Sabirabad Rayon Məhkəməsi Qətnamə — İş №2(056)-637/2023

Azərbaycan Respublikası adından QƏTNAMƏ Sabirabad rayon İş № 2(056)-637/2023 10.05.2023 SABİRABAD RAYON MƏHKƏMƏSİ X2 Allahverdiyevin sədrliyi, Məhkəmə iclasının katibi Mətin Azər oğlu Quliyevin katibliyi, İddiaçı və Cavabdeh iştirakı ilə, İddiaçı Cavabdeh qarşı «aliment məbləğinin artırılması» tələbinə dair iddiası üzrə mülki işə Sabirabad Rayon Məhkəməsində açıq məhkəmə iclasında baxaraq, məhkəmə MÜƏYYƏN ETDİ: İddiaçı Cavabdeh qarşı «aliment məbləğinin artırılması» tələbi barədə iddia ərizəsi ilə məhkəməyə müraciət edərək, himayəsində olan xx.xx.2015-ci ildə anadan olmuş X1 xeyrinə məhkəmə tərəfindən müəyyən olunmuş alimentin miqdarının dəyişdirilərək Cavabdeh hər ay 220 manat miqdarında sabit pul məbləğində aliment alınaraq ona verilməsi barədə qətnamə çıxarılmasını xahiş etmişdir. Məhkəmə iclasında iştirak edən İddiaçı iddia tələbini müdafiə edərək göstərdi ki, borclu Cavabdeh himayəsində olan xx.xx.2015-ci ildə anadan olmuş X3 adlı uşağın saxlanması ücün hər ay 110 manat sabit pul məbləğində aliment tutularaq ona verilməsi barədə Şirvan Apellyasiya Məhkəməsinin xx.xx.2019-cu il tarixli 2(106)-1664/2019 saylı qətnaməsi qəbul edilmişdir. Hüseyn onun himayəsindədir. Qətnamə çıxan vaxtdan cavabdeh aliment verir. O, isə uşağı saxlamağa çətinlik çəkir. Cavabdeh yaşayış minimumdan dəfələrlə çox miqdarda aliment ödəməyə imkanı vardır. Uşağın maddi tələbatları artmışdır. Uşaqlar üçün zəruri olan istehlak malların qiyməti dəfələrlə artmışdır. Uşağı saxlamağa çox çətinlik çəkir. Beləliklə o, məhkəmədən iddia tələbinin tam təmin olunması barədə qətnamə çıxarılmasını xahiş edir. Məhkəmə iclasında iştirak edən Cavabdeh iddia tələbini qismən etiraf edərək bildirdi ki, o, İ Qarabağ müharibəsi iştirakçısıdır və 80 manat təqaüd alır. Özü heç yerdə işləmir. Keçən müddətdə əmlak vəziyyətdə hər hansı dəyişiklik baş verməmişdir. Himayəsində xəstə anası vardır. Bununla belə o, anlayır ki, uşağınnı yaşı artdıqca tələbatları da artır. O, övladının saxlanması üçün iddiaçıya aliment ödəməkdən imtina etmir və yayınmaq niyyətində deyildir. Lakin tələb edilən məbləğə aliment ödəmək imkanında deyildir. Ona görə də o, məhkəmə qətnaməsi ilə müəyyən edilmiş aliment məbləğinin 150 manata artırılmasına etiraz etmir. Məhkəmə tərəflərin izahatını dinləyib, iş materiallarını araşdıraraq hesab edir ki, iddia tələbi aşağıdakı əsaslara görə qismən təmin edilməlidir. İş materiallarından görünür ki, Şirvan Apellyasiya Məhkəməsinin xx.xx.2019-cu il tarixli 2(106)-1664/2019 saylı qətnaməsi ilə Sabirabad Rayon Məhkəməsinin xx.xx.2018-ci il tarixli qətnaməsi ilə müəyyən edilmiş alimentin miqdarının dəyişdirilməsi və xx.xx.2015-ci ildə anadan olmuş Hüseyn adlı uşağın yetkinlik yaşına çatana qədər saxlanması üçün hər ay Cavabdeh 110 manat sabit pul məbləğində alimentin tutularaq İddiaçı verilməsi qət edilmişdir. Azərbaycan Respublikasının Ailə Məcəlləsinin 112.1-ci maddəsinə əsasən aliment ödənilməsi barədə saziş olmadıqda, məhkəmə tərəfindən alimentin miqdarı müəyyən olunduqdan sonra, tərəflərdən birinin ailə və maddi vəziyyətində dəyişiklik olmuşsa, məhkəmə tərəflərdən istənilən birinin tələbi ilə alimentin müəyyən olunmuş miqdarını dəyişə bilər. Həmin Məcəllənin 233.4-cü maddəsinə əsasən cavabdehdən vaxtaşırı ödəmələrin alınmasını qət