Bakı Şəhəri Yasamal Rayon Məhkəməsi Qərardad — İş №2(004)-5119/2021

Azərbaycan Respublikası adından QƏRARDAD Bakı şəhəri İş № 2(004)-5119/2021 29.07.2021 BAKI ŞƏHƏRİ YASAMAL RAYON MƏHKƏMƏSİ Bakı şəhəri Yasamal Rayon Məhkəməsinin hakimi Axundov Toğrul Bəhruz oğlu, İddiaçı cavabdeh "xxxx" MMC-yə qarşı kredit müqaviləsinin ləğv edilməsi, alınmış məhsulun geri qaytarılması və ödənilmiş dövlət rüsumunun alınaraq ona ödənilməsi tələbinə dair iddia ərizəsini və ona əlavə edilmiş sənədləri nəzərdən keçirərək, MÜƏYYƏN ETDİM: İddiaçı cavabdeh "xxxx" MMC-yə qarşı kredit müqaviləsinin ləğv edilməsi, alınmış məhsulun geri qaytarılması və ödənilmiş dövlət rüsumunun alınaraq ona ödənilməsi tələbinə dair iddia ərizəsi ilə məhkəməyə müraciət edərək, onunla "xxxx" MMC-yə məxsus Kontakt Home mağazasının Masallı rayon filialı arasında bağlanmış kredit müqaviləsinin ləğv edilməsi, aldığı sərinləşdirici (kondisioner) geri qaytarılması və ödədiyi 30 manat pulun cavabdehdən alınaraq ona verilməsi barədə qətnamə çıxarılmasını xahiş etmişdir. Azərbaycan Respublikası Mülki Prosessual Məcəlləsinin 151.1-ci maddəsinə əsasən iddia ərizəsi bu Məcəllənin tələblərinə riayət edilməklə verildikdə onun məhkəmə icraatı mümkündür. İddia ərizəsini və ona əlavə edilmiş sənədləri araşdıraraq hesab edirəm ki, iddiaçı tərəfindən pretenziya qaydasına riayət edilmədiyindən iddia ərizəsi və ona əlavə edilmiş sənədlər geri qaytarılmalıdır. Belə ki, Azərbaycan Respublikasının MPM-nin 152.1.6-cı maddəsinə əsasən müqavilə ilə və ya həmin kateqoriya işlər üçün qanunla nəzərdə tutulmuşsa, iddiaçı cavabdehlə mübahisənin məhkəməyə qədər (pretenziya) nizama salınmasına riayət edilməsinə dair sənəd təqdim etmədikdə hakim iddia ərizəsini və ona əlavə edilmiş sənədlər geri qaytarır. İddiaçı iddia ərizəsində alınmış sərinləşdirici (kondisioner) geri qaytarılması üçün cavabdehə müraciət etdiyini qeyd eləsə də, bu barədə iddia ərizəsinə hər hansı bir sübutlar eləcə də, cavabdehin imtinasına dair hər hansı bir subutlar əlavə etməmişdir. Məhkəmə həmçinin qeyd edir ki, iddiaçının iddia tələbi İstehlakçıların hüquqlarının müdafiəsindən irəli gəldiyindən, həmin tələblə yaşadığı ərazi üzrə məhkəməyə müraciət etmək hüququ vardır. Azərbaycan Respublikası Mülki Prosessual Məcəlləsinin 152.2-ci maddəsinə əsasən iddia ərizəsinin qaytarılması haqqında hakim qərardad çıxarır. Həmin Məcəllənin 152.4-cü maddəsinə əsasən iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Şərh olunanlara əsaslanaraq və Azərbaycan Respublikası MPM-nin 152, 263-264, 267-268 -ci maddələrini rəhbər tutaraq, QƏRARA ALDİM: İddiaçı cavabdeh "xxxx" MMC-yə qarşı kredit müqaviləsinin ləğv edilməsi, alınmış məhsulun geri qaytarılması və ödənilmiş dövlət rüsumunun alınaraq ona ödənilməsi tələbinə dair iddia ərizəsi və ona əlavə edilmiş sənədlər geri qaytarılsın. Qərardaddan rəsmi qaydada verildikdən sonra 10 gün müddətində Bakı şəhəri Yasamal Rayon Məhkəməsinə şikayət verilə bilər. Sədrlik edən: Toğrul Axundov