Kürdəmir Rayon Məhkəməsi Qətnamə — İş №2(041)-1916/2023

Azərbaycan Respublikası adından QƏTNAMƏ Kürdəmir rayon İş № 2(041)-1916/2023 14.12.2023 KÜRDƏMİR RAYON MƏHKƏMƏSİ Azərbaycan Respublikası Kürdəmir rayon məhkəməsi Hakim Bayramov Müseyib Seyfəddin oğlunun sədrliyi, Cəbiyev Yaşar İlham oğlunun katibliyi, İddiaçı və Cavabdeh Nurəddin oğlunun iştirakı ilə İddiaçı Cavabdeh Nurəddin oğluna qarşı aliment tələbinə dair mülki işə Kürdəmir şəhəri, H.Əliyev prospekti, 22 ünvanda məhkəmənin inzibati binasında açıq məhkəmə iclasında baxaraq, MÜƏYYƏN ETDİ: İddiaçı məhkəməyə iddia ərizəsi ilə müraciət edərək xx.xx.2022-ci il tarixdə anadan olmuş Rəhimə və xx.xx.2023-cü il tarixdə anadan olmuş Elcan adlı uşaqların yetkinlik yaşına çatana kimi saxlanılması üçün hər ay hər uşaq üçün sabit pul məbləğində 220 manat aliment alınaraq ona verilməsi barədə qətnamə çıxarılmasını xahiş etmişdir. Məhkəmə iclasında İddiaçı iddia tələbini müdafiə edərək göstərdi ki, o, Cavabdeh Nurəddin 2021-ci ildə evlənmiş və münasibətləri normal olmuşdur. Birgə yaşadıqları müddətdə xx.xx.2022-ci il tarixdə Rəhimə və xx.xx.2023-cü il tarixdə Elcan adlı 2 uşaqları anadan olmuşdur. Aralarında heç bir düşmənçilik, ədavət olmamışdır. Lakin son zamanlar cavabdeh Elşənin evdə söz-söhbət salması səbəbindən münasibətləri pisləşmiş və tez-tez evdə onu incitmişdir. Uşaqlarına görə onun həmin hərəkətlərinə dözsə də, sonra dözə bilməyib ondan ayrılmışdır. Hazırda azyaşlı uşaqları ilə birlikdə öz valideynlərinin himayəsində yaşayır və heç bir yerdə işləmədiyinə görə uşaqları saxlamaqda çətinlik çəkir. Cavabdehdən ayrıldıqdan sonra o, uşağı ilə maraqlanmamış və ona heç bir maddi yardım etməmişdir. Cavabdeh özü fərdi əməklə məşğul olur və ay ərzində kifayət qədər pul qazanır və onun uşaqlarına yüksək məbləğdə aliment ödəməyə maddi imkanı var. Ona görə də xx.xx.2022-ci il tarixdə anadan olmuş Rəhimə və xx.xx.2023-cü il tarixdə anadan olmuş Elcan adlı uşaqların yetkinlik yaşına çatana kimi saxlanılması üçün hər ay hər uşaq üçün sabit pul məbləğində 220 manat aliment alınaraq ona verilməsi barədə qətnamə çıxarılmasını xahiş etdi. Məhkəmə iclasında Cavabdeh Nurəddin oğlu iddia tələbini qismən qəbul edərək göstərdi ki, 2021-ci ildə İddiaçı ilə evlənib ailə qurmuş, lakin nikahlarını rəsmi qeyd etdirməmişlər. Ər-arvad bir yerdə yaşadıqları müddətdə xx.xx.2022-ci il tarixdə Rəhimə və xx.xx.2023-cü il tarixdə Elcan adlı 2 uşaqları olmuşdur. İddiaçı ilə münasibətləri əvvəllər normal olsada sonradlan münasibətləri pozulmuş və iddiaçı ondan ayrılaraq 2 azyaşlı uşaqları ilə birlikdə öz valideynlərinin evinə getmiş və hazırda da valideynlərinin evində yaşayır. O, iddiaçı ilə barışmaq istəyir. Onun iddiaçının tələb etdiyi miqdarda aliment verməyə maddi imkanı yoxdur, o, iddiaçıya 2 uşağa görə 150-160 manat aliment ödəyə bilər. Ona görə də iddia tələbinin qismən təmin edilməsi barədə qətnamə çıxarılmasını