Ağstafa Rayon Məhkəməsi Qətnamə — İş №2(015)-698/2024

Azərbaycan Respublikası adından QƏTNAMƏ Ağstafa rayonu İş № 2(015)-698/2024 05.06.2024 AĞSTAFA RAYON MƏHKƏMƏSİ Hakim Rəsulov Zamiq Akif oğlunun sədrliyi, məhkəmə iclasının katibi Nağıyev Sənan Tahir oğlunun katibliyi və iddiaçı Əliyeva Aytən Kamal qızının iştirakı ilə, İddiaçı Əliyeva Aytən Kamal qızının cavabdeh Əliyev Kənan Vüqar oğluna qarşı “alimentin sabit pul məbləğində tutulması tələbi barədə” iddiasına dair mülki işə açıq məhkəmə iclasında baxaraq, məhkəmə müəyyən etdi: İddiaçı Əliyeva Aytən Kamal qızı 30.04.2024-cü il tarixində iddia ərizəsi ilə Məhkəməyə müraciət edərək 13.12.2021-ci il təvəllüdlü Əliyev Ərkan Kənan oğlunun saxlanılmasına görə cavabdeh Əliyev Kənan Vüqar oğlundan hər ay 235 manat məbləğində alimentin tutularaq ona ödənilməsi barədə qətnamə qəbul edilməsini xahiş etmişdir. Məhkəmə baxışı iclasında iştirak edən iddiaçı Əliyeva Aytən Kamal qızı iddianı müdafiə edərək bildirdi ki, cavabdeh Əliyev Kənan Vüqar oğlu ilə 2020-ci ildə ailə həyatı qurmuş, 07.09.2021-ci il tarixdə nikahlarını rəsmiləşdirmişlər. Onların birgə nikahlarından 13.12.2021-ci il təvəllüdlü Əliyev Ərkan Kənan oğlu adlı uşağı anadan olmuşdur. Tərəflərin ailə münasibətləri ilk vaxtlarda normal olsa da, sonralar aralarında baş vermiş ziddiyyətlər ailələrinin dayaqlarını sarsıtmışdır və ayrılmışlar və ailələrinin yenidən bərpası mümkün deyildir. Ona görə də 13.12.2021-ci il təvəllüdlü Əliyev Ərkan Kənan oğlunun saxlanılmasına görə cavabdeh Əliyev Kənan Vüqar oğlundan hər ay 235 manat sabit pul məbləğində aliment tutularaq ona ödənilməsi barədə qətnamə qəbul edilməsini xahiş etmişdir. Məhkəmə baxışı iclasında iştirak edən cavabdeh Əliyev Kənan Vüqar oğlu iddianı qəbul etməyərək heç bir yerdə işləmədiyini, 235 manat sabit pul məbləğində aliment ödəyə bilməyəcəyini bildirmişdir. Məhkəmə hesab edir ki, iddia qismən təmin olunmalıdır. Məhkəmə gəldiyi nəticəni aşağıda qeyd olunanlarla əsaslandırır. Belə ki, iş materiallarına əlavə olunmuş, nikah haqqında şəhadətnamənin surətindən görünür ki, Ağstafa rayon İcra Hakimiyyəti başçısının Köçəsgər kənd iəd üzrə nümayəndəliyində 07.09.2021-ci ildə 014 nömrəli akt qeydi ilə Əliyeva Aytən Kamal qızının və Əliyev Kənan Vüqar oğlunun nikahları rəsimiləşdirilmişdir. İş materiallarına əlavə olunmuş, “Doğum haqqında” şəhadətnamələrin surətlərindən görünür ki, tərəflər 13.12.2021-ci il təvəllüdlü Əliyev Ərkan Kənan oğlunun valideynləridir. İş materiallarına əlavə olunmuş, Ağstafa rayon İcra Hakimiyyəti başçısının Köçəsgər kənd iəd üzrə nümayəndəliyi tərəfindən verilmiş arayışda görünür ki, həqiqətən 19.09.1996-cı il təvəllüdlü Əliyeva Aytən Kamal qızı Ağstafa rayon Köçəsgər kənd sakinidir və həmin ünvanda qeydiyyatdadır. Azərbaycan Respublikası Konstitusiyasının 34-cü maddəsinin IV bəndinə əsasən ər ilə arvadın