Tovuz Rayon Məhkəməsi Qətnamə — İş №2(062)-2423/2023

Azərbaycan Respublikası adından QƏTNAMƏ Tovuz rayon İş № 2(062)-2423/2023 19.10.2023 TOVUZ RAYON MƏHKƏMƏSİ Hakim Baxşıyev Qafil Yavər oğlunun sədrliyi, Cavadova Kəklik Mirəziz qızının katibliyi, İddiaçı və cavabdeh X2 iştirakları ilə İddiaçı cavabdeh X3 qarşı «aliment məbləğinin dəyişdirilməsi tələbinə» dair mülki işə Tovuz şəhərində 19 oktyabr 2023-cü il tarixdə açıq məhkəmə iclasında baxaraq, məhkəmə MÜƏYYƏN ETDİ: İddiaçı məhkəmədə cavabdeh X3 qarşı iddia qaldıraraq Tovuz rayon Məhkəməsinin 23 iyul 2018-ci il tarixli qətnaməsinə əsasən, cavabdeh X1 tutulan aliment məbləğinin dəyişdirilməsinə dair qətnamə çıxarılmasını xahiş etmişdir. Məhkəmə iclasında İddiaçı iddianı müdafiə edərək göstərdi ki, cavabdeh X4 ilə el adəti qaydasında evlənmişlər. Birgə nikahlarından 23 avqust 2008-ci ildə Nəzrin və 07 yanvar 2011ci ildə Sənan adlı uşaqları olmuşdur. Tovuz rayon Məhkəməsinin 23 iyul 2018-ci il tarixli qətnaməsi ilə uşaqların saxlanılması üçün hər ay cavabdehin hər növ qazancının və gəlirlərinin 1/3 hissəsi miqdarında aliment tutulması qət edilmişdir. Hazırda cavabdeh işdən çıxdığını bildirərək, alimenti ödəmir. Ona görə də aliment alınması qaydasını dəyişdirmək istəyir. Odur ki, birgə nikahlarından 23 avqust 2008-ci ildə anadan olmuş Nəzrin və 07 yanvar 2011-ci ildə anadan olmuş Sənan adlı uşaqların saxlanılması üçün cavabdehdən hər ay hər uşağa görə 220 manat aliment tutulmasını xahiş edir. Cavabdeh X4 məhkəmə iclasında iddianı qismən qəbul edərək izahatında bildirdi ki, iddiaçı ilə birgə nikahlarından 23 avqust 2008-ci ildə Nəzrin və 07 yanvar 2011-ci ildə Sənan adlı uşaqları olmuşdur. Tovuz rayon Məhkəməsinin 23 iyul 2018-ci il tarixli qətnaməsi ilə uşaqların saxlanılması üçün hər ay onun hər növ qazancının və gəlirlərinin 1/3 hissəsi miqdarında aliment tutulması qət edilmişdir. Hazırda işdən çıxmışdır. İşdən çıxana qədər daim alimentini ödəmişdir. Hazırda işləmir, tələb olunan alimenti ödəyə bilməz. Ona görə də iddianın qismən təmin olunmasını xahiş edir. Məhkəmə iddiaçının izahatını dinləyib, işdə olan sənədləri araşdıraraq hesab edir ki, aşağıdakılara əsasən iddia qismən təmin edilməlidir. İşə əlavə olunmuş doğum haqqında arayışdan məlum olur ki, tərəflərin birgə nikahlarından 23 avqust 2008-ci ildə Nəzrin və 07 yanvar 2011-ci ildə Sənan adlı uşaqları anadan olmuşdur. İşə əlavə olunmuş icra vərəqəsinin surətindən görünür ki, 23 fevral 2018-ci ildə başlayaraq 23 avqust 2008-ci ildə anadan olmuş Nəzrin və 07 yanvar 2011-ci ildə anadan olmuş Sənan adlı uşaqların yetkinlik yaşına çatanadək saxlanması üçün X2 qazancının (başqa gəlirlərinin) 1/3 hissəsi miqdarında aliment tutularaq İddiaçı verilməsi qət edilmişdir. Məhkəmə iclasında müəyyən olundu ki, tərəflərin birgə nikahlarından 23 avqust 2008-ci ildə Nəzrin və 07 yanvar 2011-ci ildə Sənan adlı uşaqları olmuşdur. Tovuz rayon Məhkəməsinin 23 iyul 2018-ci il tarixli qətnaməsi ilə uşaqların saxlanılması üçün hər ay cavabdehin hər növ qazancının və gəlirlərinin 1/3 hissəsi miqdarında aliment tutulması qət edilmişdir. Hazırda iddiaçı uşaqların böyüyüb saxlanması üçün 23 iyul 2018-ci il tarixli qətnamənin dəyişdirilərək cavabdehdən hər ay hər uşağa görə sabit pul məbləğində 220 manat aliment tələb edir. Azərbaycan Respublikası Ailə Məcəlləsinin 75.1 maddəsinə görə valideynlər uşaqlarını saxlamağa borcludurlar. Ailə Məcəlləsinin 78.1-ci maddəsinə əsasən valideynlər arasında yetkinlik yaşına çatmayan uşaqlara aliment ödənilməsi barədə saziş yoxdursa, eləcə də aliment verməyə borclu olan valideynin qazancı (gəliri) qeyri müntəzəm, dəyişən olarsa, ya qazancın (gəlirin) hamısını və ya bir hissəsini həmin valideyn natura və ya xarici valyuta ilə alırsa, yaxud onun qazancı və ya sair gəliri yoxdursa, habelə alimentin valideynin qazancından (gəlirindən) müəyyən hissə