xahiş etdi. İş materiallarına əlavə edilmiş Azərbaycan Respublikası vətəndaşının AA4833899 nömrəli Şəxsiyyət vəsiqəsinin surətindən görünür ki, tərəflərin faktiki nikahlarından xx.xx.2022-ci il tarixdə Rəhimə adlı uşaqları doğulmuşdur. İş materiallarına əlavə edilmiş xx.xx.2023-cü il tarixli, AZ-İV 890246 nömrəli Doğum haqqında şəhadətnamənin surətindən görünür ki, tərəflərin faktiki nikahlarından xx.xx.2023-cü il tarixdə Elcan adlı bir uşaqları olmuşdur. Məhkəmə iddiaçının və cavabdehin izahatlarını dinləyib, habelə işdə olan sənədləri hərtərəfli, obyektiv araşdıraraq sübutlara hüquqi qiymət verib hesab edir ki, iddia tələbi qismən təmin edilməlidir. Belə ki, məhkəmə iclasında tədqiq olunmuş sübutlarla müəyyən edildi ki, İddiaçı Cavabdeh Nurəddin 2021-ci ildə evlənmiş və münasibətləri normal olmuşdur. Birgə yaşadıqları müddətdə xx.xx.2022-ci il tarixdə Rəhimə və xx.xx.2023-cü il tarixdə Elcan adlı 2 uşaqları anadan olmuşdur. Aralarında heç bir düşmənçilik, ədavət olmamışdır. Lakin son zamanlar cavabdeh Elşənin evdə söz-söhbət salması səbəbindən münasibətləri pisləşmiş və tez-tez evdə onu incitmişdir. Uşaqlarına görə onun həmin hərəkətlərinə dözsə də, sonra dözə bilməyib ondan ayrılmışdır. Hazırda azyaşlı uşaqları ilə birlikdə öz valideynlərinin himayəsində yaşayır və heç bir yerdə işləmədiyinə görə uşaqları saxlamaqda çətinlik çəkir. Cavabdehdən ayrıldıqdan sonra o, uşağı ilə maraqlanmamış və ona heç bir maddi yardım etməmişdir. Cavabdehi isə iddiaçı ilə faktiki nikahlarından doğulmuş uşaqların saxlanması üçün iddiaçıya hər ay 150-160 manat aliment ödəməyə imkanının olduğunu bildirmişdir. İddiaçı cavabdehin gəlirləri barədə məhkəməyə hər hansı mötəbər sübut təqdim etməmişdir. Ona görə də cavabdehin iş yeri və aylıq qazancı barədə rəsmi məlumat olmadığından aliment tələb edən şəxsin xahişi ilə alimentin miqdarı sabit pul məbləbində müəyyən edilə bilər. Azərbaycan Respublikası Mülki Prosessual Məcəlləsinin 14.2-ci maddəsinə əsasən məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 77.1-ci madldəsinə görə hər bir tərəf öz tələblərinin və etirazlarının əsası kimi istinad etdiyi halları sübut etməlidir. Azərbaycan Respublikası Konstitusiyasının 17-ci maddəsinin İİ bəndində göstərilir ki, uşaqların qayğısına qalmaq və onları tərbiyə etmək valideynlərin borcudur. Bu borcun yerinə yetirilməsinə dövlət nəzarət edir. Azərbaycan Respublikası Konstitusiyasının 34-cü maddəsinin 4-cü bəndinə əsasən uşaqlara qayğı göstərmək, onları tərbiyə etmək valideynlərin həm hüququ, həm də vəzifəsidir. “Uşaq hüquqları haqqında” Azərbaycan Respublikası Qanununun 5-ci maddəsinə əsasən dövlət orqanları, bütün fiziki və hüquqi şəxslər öz fəaliyyətində uşaqların mənafelərini üstün tutmalı, onların hüquqlarının təmin olunmasına şərait yaratmalıdırlar. Həmin Qanunun 8-ci maddəsinə əsasən hər uşağın yaşamaq, normal şəraitdə fiziki, əqli və mənəvi cəhətdən