hüquqları bərabərdir. Uşaqlara qayğı göstərmək, onları tərbiyə etmək valideynlərin həm hüququ həm də borcudur. Azərbaycan Respublikası Ailə Məcəlləsinin 75.1-ci maddəsinə əsasən valideynlər uşaqlarını saxlamağa borcludurlar. Azərbaycan Respublikası Ailə Məcəlləsinin 75.4-cü maddəsinə əsasən valideynlər uşaqlarını saxlamadıqda uşaqların saxlanılması üçün vəsait (aliment) valideynlərdən məhkəmə qaydasında tutulur. Azərbaycan Respublikası Ailə Məcəlləsinin 78.1-ci maddəsinə əsasən valideynlər arasında yetkinlik yaşına çatmayan uşaqlara aliment ödənilməsi barədə saziş yoxdursa, eləcə də aliment verməyə borclu olan valideynin qazancı (gəliri) qeyri-müntəzəm, dəyişən olarsa, ya qazancın (gəlirin) hamısını və ya bir hissəsini həmin valideyn natura və ya xarici valyuta ilə alırsa, yaxud onun qazancı və ya sair gəliri yoxdursa, habelə alimentin valideynin qazancından (gəlirindən) müəyyən hissə kimi tutulması mümkün olmadığı, çətinlik törətdiyi və ya tərəflərdən birinin marağı əhəmiyyətli dərəcədə pozduğu başqa hallarda, uşaqların saxlanılması üçün vəsait tutulması tələb edən şəxsin xahişi ilə alimentin miqdarı məhkəmə tərəfindən hər ay ödənilməli olan sabit pul məbləğində və ya eyni zamanda həm sabit pul məbləğində, həm də bu Məcəllənin 76-cı maddəsinə uyğun olaraq qazancın (gəlirin) müəyyən hissəsi kimi müəyyən edilə bilər. Valideyn (valideynlər) və ya uşağı tərbiyə edən digər şəxslər uşağın inkişafı üçün lazım olan həyat şəraitini öz bacarıqları və maliyyə imkanları daxilində təmin etməyə görə əsas məsuliyyəti daşıyırlar. Azərbaycan Respublikası Ailə Məcəlləsinin 100.2-ci maddəsinə əsasən aliment məhkəməyə müraciət edildiyi vaxtdan tutulur. Azərbaycan Respublikası Ailə Məcəlləsinin 112.1-ci maddəsinə əsasən aliment ödənilməsi barədə saziş olmadıqda məhkəmə tərəfindən alimentin miqdarı müəyyən olunduqdan sonra tərəflərdən birinin ailə və ya maddi vəziyyətində dəyişiklik olmuşsa, məhkəmə tərəflərdən istənilən birinin tələbi ilə alimentin müəyyən olunmuş miqdarını dəyişə bilər. Məhkəmə hesab edir ki, uşağın yetkinlik yaşına çatana kimi saxlanması üçün cavabdehdən (atadan) tutulan aliment üzrə uşağın maraqlarını və mənafeyini əks etdirən bütün diqqətəlayiq hallar xüsusən nəzərə alınmalı və atanın bir valideyn kimi uşağın maddi cəhətdən təmin edilməsində daha aktiv şəkildə iştirak etməsini səciyyələndirən xüsusatlar əsas götürülməlidir. Alimentin miqdarının müəyyən edilməsi zamanı əsas meyar kimi uşağın maddi təminatının normal səviyyədə təmin edilməsi təşkil etməli, həmçinin uşağın tərbiyəsində və saxlanmasında ananın üzərinə daha çox yükün düşdüyünü, bu baxımdan cavabdehin (atanın) uşağın maddi təminatının təmin edilməsində daha fəal iştiraka cəlb edilməsi və hazırkı vaxta kimi atanın aliment ödəməməsi ilə əlaqədar halları nəzərə alınmalıdır. Bu səbəbdən əsas diqqət yetkinlik yaşına çatmamış uşağın