Azərbaycan Respublikası adından QƏTNAMƏ Masallı rayonu İş № 2(050)-3187/2025 03.11.2025 MASALLI RAYON MƏHKƏMƏSİ Hakim Hüseynov Elşən Təbrizoviçin sədrliyi, Məhkəmə iclas katibi Səfərli İbrahim İqrar oğlunun katibliyi, İddiaçı iştirakı ilə İddiaçı cavabdeh Rəsulova (Parçal) (Parçal) Ağsubə Nəsir qızına qarşı “aliment” tələbinə dair mülki işə audio və video çəkiliş vasitəsi ilə məhkəmənin inzibati binasında açıq məhkəmə iclasında baxaraq, məhkəmə Müəyyən etdi: Tələb:
1. İddiaçı cavabdeh Rəsulova (Parçal) Ağsubə Nəsir qızına qarşı “aliment” tələbinə dair iddia ərizəsi ilə məhkəməyə müraciət edərək, cavabdeh Rəsulova (Parçal) Ağsubə Nəsir qızından övladları – 04 iyun 2013-cü il təvəllüdlü X9 və 16 sentyabr 2014-cü il təvəllüdlü İddiaçı oğlunun saxlanılması üçün minimum əmək haqqının 0,615 misli məbləğində, yəni hər uşağa hər ay 246 (iki yüz qırx altı) manat, iki uşağa cəmi 492 (dörd yüz doxsan iki) manat məbləğində alimentin tutulması barədə qətnamə qəbul edilməsini xahiş etmişdir.
2. Sonradan İddiaçı iddia ərizəsinə dəqiqləşdirmə təqdim edərək 16 sentyabr 2014cü il təvəllüdlü X4 adı texniki səhv nəticəsində “İddiaçı oğlu” qeyd edildiyindən iddia ərizəsində uşağın adının düzgün qaydada - 16 sentyabr 2014-cü il təvəllüdlü X2 əvəz olunmasını xahiş etmişdir.
İddia ərizəsinin əsaslandırıldığı hallar:
3. İddiаçı iddiа tələbini оnunlа əsаslаndırmışdır ki, cavabdeh Rəsulova (Parçal) Ağsubə Nəsir qızı ilə xasiyyətlərinin uyğun gəlməməsi səbəbindən Masallı Rayon Məhkəməsinin 14 oktyabr 2022-ci il tarixli, 2(050)-2889 saylı qətnaməsinə əsasən nikahları pozulmuşdur. Birgə nikahdan olan 04 iyun 2013-cü il təvəllüdlü X9 və 16 sentyabr 2014-cü il təvəllüdlü X6 adlı uşaqları onun yanında saxlanılaraq himayəsinə verilmişdir. Cavabdeh Rəsulova (Parçal) Ağsubə Nəsir qızı nikah pozulduğu zaman onu inandırmışdır ki, məhkəmə qaydasında aliment kəsilməsinə ehtiyac yoxdur, o, hər ay uşaqların maddi tələbatlarını vaxtında ödəyəcək. Bu səbəbdən o, məhkəmədə cavabdehdən aliment tələb etməmişdir. Lakin sonradan Ağsubə Rəsulova (Parçal) verdiyi vədi yerinə yetirməmiş, övladlarına heç bir maddi dəstək göstərməmişdir. Hazırda o, uşaqların təlim-tərbiyəsi ilə yanaşı, iki övladının bütün maddi tələbatlarını da, ödəməyə çalışır. Uşaqlar böyüdükcə onların maddi ehtiyacları və gündəlik xərcləri artır. Eyni zamanda, ərzaq, geyim, məktəb ləvazimatları və dərsliklər üçün xeyli vəsait tələb olunur. Cavabdeh Rəsulova (Parçal) Ağsubə Nəsir qızı valideyn kimi övladlarına könüllü şəkildə maddi kömək göstərmək istəmədiyindən alimentin məhkəmə qaydasında ödənilməsini məqsədəuyğun hesab edir. Ölkə qanunvericiliyi qiymətlərin artımını nəzərə alaraq uşaqlar üçün müəyyən edilən yaşayış minimumunu hər il artırır. Buna görə də qanunvericiliyin tələbləri rəhbər tutulmaqla, onun yanında saxlanılan uşaqlar üçün də aliment müəyyən edilməlidir.
