Bakı Şəhəri Xətai Rayon Məhkəməsi Qətnamə — İş №2(011)-4900/2022

Azərbaycan Respublikası adından QƏTNAMƏ Bakı şəhəri İş № 2(011)-4900/2022 02.11.2022 BAKI ŞƏHƏRİ XƏTAİ RAYON MƏHKƏMƏSİ Hakim Abbasova Əminə Rauf qızının sədrliyi, Bayramova Nərmin Nizami qızının katibliyi, İddiaçı iştirakı ilə, İddiaçı cavabdeh Yıldırım Şahinə qarşı aliment tələbi barədə iddiasına dair mülki işə açıq məhkəmə iclasında baxaraq müəyyən etdi: İddiaçı cavabdeh Yıldırım Şahinə qarşı yetkinlik yaşına çatmayan oğlu X1 üçün yetkinlik yaşına çatana qədər hər ay 350 (üç yüz əlli) manat məbləğində alimentin cavabdehdən tutularaq iddiaçıya ödənilməsi, cavabdehin aliment ödəməli olduğu lakin onu verməkdən boyun qaçırması nəticəsində alimentin alınmadığı əvvəlki dövr üçün 3 illik müddət hesablanaraq 175x24 ay=4200 manat; 193x12 ay=2316 manat cəmi 6516 (altı min beş yüz on altı) manat məbləğində alimentin tutulması barədə iddia ərizəsi ilə məhkəməyə müraciət etmişdir. İddia ərizəsi onunla əsaslandırılmışdır ki, iddiaçı Türkiyə Respublikasının vətəndaşı Yıldırım Şahinlə 07 oktyabr 2013-cü ildə rəsmi nikaha daxil olmaqla ailə qurmuşlar. Birgə nikahdan 2014-cü il təvəllüdlü X3 dünvaya gəlmişdir. Hazırki ərizəsiylə aliment tutulmasını tələb etməyi atanın övladına ailəsinə qarşı məsuliyyətsizliyi, övladının xərclərini könüllü şəkildə qarşılamaması, valideynlik hüququnu icra etməməsidir. Uzun müddətdir ki, cavabdeh öz atalıq borcunu yerinə yetiməyərək uşağının qeydinə qalmır. Nə birgə yaşadıqları, nə də ayrı yaşadıqları dövrdə cavabdeh bir ata kimi uşağının səhhəti, qidalanma, gündəlik tələbatları ilə maraqlanmayıb, onun heç bir ehtiyacını ödəməyibdir, bir sözlə uzun illərdir uşaqla maraqlanmır. Məsələ ilə əlaqədar keçmiş həyat yoldaşı Yıldırım Şahinlə aralarında şifahi olaraq razılaşma olmuşdur ki, uşağın maddi ehtiyaclarını qarşılayacaqdır. Lakin iddiaçı onun səmimiliyinə inanaraq onunla yazılı saziş imzalamamışdır, hətta nikahın ləğv edilməsi tələbi ilə məhkəmədə iddia qaldıran zaman ona inanaraq alirnent tələb etməmişdir. Çünki hər zaman onu əmin edirdi ki, maddi kömək edəcək. Lakin son zamanlar iddiaçı cavabehin yalan vədlər verib uşağa maddi yardım etməməsini, onun uşağın müalicə olunmasına belə köməklik göstərməməsini görərək məcburiyyət qarşısında qalıb aliment tələbi ilə məhkəməyə müraciət edir. Hal - hazırda uşaq iddiaçının himayəsindədir. Onun bütün maddi və mənəvi tələbatlarını iddiaçı təkbaşına ödəyir. O, bir ata kimi körpə uşağının necə yaşaması və hansı maddi çətinliklərlə böyüməsi barədə maraqlanmayıb, valideynin uşaqlarını saxlamaq vəzifəsini yadından çıxarıb və təəssüfki bu məsuliyyəti hələdə dərk etməyib. İddiaçı məhkəmə iclasında iddia ərizəsinin məzmununa uyğun izahat verərək məhkəmədən iddianın təmin edilməsini xahiş etdi. Cavabdeh məhkəmə iclasının vaxtı və yeri barəsində lazımı qaydada xəbərdar edilməklə məhkəmə iclasına çağırılmış, lakin məhkəmə iclasına gəlməmiş və gəlməməsinin səbəbləri barəsində məhkəməyə məlumat verməmişdir. Azərbaycan Respublikası Mülki Prosessual Məcəlləsinin 