inkişaf etmək hüququ vardır. Dövlət bu şəraiti təmin edən iqtisadi, sosial hüquq və digər tədbirlər görməyi sağlam və təhlükəsiz mühit yaratmağı öz öhdəsinə götürür. Həmin Qanunun 13-cü maddəsinə əsasən uşağın Azərbaycan Respublikasının qanunvericiliyi ilə müəyyən edilmiş minimum dolanacaq xərclərindən az olmayan maddi təminat almaq hüququ vardır. Həmin Qanunun 19-cu maddəsinə əsasən uşağın qabiliyyətinin inkişaf etdirilməsi, onun maddi və mənəvi tələbatlarının təmin edilməsi, hüquq və mənafelərinin mühafizəsi valideynlərin əsas vəzifəsidir. “Uşaq hüquqları haqqında” BMT-nin 12 noyabr 1989-cu il tarixli Konvensiyasının 3-cü maddəsinə əsasən uşaqlar barəsində bütün tədbirlərdə əsas diqqət uşaq mənafelərinin daha yaxşı təmin edilməsinə yönəldilir, istər bu tədbirlər sosial təminat məsələləri ilə məşğul olan dövlət idarələri və ya özəl idarələr tərəfindən görülsün, istərsə də məhkəmələr, inzibati və ya qanunverici orqanlar tərəfindən edilsin. Həmin Konvensiyanın 27-ci maddəsinə əsasən hər bir uşaq özünün fiziki, əqli, mənəvi, əxlaqi və sosial inkişafı üçün lazımi həyat səviyyəsi hüququna malikdir. Lazımi həyat səviyyəsinin təmin edilməsi üçün əsas məsuliyyəti valideynlər daşıyır. Azərbaycan Respublikası Ailə Məcəlləsinin 22.2.2-ci maddəsinə əsasən məhkəmə uşaqlar üçün alimentin hansı valideyndən və hansı miqdarda tutulduğunu müəyyən etməlidir. Həmin Məcəllənin 75.1-ci maddəsinə əsasən valideynlər uşaqlarını saxlamağa borcludurlar. Həmin Məcəllənin 75.4-cü maddəsinə görə, valideynlər uşaqlarını saxlamadıqda uşaqların saxlanması üçün vəsait (aliment) valideynlərdən məhkəmə qaydasında tutulur. Həmin Məcəllənin 78.1-ci maddəsinə əsasən valideynlər arasında yetkinlik yaşına çatmayan uşaqlara aliment ödənilməsi barədə saziş yoxdursa, eləcə də aliment verməyə borclu olan valideynin qazancı (gəliri) qeyri-müntəzəm, dəyişən olarsa, ya qazancın (gəlirin) hamısı və ya bir hissəsini həmin valideyn natura və ya xarici valyuta ilə alırsa, yaxud onun qazancı və ya sair gəliri yoxdursa, habelə alimentin valideynin qazancından (gəlirindən) müəyyən hissə kimi tutulması mümkün olmadığı, çətinlik törətdiyi və tərəflərdən birinin və ya marağının əhəmiyyətli dərəcədə pozulduğu başqa hallarda, uşaqların saxlanması üçün vəsati tutulmasını tələb edən şəxsin xahişi ilə alimentin miqdarı məhkəmə tərəfindən hər ay ödənilməli olan sabit pul məbləğində və ya eyni zamanda həm sabit pul məbləğində, həm də bu Məcəllənin 76-cı maddəsinə uyğun olaraq qazancın (gəlirin) müəyyən hissəsi kimi müəyyən edilə bilər. Həmin Məcəllənin 78.2-ci maddəsinə əsasən sabit pul məbləğinin miqdarı məhkəmə tərəfindən tərəflərin maddi və ailə vəziyyəti, diqqətəlayiq olan digər hallar nəzərə alınmaqla uşağın əvvəlki təminatının səviyyəsinin mümkün qədər maksimal saxlanması əsas tutularaq müəyyən edilir. Azərbaycan Respublikasında 2023-cü il üçün yaşayış minimumu haqqında Azərbaycan