Cabahdehin etirazı:
4. Cavabdeh Rəsulova (Parçal) Ağsubə Nəsir qızı etiraz ərizəsini onunla əsaslandırmışdır ki, Masallı Rayon Məhkəməsində Nicat tərəfindən ona qarşı aliment tələbi ilə bağlı işə baxılır. İddiaçının qoyduğu aliment tələbinə qismən etiraz edir və məhkəmədən mövcud vəziyyətinin nəzərə alınmasını xahiş edir. Belə ki, nikah pozulduğu zaman tərəflər qarşılıqlı razılığa gələrək uşaqları - Yaqub Rəsulov və Cahangir Rəsulovun qəyyumluğunu (velayətini) iddiaçıya vermiş və həmin vaxt aliment tələb etməmək şərti ilə razılaşmışlar. Sonrakı dövrlərdə dəfələrlə uşaqları ilə görüşmək və onlarla ünsiyyət qurmaq istəsə də, iddiaçı bunu təmin etməmiş, hətta məhkəmənin ona həftədə iki dəfə görüş hüququnu da, pozmuşdur. O, işlədiyi zaman uşaqlarına maddi dəstək göstərmək, onların ehtiyaclarını qarşılamaq niyyətində olmuş, lakin iddiaçı buna da, imkan verməmiş, uşaqlarla hər cür əlaqəsini məhdudlaşdırmışdır. Hal-hazırda onun azyaşlı körpə övladı vardır (11 fevral 2025-ci il tarixdə doğulub). Bu səbəbdən onun işləmək imkanı yoxdur və maddi vəziyyəti son dərəcə məhduddur. Buna görə də, iddiaçının tələb etdiyi məbləğdə aliment ödəməyə imkanı yoxdur. Yalnız ayda 50 (əlli) manat məbləğində aliment ödəyə bilər və bundan artıq öhdəlik götürməsi real vəziyyətinə uyğun deyildir. Məhkəmədən iddiaçının tələb etdiyi aliment məbləği azaldılaraq onun real maddi vəziyyətinin nəzərə alınmasını və azyaşlı körpə uşağının olması nəzərə alınaraq, qanunvericiliyin ona verdiyi hüquq və imkanlar təmin edilməsini xahiş etmişdir.
Tərəflərin izahatları:
5. Məhkəmə baxışı iclasında iştirak etmiş İddiaçı iddia ərizəsinin məzmununa uyğun izahat verərək iddia tələbinin tam şəkildə təmin edilməsini məhkəmədən xahiş etmişdir.
6. Cavabdeh Rəsulova (Parçal) Ağsubə Nəsir qızına məhkəmə baxışı iclasının vaxtı və yeri barədə bildiriş verilməsinə baxmayaraq məhkəmə iclasına gəlməmiş, gəlməməsinin səbəbi barədə məhkəməyə məlumat verməmişdir.
7. Azərbaycan Respublikası Mülki Prosessual Məcəlləsinin 185.5-ci maddəsinə əsasən məhkəmə iclasının vaxtı və yeri haqqında lazımi qaydada xəbərdar edilmiş cavabdehin gəlməməsinin səbəbləri haqqında məlumat olmadıqda və ya məhkəmə gəlməməyin səbəblərini üzürsüz hesab etdikdə, yaxud məhkəmə cavabdehin icraatı qəsdən yubandırdığını aşkar etdikdə, işə baxmağa haqlıdır. Bu halda qətnamə çəkişmə şəraitində qəbul edilmiş kimi qiymətləndirilərək cavabdehə apellyasiya qaydasında şikayət etmək hüququ verilir.
8. Məhkəmə işə cavabdehin iştirakı olmadan baxılmasını mümkün hesab etmişdir.
İş materialları:
9. Masallı Rayon Məhkəməsinin 2(050)-2889/2022 nömrəli 13 oktyabr 2022-ci il tarixli qətnaməsindən görünür ki, iddia təmin edilərək, İddiaçı ilə Rəsulova (Parçal) Ağsubə Nəsir qızı arasında 03 fevral 2015-ci il tarixdə Masallı RİHB-nin Mahmudavar ərazi nümayəndəliyində 03 nömrə ilə qeyd edilmiş nikahın pozulması, 04 iyun 2013-cü il təvəllüdlü X9 və 16 sentyabr 2014-cü il təvəllüdlü X4 ataları İddiaçı yanında saxlanılması qət edilmişdir.
