsan yeddi min səksən üç manat doxsan yeddi qəpik) manat borcun və 30 manat ödənilmiş dövlət rüsumunun cavabdeh “İNCİ-SL” Məhdud Məsuliyyətli Cəmiyyətindən tutulması xahiş olunmuşdur. Bununla da iddiaçı iddia ərizəsinin forma və məzmununa dair yuxarıda qeyd edilən normaların tələblərinə əməl etməmişdir. Mülki-Prosessual Məcəllənin 152.1.1-ci maddəsinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə - iddia ərizəsi və ona əlavə edilmiş sənədlər geri qaytarılır. Həmin Məcəllənin 152.4-cü maddəsinə əsasən, iddia ərizəsinin qaytarılması, nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Yuxarıda göstərilənlərə əsasən və Azərbaycan Respublikası Mülki-Prosessual Məcəlləsinin 149-152, 263, 264, 267-268-ci maddələrinin tələblərini rəhbər tutaraq, QƏRARA ALDİ: İddia ərizəsi geri qaytarılsın. İddiaçıya izah olunsun ki, iddia ərizəsinin qaytarılması, nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan 10 gün müddətində Sumqayıt Kommersiya Məhkəməsinə şikayət verilə bilər. Hakim Zahid Məmmədov