185.5-ci maddəsinə əsasən, məhkəmə işə cavabdehin iştirakı olmadan baxılmasını mümkün hesab etmişdir. Məhkəmə tərəfin izahatını dinləyərək, iş materiallarını araşdıraraq hesab edir ki, iddia aşağıda göstərilənlərə əsasən qismən təmin edilməlidir. İş materiallarında olan AZ-İİİ seriyalı 418507 nömrəli Azərbaycan Respublikasının “Doğum haqqında şəhadətnamə”nin surətindən görünür ki, X4 xx.xx.2014-cü il tarixdə anadan olmuşdur, atası Yıldırım Şahin, anası isə İddiaçıdır. İş materiallarında olan "xxxx" MMC-ilə İddiaçı arasında bağlanmış xx.xx.2020-ci il tarixli “İbtidai təhsilin təşkili müqaviləsi”dən görünür ki, X2 Hədəf Liseyinin ibtidai təhsil pilləsi Rus bölməsi üzrə bir illik təhsil haqqı 4050 manat təşkil edir. İş materiallarında olan "xxxx" MMC-ilə İddiaçı arasında bağlanmış xx.xx.2020-ci il tarixli “İbtidai təhsilin təşkili müqaviləsi”dən görünür ki, X2 Hədəf Liseyinin ibtidai təhsil pilləsi Rus bölməsi üzrə bir illik təhsil haqqı 4050 manat təşkil edir və kassa mədaxil oredrinin surətindən görünür ki, İddiaçı "xxxx" MMC-yə 4050 manat məbləğində ödəniş etmişdir. İş materiallarında olan "xxxx" MMC-ilə İddiaçı arasında bağlanmış xx.xx.2022-ci il tarixli “İbtidai təhsilin verilməsinə dair müqavilə”dən görünür ki, X2 Hədəf Liseyinin ibtidai təhsil pilləsi Rus bölməsi üzrə bir illik təhsil haqqı 5500 manat təşkil edir və kassa mədaxil oredrinin surətindən görünür ki, İddiaçı "xxxx" MMC-yə 3000 manat məbləğində ödəniş etmişdir. İş materiallarında olan "xxxx" MMC-ilə İddiaçı arasında bağlanmış xx.xx.2020-ci il tarixli “İbtidai təhsilin təşkili müqaviləsi”dən görünür ki, X2 Hədəf Liseyinin ibtidai təhsil pilləsi Rus bölməsi üzrə bir illik təhsil haqqı 4050 manat təşkil edir və kassa mədaxil oredrinin surətindən görünür ki, İddiaçı "xxxx" MMC-yə 4050 manat məbləğində ödəniş etmişdir. Azərbaycan Respublikası Konstitusiyasının 34-cü maddəsinə əsasən ər ilə arvadın hüquqları bərabərdir. Uşaqlara qayğı göstərmək, onları tərbiyə etmək valideynlərin həm hüququ, həm də borcudur. Azərbaycan Respublikası Ailə Məcəlləsinin 75.1-ci maddəsinə əsasən, valideynlər uşaqlarını saxlamağa borcludurlar. Həmin Məcəllənin 75.4-cü maddəsinə əsasən, valideynlər uşaqlarını saxlamadıqda uşaqların saxlanması üçün vəsait (aliment) valideynlərdən məhkəmə qaydasında tutulur. Göstərilən Məcəllənin 78.1-ci maddəsinə əsasən, valideynlər arasında yetkinlik yaşına çatmayan uşaqlara aliment ödənilməsi barədə saziş yoxdursa, eləcə də aliment verməyə borclu olan valideynin qazancı (gəliri) qeyri-müntəzəm, dəyişən olarsa, ya da qazancın (gəlirin) hamısını və ya bir hissəsini həmin valideyn natura və ya xarici valyuta ilə alırsa, yaxud onun qazancı və ya sair gəliri yoxdursa, habelə alimentin valideynin qazancından (gəlirindən) müəyyən hissə kimi tutulması mümkün olmadığı, çətinlik törətdiyi və tərəflərdən birinin marağını əhəmiyyətli dərəcədə pozduğu başqa hallarda, uşaqların saxlanması üçün vəsait tutulmasını tələb edən şəxsin xahişi ilə alimentin miqdarı məhkəmə tərəfindən hər ay ödənilməli olan sabit pul