10. AZE seriyalı 11334054 nömrəli şəxsiyyət vəsiqənin surətindən görünür ki, 04 iyun 2013-cü il təvəllüdlü X3 rayonu, Mololon kəndində doğulmuşdur.
11. AA seriyalı ******* nömrəli şəxsiyyət vəsiqənin surətindən görünür ki, 16 sentyabr 2014-cü il təvəllüdlü X1 rayonu, Mololon kəndində doğulmuşdur.
12. “İlkin mediasiya sessiyasında iştirak edilməməsi” barədə 05 sentyabr 2025-ci il tarixli, MŞM/MT036/2025-00868 nömrəli arayışdan görünür ki, 05 sentyabr 2025-ci il tarixdə keçirilən ilkin mediasiya sessiyasında Rəsulova (Parçal) Ağsubə Nəsir qızı iştirak etməmişdir. İddiaçı ilkin mediasiya sessiyasında iştirak etmiş və ilkin mediasiya sessiyasının keçirilməsi üçün 60 manat ödəmişdir.
13. Azərbaycan Respublikası Dövlət Sərhəd Xidməti Sərhəd Nəzarəti tərəfindən sorğuya cavab olaraq göndərilmiş 28 oktyabr 2025-ci il tarixli məktubdan görünür ki, xx xxxxxx 1997-ci il təvəllüdlü Rəsulova (Parçal) (Parçal) Ağsudə Nəsir qızının dövlət sərhədindən sonuncu dəfə hərəkəti barədə İAMAS bazasında qeydə alınmış məlumatda tarix – 29 noyabr 2022 (çıxış) kimi göstərilmişdir.
İşin faktiki halları:
14. Bеləliklə məhkəmə iclasında müəyyən edilmişdir ki, İddiaçı ilə cavabdeh Rəsulova (Parçal) Ağsubə Nəsir qızı arasında nikah Masallı Rayon Məhkəməsinin 13 oktyabr 2022-ci il tarixli qətnaməsi ilə pozulmuşdur. Birgə nikahlarından iki övladları vardır. 04 iyun 2013-cü il təvəllüdlü X9 və 16 sentyabr 2014-cü il təvəllüdlü X6 iddiaçı ilə bərabər yaşayır. Hazırda iddiaçı uşağın saxlanılmasında çətinlik çəkir. Bu səbəbdən iddiaçı uşaqların yetkinlik yaşına çatana qədər saxlanılması üçün hər ay hər uşaq üçün 246 manat sabit pul məbləğində alimentin təyin edilməsini xahiş etmişdir.
Tətbiq edilən hüquq:
15. Azərbaycan Respublikası Konstitusiyasının: 17-ci maddəsinə əsasən uşaqların qayğısına qalmaq və onları tərbiyə etmək valideynlərin borcudur.
16. “Uşaq Hüquqları haqqında” Konvensiyasının: 3-cü maddəsin əsasən Sosial təminat məsələləri ilə məşğul olan dövlət idarələri və ya özəl idarələr, habelə məhkəmələr, inzibati orqanlar, yaxud qanunvericilik orqanları tərəfindən həyata keçirilib-keçirilməməsindən asılı olmayaraq uşaqlar barəsində keçirilən bütün tədbirlərdə uşağın maraqlarının daha yaxşı təmin edilməsinə ilk növbədə diqqət yetirilir.
17. “Uşaq hüquqları haqqında” Azərbaycan Respublikası Qanununun: 13-cü maddəsinə əsasən uşağın Azərbaycan Respublikasının qanunvericiliyi ilə müəyyən edilmiş minimum dolanacaq xərclərindən az olmayan maddi təminat almaq hüququ vardır. 19-cu maddəsinə əsasən valideynlərin uşağın təbiyəsində bərabər hüquq və vəzifələri vardır. Uşağın qabiliyyətinin inkişaf etdirilməsi, onun maddi və mənəvi tələbatlarının təmin edilməsi, hüquq və mənafelərinin mühafizəsi valideynlərin əsas vəzifələridir.
