88.1. Sığorta brokeri müvafiq lisenziya aldıqdan 10 iş günü müddətində öz peşə məsuliyyətini Mərkəzi Bankın müəyyən etdiyi məbləğdə sığorta etdirməli və belə sığorta onun fəaliyyətinin bütün müddəti ərzində təmin olunmalıdır.
88.2. Sığorta müqaviləsinin bağlanmasında vasitəçilik və ya məsləhət xidməti göstərmiş sığorta brokerinin həmin müqavilə üzrə risklərin təkrarsığorta etdirilməsi zamanı vasitəçilik və ya məsləhət xidmətinə cəlb edilməsi qadağandır. Bu tələbə riayət etməməyə görə həm sığorta brokeri, həm də müvafiq sığortaçı məsuliyyət daşıyır.
88.3. Fiziki şəxs sığorta vasitəçisi, habelə bu Qanunun 83.3-cü, 83.4-cü və 88.4-cü maddələrində nəzərdə tutulmuş şəxslər Mərkəzi Bankda attestasiyadan keçdiyi tarixdən hesablanmaqla 5 ildə bir dəfə Mərkəzi Bankda attestasiyadan keçməlidir.
88.4. Sığorta agenti fəaliyyətinə lisenziya almış hüquqi şəxsin əmək müqaviləsi və mülki-hüquqi müqavilə əsasında sığorta vasitəçiliyi fəaliyyətinə cəlb edilmiş əməkdaşları bu Qanunun 83.2.2-ci maddəsində nəzərdə tutulmuş qaydada Mərkəzi Bankda attestasiyadan keçməlidirlər.