məbləğində və ya eyni zamanda, həm sabit pul məbləğində, həm də bu Məcəllənin 76-cı maddəsinə uyğun olaraq qazancın (gəlirin) müəyyən hissəsi kimi müəyyən edilə bilər. Qeyd edilən Məcəllənin 78.2-ci maddəsinə əsasən, sabit pul məbləğinin miqdarı məhkəmə tərəfindən maddi və ailə vəziyyəti, diqqətəlayiq olan digər hallar nəzərə alınmaqla uşağın əvvəlki təminatının səviyyəsinin mümkün qədər maksimal saxlanması əsas tutularaq müəyyən edilir. Həmin Məcəllənin 85.1.1-ci maddəsinə əsasən hamiləlik dövründə və ümumi uşaqlarının doğulduğu gündən 3 il ərzində keçmiş arvad nikah pozulduqdan sonra məhkəmə qaydasında buna zəruri vəsaitə malik olan keçmiş ərdən (arvaddan) aliment ödəməyi tələb etmək hüququna malikdirlər. “Uşaq hüquqları haqqında” Azərbaycan Respublikası Qanunun 13-cü maddəsinə əsasən, uşağın Azərbaycan Respublikası Qanunvericiliyi ilə müəyyən edilmiş minimum dolanacaq xərclərindən az olmayan maddi təminat almaq hüququ vardır. “Azərbaycan Respublikasında 2022-ci il üçün yaşayış minimumu haqqında” 03 dekabr 2021-ci il tarixli Azərbaycan Respublikası Qanununa əsasən 2022-ci il üçün yaşayış minimumu ölkə üzrə 210 manat, əmək qabiliyyətli əhali üçün 220 manat, pensiyaçılar üçün 176 manat, uşaqlar üçün 193 manat məbləğində müəyyən edilmişdir. Yuxarıda qeyd edilən normativ hüquqi aktların normalarının tələblərini və iş materiallarını araşdıraraq məhkəmə belə qənaətə gəlir ki, birgə uşağı saxlamaq hər iki valideyinin vəzifəsidir. Odur ki, uşağın maraqları üstün tutulmaqla və iddiaçı və cavabdehin maddi vəziyyəti nəzərə alınaraq, Yıldırım Şahindən- xx.xx.2014-cü il təvəllüdlü X2 yetkinlik yaşına çatana kimi saxlanılması üçün hər ay 200 manat məbləğində sabit pul şəklində aliment tutularaq iddiaçıya ödənilməlidir. Bundan başqa, məhkəmə alimentin tutulma müddətini araşdıraraq, hesab edir ki, alimentin tutulma müddəti iddiaçının iddia ərizəsi ilə məhkəməyə müraciət etdiyi vaxtdan başlanmalı və dərhal icra edilməlidir. Belə ki, Azərbaycan Respublikası Ailə Məcəlləsinin 100.2-ci maddəsinə əsasən, aliment məhkəməyə müraciət edildiyi vaxtdan tutulur. Azərbaycan Respublikası Mülki Prosessual Məcəlləsinin 234.2.1-ci maddəsinə əsasən, şəxsin saxlanması üçün vəsaitlərin, o cümlədən alimentlərin alınması haqqında qətnamələr dərhal icra olunur. Məhkəmə iddianın cavabdehin aliment ödəməli olduğu lakin onu verməkdən boyun qaçırması nəticəsində alimentin alınmadığı əvvəlki dövr üçün 3 illik müddət hesablanaraq 175x24 ay=4200 manat; 193x12 ay=2316 manat cəmi 6516 (altı min beş yüz on altı) manat məbləğində alimentin tutulması ilə bağlı hissəsinə qiymət verərək belə qənaətə gəlir ki, iddia bu hissədə təmin edilməməlidir. Belə ki, Azərbaycan Respublikası Ailə Məcəlləsinin 100.3-cü maddəsinə əsasən məhkəmə iddiaçının aliment almaq üçün məhkəməyə müraciət edənədək tədbirlər gördüyünü, lakin aliment ödəməli olan şəxsin onu verməkdən boyun qaçırması nəticəsində alimentin alınmadığını müəyyən edərsə, əvvəlki dövr üçün aliment 3 illik müddət həddində verilə bilər. Yuxarıda göstərilən qanunvericilik