mənafeyinə, uşağın maddi cəhətdən təmin olunmasına yönəlməli, iddia qismən təmin edilməli, Əliyev Kənan Vüqar oğlundan 30.04.2024-cü il tarixdən başlayaraq 13.12.2021-ci il təvəllüdlü Əliyev Ərkan Kənan oğlunun yetkinlik yaşına çatana kimi saxlanılması üçün hər ay 150 manat sabit pul məbləğində aliment iddiaçı Əliyeva Aytən Kamal qızının xeyrinə tutulmalıdır. İddia tələbi qalan hissədə təmin edilməməlidir. Həmin məcəllənin 119.1-ci maddəsinə əsasən məhkəmə xərcləri ödənilmiş tələblərin məbləğinə mütanasib olaraq işdə iştirak edən şəxslərə aid edilir. İddiaçı aliment tələbi barədə iddia ərizəsinin verilməsinə görə dövlət rüsumunu ödəməkdən azaddır. MPM-in 119.2-ci maddəsinə və “Dövlət rüsumu haqqında” Qanunun 9.1.2-ci maddəsinə görə iddiaçı müəyyən olunmuş qaydada dövlət rüsumunun ödəməkdən azad edilmişsə, dövlət rüsumu iddianın təmin edilmiş hissəsinə münasib olaraq cavabdehdən tutlaraq dövlət gəlirinə alınır. MPM-in 112.1.6-cı maddəsinə görə iddianın qiyməti belə müəyyən olunur: aliment məbləğində, lakin bir ildən artıq olmamaq şərtilə. İddiaçı hər ay 235 manat sabit pul məbləğində aliment tələb etmiş, məhkəmə iddianı qismən təmin etməklə alimentin miqdarını hər ay 150 müəyyən etmişdir. Cavabdehin iddiaçıya hər ay 150 manat məbləğində aliment ödəməsi nəzərə alınarsa bu hesabla bir il ərzində ödəmə məbləğinin məcmusu 1.000 manatdan çoxdur. “Dövlət rüsumu haqqında” Qanunun 8.1.2-ci maddəsinə görə iddianın qiyməti 1.000 manatdan 10.000 manatadək olduqda iddia ərizəsinin verilməsinə görə 30 manat + 1.000 manatdan yuxarı olan iddia qiymətinin 1 faizi məbləğində dövlət rüsumu ödənilməlidir. Ona görə də cavabdeh Əliyev Kənan Vüqar oğlundan 38 manat miqdarında dövlət rüsumu alınaraq dövlət büdcəsinə köçürülməlidir. Şərh olunanlara əsasən, Azərbaycan Respublikası Ailə Məcəlləsinin 75 -78, 100, 112-ci və Azərbaycan Respublikası MPM-nin 216-220, 360-cı maddələrini rəhbər tutaraq, məhkəmə qət etdi: İddia tələbi qismən təmin edilsin. Cavabdeh Əliyev Kənan Vüqar oğlundan 30.04.2024-cü il tarixdən başlayaraq 13.12.2021-ci il təvəllüdlü Əliyev Ərkan Kənan oğlunun yetkinlik yaşına çatana kimi saxlanılması üçün hər ay 150 ( yüz əlli manat) manat sabit pul məbləğində aliment iddiaçı Əliyeva Aytən Kamal qızına ödənilsin. Cavabdeh Əliyev Kənan Vüqar oğlundan 38 (otuz səkkiz) manat miqdarında dövlət rüsumu alınaraq dövlət büdcəsinə köçürülsün. İddia tələbi qalan hissədə təmin edilməsin. Qətnamə dərhal icraya yönəldilsin. Qətnamə rəsmi qaydada verildiyi gündən bir ay müddətində “elektron məhkəmə informasiya sistemində yaradılan elektron kabinetdən istifadə edilməklə” Ağstafa Rayon Məhkəməsi vasitəsi ilə Gəncə Apellyasiya Məhkəməsinə apellyasiya şikayəti verilə bilər. Məhkəmə qətnaməsindən şikayət verilməmişdirsə, qəbul edildiyi gündən 1 (bir) ay keçdikdən sonra qanuni qüvvəyə minir. Hakim: Zamiq Rəsulov