Bakı Şəhəri Nəsimi Rayon Məhkəməsi Qərardad — İş №2(006)-6554/2021

Azərbaycan Respublikası adından QƏRARDAD Bakı şəhəri İş № 2(006)-6554/2021 29.09.2021 BAKI ŞƏHƏRİ NƏSİMİ RAYON MƏHKƏMƏSİ Hakim Xəlilov Ramin Adilxan oğlu, İddiaçı cavabdeh "xxxx" Açıq Səhmdar Cəmiyyətinə qarşı «ekspertizanın təyin edilməsi, evin smetasının hesablanması» tələbinə dair iddia ərizəsinə baxaraq, MÜƏYYƏN ETDİ: İddiaçı cavabdeh "xxxx" Açıq Səhmdar Cəmiyyətinə qarşı «ekspertizanın təyin edilməsi, evin smetasının hesablanması» tələbinə dair iddia ərizəsi ilə məhkəməyə müraciət etmişdir. Məhkəmə iddia ərizəsini və ona əlavə edilmiş sənədləri nəzərdən keçirərək hesab edir ki, iddia ərizəsinin yolverilməzliyinə görə qəbulundan imtina olunmalıdır. Azərbaycan Respublikası Mülki Prosessual Məcəlləsinin 153.2.1-ci maddəsinin tələbinə əsasən iddia ərizəsinə məhkəmə qaydasında baxılmalı deyildirsə, hakim iddianın yolverilməzliyinə görə iddia ərizəsini qəbul etməkdən imtina edir. İddia ərizəsindən görünür ki, iddia ərizəsində irəli sürülən tələb ekspertizanın təyin edilməsi, evin smetasının hesablanması ilə bağlı tələbdir. İddiaçının əmlakın qiymətləndirilməsi ilə bağlı özü tərəfindən müstəqil qaydada qiymətləndiriciyə müraciət edərək əmlaka dəymiş zərərin məbləğinin müəyyən edə bilər. Odur ki, iddia ərizəsinin qəbulundan imtina edilməli, iddia ərizəsi ona əlavə edilmiş sənədlərlə birlikdə iddiaçıya geri qaytarılmalı və ona izah edilməlidir ki, o, hazırki tələblə bağlı qiymətləndiriciyə müraciət etməlidir. Məhkəmə o halda ekspertiza təyin edə bilərki, bu vəsatət hansına bir məhkəmə işinə aid olsun. Hazırki tələbdə isə iddia yoxdur və yalnız ekspertizanın keçirilməsi ilə bağlı olan xahişdir. Azərbaycan Respublikası Mülki Prosessual Məcəlləsinin 153.3-cü maddəsinə əsasən, hakim ərizəni qəbul etməkdən imtina barədə əsaslandırılmış qərardad çıxarır. İşə məhkəmə qaydasında baxılmalı deyildirsə, iddiaçının hansı orqana müraciət etməli olmasını orada göstərir. Eyni Məcəllənin 153.6-cı maddəsinə əsasən iddia ərizəsini qəbul etməkdən imtina barədə qərardaddan şikayət verilə bilər. Qeyd olunanlara əsasən və Azərbaycan Respublikası Mülki Prosessual Məcəlləsinin 153.2.1, 153.3 və 263-264-cü maddələrini rəhbər tutaraq, QƏRARA ALDİ: İddiaçı cavabdeh "xxxx" Açıq Səhmdar Cəmiyyətinə qarşı «ekspertizanın təyin edilməsi, evin smetasının hesablanması» tələbinə dair iddia ərizəsinin qəbulundan imtina edilsin. İddia ərizəsi ona əlavə edilmiş sənədlərlə birlikdə İddiaçı rəsmi qaydada verilsin. Qeyd olunan tələblə bağlı müstəqil qiymətləndiriciyə ( ekspert mərkəzlərinə) müraciət etmək hüququ izah edilsin. İddiaçıya hazırki məsələ ilə bağlı Qərardaddan 10 (on) gün müddətində Nəsimi Rayon Məhkəməsinə şikayət verilə bilər. Hakim: Ramin Xəlilov