Respublikası Qanununun İ bəndinə əsasən yaşayış minimumu ölkə üzrə uşaqlar üçün 220 manat məbləğində müəyyən edilmişdir. Ona görə də məhkəmə hesab edir ki, valideynlərin öz uşaqları üzərində bərabər hüquq və vəzifələrə malik olması, cavabdehin maddi və əmlak vəziyyəti, aliment alan uşaqların mənafeyi nəzərə alınaraq alimentin məbləği hər ay sabit pul məbləğində hər uşağa görə 170 manat miqdarında müəyyən edilməklə xx.xx.2022-ci il tarixdə anadan olmuş X1 və xx.xx.2023-cü il tarixdə X2 yetkinlik yaşına çatana kimi saxlanmaları Cavabdeh Nurəddin oğlundan tutularaq İddiaçı verilməsi məqsədə müvafiqdir. İş materiallarından göründüyü kimi İddiaçı aliment tələbi ilə bağlı məhkəməyə xx.xx.2023cü il tarixdə müraciət etmişdir. Ona görə də məhkəmə Azərbaycan Respublikası Ailə Məcəlləsinin 100.2-ci maddəsinin tələbinə əsasən hesab edir ki, aliment xx.xx.2023-cü il tarixdən tutulmalıdır. Azərbaycan Respublikası Ailə Məcəlləsinin 100.2-ci maddəsində göstərilir ki, aliment məhkəməyə müraciət edildiyi vaxtdan tutulur. Azərbaycan Respublikası Mülki Prosessual Məcəlləsinin 119.2-ci maddəsinə uyğun olaraq alimentin alınması barədə iddialar üzrə iddiaçılar dövlət rüsumu ödəməkdən azad olunurlar. İddiaçı müəyyən olunmuş qaydada dövlət rüsumu ödəməkdən azad edilmişsə, dövlət rüsumu iddianın təmin edilmiş hissəsinə münasib olaraq cavabdehdən tutularaq dövlət gəlirlərinə alınır. Ona görə də qanunun tələbinə əsasən Cavabdeh ödəniləcək illik alimentin həcminə görə 60,80 manat dövlət rüsumu tutulmalıdır. Azərbaycan Respublikası Mülki Prosessual Məcəlləsinin 233.1-ci maddəsində göstərilir ki, məhkəmə qətnaməsindən şikayət verilməmişdirsə, qəbul edildiyi gündən 1 ay keçdikdən sonra qanuni qüvvəyə minir. Həmin Məcəllənin 234.2.1-ci maddəsinin tələbinə görə şəxsin saxlanması üçün vəsaitlərin, o cümlədən alimentlərin alınması haqqında qətnamələr dərhal icra edilir və qətnamədən şikayətin verilməsi onun icrasını dayandırmır. Yuxarıda göstərilənləri və Azərbaycan Respublikası Mülki Prosessual Məcəlləsinin 216- 220, 227, 233 və 360-cı maddələrini rəhbər tutaraq, məhkəmə QƏT ETDİ: İddia tələbi qismən təmin edilsin. İddiaçı ilə Cavabdeh Nurəddin oğlunun faktiki nikahlarından doğulmuş xx.xx.2022-ci il təvəllüdlü X1 və xx.xx.2023-cü il təvəllüdlü X2 yetkinlik yaşına çatanadək saxlanmaları üçün 31 oktyabr 2023-cü il tarixdən başlayaraq Cavabdeh Nurəddin oğlundan hər ay hər uşağa görə sabit pul məbləğində 170 manat olmaqla, cəmi 340 (üç yüz qırx) manat aliment tutularaq İddiaçı ödənilsin. Cavabdeh Nurəddin oğlundan ödəniləcək illik alimentin həcminə görə 60,80 (altmış manat səksən qəpik) manat dövlət rüsumu tutularaq dövlət büdcəsinə ödənilsin. Qətnamə dərhal icraya yönəldilsin. Qətnamədən rəsmi qaydada verildiyi gündən tərəflər bir ay müddətində Kürdəmir rayon məhkəməsi vasitəsilə Şirvan Apellyasiya məhkəməsinə apellyasiya şikayəti verilə bilər. Sədrlik edən: Müseyib Bayramov