18. Azərbaycan Respublikasının Ailə Məcəlləsinin: 75.1-ci maddəsinə əsasən valideynlər uşaqlarını saxlamağa borcludurlar. 75.4-cü maddəsinə əsasən valideynlər uşaqlarını saxlamadıqda uşaqların saxlanması üçün vəsait (aliment) valideynlərdən məhkəmə qaydasında tutulur. 78.1-ci maddəsinə əsasən valideynlər arasında yetkinlik yaşına çatmayan uşaqlara aliment ödənilməsi barədə saziş yoxdursa, eləcə də aliment verməyə borclu olan valideynin qazancı (gəliri) qeyri-müntəzəm, dəyişən olarsa, ya da qazancın (gəlirin) hamısını və ya bir hissəsini həmin valideyn natura və ya xarici valyuta ilə alırsa, yaxud onun qazancı və ya sair gəliri yoxdursa, habelə alimentin valideynin qazancından (gəlirindən) müəyyən hissə kimi tutulması mümkün olmadığı, çətinlik törətdiyi və ya tərəflərdən birinin marağını əhəmiyyətli dərəcədə pozduğu başqa hallarda, uşaqların saxlanması üçün vəsait tutulmasını tələb edən şəxsin xahişi ilə alimentin miqdarı məhkəmə tərəfindən hər ay ödənilməli olan sabit pul məbləğində, həm də bu Məcəllənin 76-cı maddəsinə uyğun olaraq qazancın (gəlirin) müəyyən hissəsi kimi müəyyən edilə bilər. 78.2-ci maddəsinə əsasən sabit pul məbləğinin miqdarı məhkəmə tərəfindən tərəflərin maddi və ailə vəziyyəti, diqqətəlayiq olan digər hallar nəzərə alınmaqla uşağın əvvəlki təminatının səviyyəsinin mümkün qədər maksimal saxlanması əsas tutularaq müəyyən edilir. 100.2-ci maddəsinə əsasən aliment məhkəməyə müraciət edildiyi vaxtdan tutulur.
19. “Azərbaycan Respublikası Ailə Məcəlləsinin 76, 78 və 112-ci maddələrinin şərh edilməsinə dair” Azərbaycan Respublikası Konstitusiya Məhkəməsinin Plenumunun 27 iyul 2016-cı il tarixli Qərarı: Aliment ödənilməsi barədə saziş olmadıqda məhkəmə Azərbaycan Respublikası Ailə Məcəlləsinin 76.2 və 78.2-ci maddələrinə, bu Qərarda formalaşmış hüquqi mövqeyə uyğun olaraq, hər iki tərəfin maddi və ailə vəziyyəti və diqqətəlayiq digər hallarla yanaşı, uşağın əvvəlki təminatının səviyyəsinə də qiymət verməlidir. Bu Qərarın 1-ci bəndində göstərilən hallara qiymət verərkən məhkəmə, həmçinin nəzərə almalıdır ki, “Uşaq hüquqları haqqında” Azərbaycan Respublikası Qanununun 13-cü maddəsinə uyğun olaraq, uşağın Azərbaycan Respublikasının qanunvericiliyi ilə müəyyən edilmiş minimum dolanacaq xərclərindən az olmayan maddi təminat almaq hüququ vardır.
20. “Nikahın pozulması, boşanmadan sonra yetkinlik yaşına çatmayan uşaqların valideynlərdən hansının yanında qalması və uşaqlar üçün valideynlərdən aliment tutulması tələbinə dair işlərə baxılarkən qanunvericiliyin məhkəmələr tərəfindən tətbiqi təcrübəsi haqqında” Azərbaycan Respublikası Ali Məhkəməsinin Plenumunun 28 mart 2016-cı il tarixli 8-2/2016 nömrəli Qərarı: 8.2-ci bəndi ilə məhkəmələrə izah edilmişdir ki, uşağın Azərbaycan Respublikasının qanunvericiliyi ilə müəyyən edilmiş minimum dolanacaq xərclərindən az olmayan maddi təminat almaq hüququ vardır (“Uşaq hüquqları haqqında” Azərbaycan Respublikası Qanununun 13-cü maddəsi). Aliment ödəyən əmək qabiliyyətli valideynin rəsmi olaraq heç bir yerdə işləməməsi və qazanca malik olmaması onu uşağı saxlamaq, qanunvericiliklə müəyyən olunmuş minimum dolanacaq xərclərindən az olmayan maddi təminatı ödəmək vəzifəsindən azad etmir.