edən qətnamə qanuni qüvvəyə mindikdən sonra, ödəmələrin miqdarını müəyyənləşdirən və ya onların davam etməsinə təsir edən hallar dəyişərsə, hər bir tərəf yeni iddia vermək yolu ilə ödəmələrin miqdarını və müddətlərini dəyişdirməyi tələb etməyə haqlıdır. «Azərbaycan Respublikasında 2023-cü il üçün yaşayış minimumu haqqında» Qanuna əsasən 2023-cü il üçün yaşayış minimumu uşaqlar üçün 220 manat məbləğində müəyyən edilmişdir. Məhkəmə qeyd olunan normalar kontekstində iddia tələbinə münasibətdə qeyd edir ki, işdən də göründüyü kimi, azyaşlı uşağın yetkinlik yaşına çatanadək saxlanması üçün cavabdehdən iddiaçının xeyrinə aliment tutulması barədə məhkəmə qətnaməsinin qəbul edilməsindən artıq 3 ildən də artıq vaxt keçmişdir. Bu müddətdə ölkə ərazisində həm iqtisadi artım, həm inkişaf səviyyəsi, həm gündəlik, həm də vaxtaşırı tələbatların qiymətlərində artım baş vermişdir ki, 3 il bundan əvvəl müəyyən edilmiş aliment məbləği ilə hazırki vaxtda azyaşlının artan tələbatlarının ödənməsi qeyri-mümkündür. Belə olan halda Şirvan Apellyasiya Məhkəməsinin xx.xx.2019-cu il tarixli 2(106)-1664/2019 saylı qətnaməsi ilə müəyyən edilmiş aliment məbləğinin dəyişdirilməsi zərurəti yaranmışdır. Bununla yanaşı, məhkəmə onu da qeyd edir ki, məhkəmə qətnaməsi ilə müəyyən edilmiş aliment məbləği dəyişdirilərkən (artırılarkən) azyaşlı uşağı saxlamağın hər iki valideynin borcu olması halı, cavabdehin qətnamə ilə müəyyən edilmiş alimentin artırılması ilə bağlı mövqeyi nəzərə alınmalı, bu xüsusda iddia tələbi qismən təmin edilməli, Şirvan Apellyasiya Məhkəməsinin xx.xx.2019-cu il tarixli 2(106)-1664/2019 saylı qətnaməsi əsasında Cavabdeh hər ay sabit pul məbləğində tutulan alimentin həcmi artırılmalı, xx.xx.2015-ci il təvəllüdlü X1 yetkinlik yaşına çatanadək saxlanılması üçün cavabdehdən iddiaçının xeyrinə hər ay 150 (bir yüz əlli) manat sabit pul məbləğində aliment tutularaq iddiaçıya ödənilməlidir. Azərbaycan Respublikasının Ailə Məcəlləsinin 100.2-ci maddəsinə əsasən aliment məhkəməyə müraciət edildiyi vaxtdan tutulur. Azərbaycan Respublikasının Mülki Prosessual Məcəlləsinin 14.2-ci maddəsinə əsasən məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 77.1-ci maddəsinə əsasən hər bir tərəf öz tələblərinin və etirazlarının əsası kimi istinad etdiyi halları sübut etməlidir. Həmin Məcəllənin 217.4-cü maddəsinə əsasən məhkəmə (hakim) öz qətnaməsini yalnız məhkəmə iclasında tədqiq olunmuş sübutlarla əsaslandırır. Göstərilənlərə əsasən və Azərbaycan Respublikasının MPM-nin 216-220 və 360-cı maddələrini rəhbər tutaraq, məhkəmə QƏT ETDİ: İddia qismən təmin edilsin. xx.xx.2015-ci il təvəllüdlü X1 yetkinlik yaşına çatanadək saxlanılması üçün Şirvan Apellyasiya Məhkəməsinin xx.xx.2019-cu il tarixli 2(106)-1664/2019 saylı qətnaməsi əsasında Cavabdeh hər ay tutulmalı olan alimentin həcmi artırılaraq 150 (bir yüz əlli) manat sabit pul məbləğində müəyyən edilsin. xx.xx.2015-ci il təvəllüdlü X1 yetkinlik yaşına çatanadək saxlanılması üçün Cavabdeh qətnamə qanuni qüvvəsini aldığı tarixindən başlayaraq hər ay 150 (bir yüz əlli) manat sabit pul məbləğində aliment tutularaq İddiaçı ödənilsin. İddia qalan hissədə təmin edilməsin. Qətnamədən rəsmi qaydada alındığı gündən 1 (bir) ay müddətində Sabirabad Rayon Məhkəməsi vasitəsi ilə Şirvan Apellyasiya Məhkəməsinə apellyasiya şikayəti verilə bilər.