normasının müddəalarına əsasən məhkəmə belə qənaətə gəlir ki, iddiaçı aliment almaq üçün məhkəməyə müraciət edənədək tədbirlərin görüldüyünə dair məhkəməyə hər hansı sübut təqdim etmədiyindən iddianın alimentin cavabdehin aliment ödəməli olduğu lakin onu verməkdən boyun qaçırması nəticəsində alimentin alınmadığı əvvəlki dövr üçün 3 illik müddət hesablanaraq 175x24 ay=4200 manat; 193x12 ay=2316 manat cəmi 6516 (altı min beş yüz on altı) manat məbləğində alimentin tutulmasıı ilə bağlı hissəsi təmin edilməməlidir Məhkəmə həmçinin hesab edir ki, məhkəmə xərcinə daxil olan dövlət rüsumu da cavabdehdən tutularaq dövlət büdcəsinə ödənilməlidir. Belə ki, “Dövlət rüsumu haqqında” Azərbaycan Respublikası Qanununun 8.1.2-ci madəsinə əsasən, məhkəməyə verilən iddia ərizələrindən iddia qiyməti 1000 manadan 10000 manatadək olduqda 30 manat + 1.000 manatdan yuxarı olan iddia qiymətinin 1 faizi manat məbləğində dövlət rüsumu tutulur. Həmin Qanunun 9.1.2-ci maddəsinə əsasən, aliment alınması barədə iddialar üzrə — iddiaçılar dövlət rüsumu ödəməkdən azad olunurlar. Azərbaycan Respublikası Mülki Prosessual Məcəlləsinin 112.1.3-cü maddəsinə əsasən, iddianın qiyməti, aliment alınması haqqındakı iddialarda—bir il ərzində ödəmənin məcmusu ilə müəyyən edilir. Həmin Məcəllənin 119.2-ci maddəsinə əsasən, iddiaçı müəyyən olunmuş qaydada dövlət rüsumunu ödəməkdən azad edilmişsə, dövlət rüsumu iddianın təmin edilmiş hissəsinə münasib olaraq cavabdehdən tutularaq dövlət gəlirlərinə alınır. Göstərilən qanunvericilik aktı normalarına əsasən məhkəmə hesab edir ki, iddia tələbi alimentin alınması ilə bağlı olduğundan, iddianın qiyməti bu cür iddialarda bir il ərzində ödəmənin məcmusu ilə müəyyən edildiyindən, həmçinin bir il ərzində ödəmənin məcmusu (uşağın yetkinlik yaşına çatanadək saxlanması üçün hər ay 200 manat məbləğində tutulması nəzərdə tutulan) 2400 manat olduğundan 44 manat məbləğində dövlət rüsumu cavabdehdən tutularaq dövlət büdcəsinə ödənilməlidir. Məhkəmə iş üzrə təqdim edilmiş sübutları məcmu halında qiymətləndirərək, hesab edir ki, iddia əsaslı olduğundan təmin edilməlidir. Şərh olunanlara əsasən, Azərbaycan Respublikası Mülki Prosessual Məcəlləsinin 216-220-ci maddələrini rəhbər tutaraq məhkəmə qət etdi: İddia qismən təmin edilsin. xx.xx.2014-cü il təvəllüdlü X2 yetkinlik yaşına çatanadək saxlanılması üçün cavabdeh Yıldırım Şahindən xx.xx.2022-ci il tarixdən hesablanmaqla, hər ay 200 (iki yüz) manat sabit pul məbləğində aliment İddiaçı xeyrinə tutulsun. İddia qalan hissədə təmin edilməsin. Qətnamə dərhal icra edilsin. Cavabdeh Yıldırım Şahindən 44 (qırx dörd) manat məbləğində dövlət rüsumu tutularaq dövlət büdcəsinə ödənilsin. Qətnamədən onun tərəflərə rəsmi qaydada təqdim edildiyi gündən 1 (bir) ay müddətində Bakı Şəhəri Xətai Rayon Məhkəməsi vasitəsi ilə Bakı Apellyasiya Məhkəməsinə apellyasiya şikayəti verilə bilər. Qətnamədən şikayət verilmədikdə, qətnamə tərəflərə rəsmi qaydada təqdim edildiyi edildiyi gündən 1 (bir) ay keçdikdən sonra qanuni qüvvəyə minir. Hakim Əminə Abbasova