21. "Əhalinin sosial rifahının yaxşılaşdırılması sahəsində tədbirlərin davam etdirilməsi haqqında" Azərbaycan Respublikası Prezidentinin 23 dekabr 2024-cü il tarixli sərəncamı: 2025-ci il üçün minimum əmək haqqı 400 manat məbləğində müəyyən edilmişdir.
22. “Azərbaycan Respublikası Ali Məhkəməsi Plenumunun bəzi qərarlarında dəyişiklik edilməsi barədə” Azərbaycan Respublikası Ali Məhkəməsi Plenumunun 20 dekabr 2024-cü il tarixli, 15 nömrəli Qərarı: 1.2.1. 8.4-cü bəndə əsasən aşağıdakı məzmunda 8.4-1, 8.4-2 və 8.4-3-cü yarımbəndlər əlavə edilmişdir: 8.4-1. Ailə Məcəlləsinin 110.2-ci maddəsinə əsasən alimentin indeksasiyası məqsədi üçün məhkəmə tərəfindən onun miqdarı müəyyən olunmuş minimum əmək haqqı məbləğinin müəyyən mislinə uyğun sabit pul məbləğində müəyyən edilir. İstinad edilən maddənin tələbindən göründüyü kimi məhkəmələr sabit pul məbləğində aliment təyin edərkən onun miqdarını ölkə üzrə minimum əmək haqqı məbləğinin müvafiq misli həddində müəyyən etməlidirlər. 8.4-2-ci bəndinə əsasən Ailə Məcəlləsinin 110.1-ci maddəsinə əsasən bu Qərarın 8.4-1-ci bəndində göstərilən qaydada tutulan alimentin indeksasiyası ölkə üzrə müəyyən edilən minimum əmək haqqı məbləğinin artımına mütənasib olaraq alimentin tutulmasını həyata keçirən təşkilatın müdiriyyəti (borclunun rəsmi iş yerinin olduğu halda işəgötürən, rəsmi iş yerinin olmadığı halda isə icra qurumunun rəhbəri) tərəfindən müəyyən edilməlidir.
Məhkəmə baxışının hədləri:
23. Azərbaycan Respublikası Mülki Prosessual Məcəlləsinin: 14.2-ci maddəsinə əsasən məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. 77.1-ci maddəsinə müvafiq olaraq hər bir tərəf öz tələblərinin və etirazlarının əsası kimi istinad etdiyi halları sübut etməlidir. 88-ci maddəsinə əsasən məhkəmə sübutlara obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli hüquq normalarına müvafiq olaraq qiymət verir. Heç bir sübutun məhkəmə üçün qabaqcadan müəyyən edilmiş qüvvəsi yoxdur. 107-ci maddəsinə əsasən məhkəmə xərcləri dövlət rüsumundan və işə baxılması ilə əlaqədar olan məsrəflərdən ibarətdir. 112.1.3-cü maddəsinə əsasən iddianın qiyməti aliment alınması haqqındakı iddialarda bir il ərzində ödəmənin məcmusu ilə müəyyən edilir. 119.1-ci maddəsinə əsasən məhkəmə xərcləri ödənilmiş tələblərin məbləğinə mütənasib olaraq işdə iştirak edən şəxslərə aid edilir. 119.2-ci maddəsinə əsasən iddiaçı müəyyən olunmuş qaydada dövlət rüsumunu ödəməkdən azad edilmişsə, dövlət rüsumu iddianın təmin edilmiş hissəsinə mütənasib olaraq cavabdehdən tutularaq dövlət gəlirlərinə alınır. 217.4-cü maddəsinə əsasən, məhkəmə (hakim) öz qətnaməsini yalnız məhkəmə iclasında tədqiq olunmuş sübutlarla əsaslandırır. 234.2.1-ci maddəsinə əsasən şəxsin saxlanılması üçün vəsaitlərin, o cümlədən alimentlərin alınması haqqında qətnamələr dərhal icra olunur.
24. “Dövlət rüsumu haqqında” Azərbaycan Respublikası Qanununun: 9.1-1-ci maddəsinə əsasən “Mediasiya haqqında” Azərbaycan Respublikasının Qanununa uyğun olaraq mediasiya prosesinin nəticəsinə dair barışıq sazişi bağlanmadıqda məhkəməyə müraciət edərkən mediasiya prosesi ilə bağlı xərclərin öz üzərinə düşən hissəsini ödəmiş tərəf və ya həmin Qanunun 36.2-ci maddəsinə uyğun olaraq mediasiya xərclərini ödəmiş tərəf dövlət rüsumu ödəməkdən azad olunur. Bu Qanunda nəzərdə tutulmuş məbləği çəkilmiş xərclərdən artıq olduqda, tərəf çəkdiyi xərc həddində dövlət rüsumundan azad edilir. 9.1.2-ci maddəsinə əsasən aliment alınması barədə iddialar üzrə iddiaçılar dövlət rüsumu ödəməkdən azad olunurlar.
