Bakı Şəhəri Yasamal Rayon Məhkəməsi Qərardad — İş №2(004)-5594/2023

Azərbaycan Respublikası adından QƏRARDAD Bakı şəhəri İş № 2(004)-5594/2023 26.10.2023 BAKI ŞƏHƏRİ YASAMAL RAYON MƏHKƏMƏSİ Bakı şəhəri Yasamal Rayon Məhkəməsinin hakimi Axundov Toğrul Bəhruz oğlu, İddiaçı cavabdeh X1 qarşı əmlak və qızıl tələbinə dair iddia ərizəsi və ona əlavə edilmiş sənədləri nəzərdən keçirərək, MÜƏYYƏN ETDİM: İddiaçı cavabdeh X1 qarşı əmlak və qızıl tələbinə dair iddia ərizəsi ilə məhkəməyə müraciət etmişdir. Azərbaycan Respublikası MPM-nin 151.1-ci maddəsinə əsasən iddia ərizəsi bu Məcəllənin tələblərinə riayət edilməklə verildikdə onun məhkəmə icraatı mümkündür. İddiaçı məhkəməyə təqdim etdiyi iddia ərizəsini və ona əlavə edilmiş sənədləri araşdıraraq hesab edirəm ki, Azərbaycan Respublikası MPM-nin 152.1.6-cı maddəsinə əsasən iddia ərizəsi və ona əlavə edilmiş sənədlər geri qaytarılmalıdır. Azərbaycan Respublikası MPM-nin 149.2.4-1-ci maddəsinə əsasən “Mediasiya haqqında” Azərbaycan Respublikasının Qanununa uyğun olaraq, tərəflərin məhkəməyə müraciət etməzdən əvvəl mediasiya prosesində iştirakı tələb olunduğu halda, həmin tələbə riayət edilməsinə dair məlumat ərizədə göstərilməlidir. İddiaçı məhkəməyə təqdim etdiyi iddia ərizəsini və ona əlavə edilmiş sənədləri tədqiq edərkən müəyyən olundu ki, iddia ərizəsinə iddiaçı tərəfindən cavabdehə mübahisənin məhkəməyə qədər (pretenziya) nizama salınmasına riayət edilməsi, yəni Mediasiya Şurasına müraciət edilməsinə dair sübutlar əlavə edilmiş, lakin təqdim edilmiş və mediator tərəfindən təsdiq edilmiş barışıq sazişinin tərkibində mediator təşkilatları və mediatorlar üçün müəyyən olunmuş formaya riayət olunmamışdır. Belə ki, Azərbaycan Respublikası Ali Məhkəməsinin Aparatının Rəhbərinin 1-8/Z- 1683/23 saylı, 21 sentyabr 2023-cü il tarixli məktubuna əsasən mediator təşkilatları və mediatorlar tərəfindən fiziki və hüquqi şəxslərə 2023-cü ilin 01 oktyabr tarixindən təqdim ediləcək və mütləq qaydada holoqramla təmin edilməli olan sənədlərin (arayış, barışıq sazişi, protokol) holoqramlı nümunələri müəyyən olunmuşdur. Həmçinin barışıq sazişinə mediator tərəfindən tərtib edilmiş arayış, tərəfə göndərilmiş təklif və bildiriş əlavə edilməmişdir. Məhkəmə qeyd edir ki, barışıq sazişi mediator təşkilatları və mediatorlar tərəfindən təqdim olunmalı holoqramlı nümunələrə uyğun deyil. Bundan başqa iş materialları ilə müəyyən olunmuşdur ki, hazırda iddia ərizəsinə əlavə edilmiş arayış məhkəmə iclasında olmuş tərəflər arasında digər mübahisə üzrə (nikahın pozulması – 2(004)-763/2023 saylı mülki iş) artıq istifadə olunmuşdur. Beləliklə, məhkəmə hesab edir ki, iddia ərizəsi Azərbaycan Respublikası MPM-nin müvafiq maddələrinin tələblərinə əməl edilmədən verildiyi üçün, iddia ərizəsi və ona əlavə edilmiş sənədlər geri qaytarılmalıdır. Azərbaycan Respublikası Mülki Prosessual Məcəlləsinin 152.2-ci maddəsinə əsasən iddia ərizəsinin qaytarılması haqqında hakim qərardad çıxarır. Həmin Məcəllənin 152.4-cü maddəsinə əsasən iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Göstərilənlərə əsasən və Azərbaycan Respublikasının MPM-nin 152, 263, 264, 267, 268-ci maddələrini rəhbər tutaraq, QƏRARA ALDİM: İddiaçı cavabdeh X1 qarşı əmlak və qızıl tələbinə dair iddia ərizəsi və ona əlavə edilmiş sənədlər geri qaytarılsın. İddiaçıya izah olunsun ki, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan rəsmi qaydada verildikdən sonra 10 gün müddətində Bakı şəhəri Yasamal Rayon Məhkəməsinə şikayət verilə bilər. Sədrlik edən: Toğrul Axundov