25. “Mediasiya haqqında” Azərbaycan Respublikası Qanununun: 36.5-ci maddəsinə əsasən “Mediasiya prosesinin tətbiqi barədə müqavilə”də və mediasiyaya dair qeyd-şərtdə başqa şərt nəzərdə tutulmayıbsa, həmçinin ilkin mediasiya sessiyasında tərəfin üzrsüz səbəbdən iştirak etməməsi halında digər tərəfin bütün mediasiya xərclərini ödədiyi hallar istisna olmaqla, mediasiyaya çəkilən xərclər tərəflər arasında bərabər şəkildə bölüşdürülür. Mediasiyaya dair qeyd-şərtə və ya “mediasiya prosesinin tətbiqi barədə müqavilə”nin şərtlərinə zidd olaraq mediasiyada, həmçinin ilkin mediasiya sessiyasında üzrsüz səbəbdən iştirak etməyən tərəf mediasiya ilə bağlı digər tərəfin çəkdiyi bütün mediasiya xərclərini ona ödəməlidir.
Məhkəmənin mövqeyi:
26. Məhkəmə iddiaçının izahatını dinləyib, iş üzrə toplanmış materialları tədqiq edib və araşdırılan sübutlara məcmu halında hüquqi qiymət verərək hesab edir ki, iddia qismən təmin edilməlidir.
27. Məhkəmə Azərbaycan Respublikası Ailə Məcəlləsinin yuxarıda göstərilən müddəalarını, habelə Azərbaycan Respublikası Konstitusiya Məhkəməsinin və Azərbaycan Respublikası Ali Məhkəməsinin Plenumunun anoloji işlərlə bağlı Qərarları ilə formalaşdırdıqları hüquqi mövqelərini nəzərə alaraq qeyd edir ki, qanunvericilik alimentin məbləğinin müəyyənləşdirilməsi zamanı uşağın əvvəlki təminatının səviyyəsinin mümkün qədər yüksək saxlanmasını əsas meyar kimi müəyyən etmişdir. Lakin bu zaman tərəflərin maddi və ailə vəziyyətləri, onların və uşaqların mənafeyini, cavabdehin aliment verməsinə dair maddi imkanlarını, tərəflərin maddi və ailə vəziyyətini, iddiaçının da, uşağın valideyni olaraq onu saxlamaq vəzifəsinin olmasını, mövcud iqtisadi vəziyyətdə infilyasiyanı, eləcə də hər bir konkret hal üzrə müəyyən olunmuş digər diqqətəlayiq hallar da, nəzərə alınmalıdır. Ölkə üzrə uşaqlar üçün müəyyən olunmuş yaşayış minimumu özlüyündə müəyyən meyar kimi çıxış etsə də, minimum təminat səviyyəsini nəzərdə tutur.
28. Məhkəmə hesab edir ki, qətnamə icra olunması üçün çıxarılır və qətnamə çıxarılarkən tərəflərin əsaslı mənafeləri nəzərə alınmalıdır.
29. Məhkəmə hesab edir ki, qətnamə icra olunması üçün çıxarılır və qətnamə çıxarılarkən tərəflərin əsaslı mənafeləri nəzərə alınmalıdır. İddiaçı bildirmişdir ki, özü fərdi əməklə məşğul olur, lakin cavabdehin işləməsi və hər ay hər uşaq üçün 246 manat, cəmi 492 manat məbləğində aliment ödəmək üçün maddi imkanının olması barədə heç bir sübut təqdim etməmişdir. Eyni zamanda “AZEMİS” elektron sistem məlumatlarında cavabdehin işləməsi barədə heç bir məlumat yoxdur. Belə olan halda cavabdeh tərəfindən hər ay hər uşaq üçün 246 manat, cəmi 492 manat məbləğində aliment ödənilməsi tamamilə absurddur. Bu səbəbdən məhkəmə yetkinlik yaşına çatmayan uşağın saxlanması üçün cavabdehdən iddiaçının xeyrinə sonrakı artımlar nəzərə alınmaqla, hər ay hər uşaq üçün ölkə üzrə müəyyən olunmuş minimum əmək haqqının 0,2 misli həddində (400 x 0,2 = 80 x 2=160 manat) alimentin tutulmasını daha ədalətli hesab edir. İddia tələbi digər hissədə təmin olunmamalıdır.
30. Məhkəmə hesab edir ki, Ailə Məcəlləsinin 100.2-ci maddəsinə əsasən alimentin tutulma müddətinin əvvəli iddia ərizəsinin məhkəməyə verildiyi 05 sentyabr 2025-ci il tarixdən hesablanmalıdır.
Məhkəmə xərcləri:
31. Hazırki halda, məhkəməyə iddia ərizəsi ilə müraciət edərkən iddiaçı dövlət rüsumu ödəməkdən azad olunmuşdur. Rəsulova (Parçal) Ağsubə Nəsir qızından tutulmuş (400x0,2= 80x2=160=160x12) alimentin bir illik məcmusu 1920 manat təşkil edir təşkil edir ki, ona görə 39,20 manat dövlət rüsumu ödənilməlidir. Hazırki halda, alimentin tutulması ilə bağlı ödənilməli olan 39,20 manat dövlət rüsumu iddiaçı tərəfindən ödənilmiş 60 manat məbləğində mediasiya xərcindən az olduğundan, cavabdeh ödəməli olduğu dövlət rüsumunu ödəməkdən azad olunur.
32. Məhkəmə hesab edir ki, iddia tələbi qismən təmin edildiyindən və iddiaçı tələb etmədiyindən mediasiya üçün ödənilmiş 60 (altmış) manat dövlət rüsumu iddiaçıya aid edilməlidir.
Nəticə:
33. Beləliklə, məhkəmə toplanmış sübutlara obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli hüquq normalarına müvafiq olaraq qiymət verərək hesab edir ki, iddia qismən təmin edilməli, 05 sentyabr 2025-ci il tarixdən başlayaraq Rəsulova (Parçal) Ağsubə Nəsir qızından 04 iyun 2013-cü il təvəllüdlü X7 və 16 sentyabr 2014-cü il təvəllüdlü X4 yetkinlik yaşına çatanadək saxlanılması üçün hər ay hər uşaq üçün ölkə üzrə müəyyən olunmuş minimum əmək haqqının 0,2 misli həddində sabit pul məbləğində aliment İddiaçı xeyrinə tutulmalıdır. İddia tələbi digər hissədə təmin edilməməlidir. Qətnamə dərhal icra edilməlidir.
34. Yuxarıda qeyd olunanlara əsaslanaraq və Azərbaycan Respublikasının Mülki Prosessual Məcəlləsinin 216-220, 227, 233, 235, 360-cı maddələrini rəhbər tutaraq, məhkəmə
Qət etdi:
İddia tələbi qismən təmin edilsin. 05 sentyabr 2025-ci il tarixdən başlayaraq Rəsulova (Parçal) Ağsubə Nəsir qızından 04 iyun 2013-cü il təvəllüdlü X7 və 16 sentyabr 2014-cü il təvəllüdlü X4 yetkinlik yaşına çatanadək saxlanılması üçün İddiaçı xeyrinə sonrakı artımlar nəzərə alınmaqla hər ay hər uşaq üçün ölkə üzrə müəyyən olunmuş minimum əmək haqqının 0,2 misli həddində sabit pul məbləğində aliment tutulsun. İddia tələbi digər hissədə təmin edilməsin. Qətnamə dərhal icra edilsin. Məhkəmə xərcləri İddiaçı aid edilsin. Qətnamədən rəsmi qaydada verildiyi gündən 1 (bir) ay müddətində Masallı Rayon Məhkəməsi vasitəsi ilə (“Elektron məhkəmə” informasiya sistemində yaradılmış elektron kabinet üzərindən) Şirvan Apellyasiya Məhkəməsinə apellyasiya şikayəti verilə bilər. Qətnamədən şikayət verilmədikdə, işdə iştirak edən şəxslərə rəsmi qaydada verildiyi gündən 1 (bir) ay keçdikdən sonra qanuni qüvvəyə minir.
Sədirlik edən: Elşən Hüseynov