kimi tutulması mümkün olmadığı, çətinlik törətdiyi və tərəflərdən birinin marağının əhəmiyyətli dərəcədə pozulduğu başqa hallarda, uşaqların saxlanılması üçün vəsait tutulmasını tələb edən şəxsin xahişi ilə alimentin miqdarı məhkəmə tərəfindən hər ay ödənilməli olan sabit pul məbləğində və ya eyni zamanda həm sabit pul məbləğində, həm də bu Məcəllənin 76-cı maddəsinə uyğun olaraq qazancın (gəlirin) müəyyən hissəsi kimi müəyyən edilə bilər. Həmin Məcəllənin 78.2-ci maddəsinə əsasən sabit pul məbləğinin miqdarı məhkəmə tərəfindən tərəflərin maddi və ailə vəziyyəti, diqqətəlayiq olan digər hallar nəzərə alınmaqla uşağın əvvəlki təminatının səviyyəsinin mümkün qədər maksimal saxlanması əsas tutularaq müəyyən edilir. Həmin Məcəllənin 112.1-ci maddəsinə əsasən, aliment ödənilməsi barədə saziş olmadıqda məhkəmə tərəfindən alimentin miqdarı müəyyən olunduqdan sonra tərəflərdən istənilən birinin ailə və maddi vəziyyətində dəyişiklik olmuşsa, məhkəmə tərəflərdən istənilən birinin tələbi ilə alimentin müəyyən olunmuş miqdarını dəyişə bilər və ya aliment ödəməli olan şəxsi tərəflərin diqqətəlayiq başqa maraqlarını nəzərə almaqla aliment ödəməkdən azad edə bilər. Azərbaycan Respublikası Konstitutusiyasının 34-cü maddəsinin 4-cü hissəsinə əsasən ər ilə arvadın hüquqları bərabərdir. Uşaqlara qayğı göstərmək, onları tərbiyə etmək valideynlərin həm hüququ, həm də borcudur. «Uşaq hüquqları haqqında» 12 noyabr 1989-cu il tarixli Konversiyasının 18-ci maddəsinə əsasən, uşağın tərbiyəsi və inkişafı üçün əsas məsuliyyət valideynlər daşıyırlar. Uşaq Hüquqları haqqında Azərbaycan Respublikası Qanununun 13-cü maddəsinə əsasən uşağın Azərbaycan Respublikası qanunvericiliyi ilə müəyyən olunmuş minimum dolanacaq məbləğindən az olmayan maddi təminat hüququ vardır və həmin Qanunun 19-cu maddəsinə görə uşağın maddi və mənəvi tələbatlarının təmin edilməsi valideynlərin əsas vəzifəsidir. Məhkəmə uşaqların diqqətəlayiq mənafeyini nəzərə alaraq hesab edir ki, qətnamə qüvvəyə mindiyi tarixdən başlayaraq X1 hər ay hər uşaq üçün 170 manat aliment alınıb 23 avqust 2008-ci ildə anadan olmuş Nəzrin və 07 yanvar 2011-ci ildə anadan olmuş Sənan adlı uşaqların yetkinlik yaşına çatana kimi saxlanması üçün İddiaçı verilməsini qanuni və əsaslı hesab edir. Məhkəmə bu nəticəyə gələrkən həm uşaqların mənafeyini, həm də tərəflərin əmlak vəziyyətini nəzərə alır. İddianın alimentin məbləğinə aid qalan hissəsi təmin edilməməlidir. Azərbaycan Respublikası MPM-nin 119.2-ci maddəsinə əsasən iddiaçı müəyyən olunmuş qaydada dövlət rüsumunu ödəməkdən azad edilmişsə, dövlət rüsumu iddianın təmin edilmiş hissəsinə münasib olaraq cavabdehdən tutularaq dövlət gəlirlərinə alınır. Dövlət rüsumu haqqında Azərbaycan Respublikası Qanunun 8.1.2-ci maddəsinə görə iddia qiyməti 1.000 manatdan 10.000 manatadək olduqda 30 manat + 1.000 manatdan yuxarı olan iddia qiymətinin 1 faizi məbləğində dövlət rüsumu ödəməlidir. Azərbaycan Respublikası MPM-nin 112.1.3-cü maddəsinə əsasən iddianın qiyməti aliment alınması haqqındakı iddialarda bir il ərzində ödəmənin məcmusu ilə müəyyən edilir. Şərh olunanlara əsasən Azərbaycan Respublikası MPM-nin 216-220-ci maddələrini rəhbər tutaraq məhkəmə, Q Ə T E T D İ: İddia qismən təmin edilsin. Tovuz rayon Məhkəməsinin 23 iyul 2018-ci il tarixli 2(062)-921/2018 saylı qətnaməsi ilə müəyyən edilmiş alimentin ödənilmə qaydası dəyişdirilsin. Qətnamə qanuni qüvvəyə mindiyi tarixdən başlayaraq tərəflərin birgə nikahlarından 23 avqust 2008-ci ildə anadan olmuş Nəzrin və 07 yanvar 2011-ci ildə anadan olmuş Sənan adlı uşaqların yetkinlik yaşına çatanadək saxlanılması üçün cavabdeh X1 hər ay hər uşağa görə 170 manat aliment alınaraq İddiaçı verilsin. İddianın alimentin məbləğinə aid qalan hissəsi təmin edilməsin. X1 60,80 (altmış manat səksən qəpik) manat dövlət rüsumu alınsın. Qətnamə tərəflərə rəsmi qaydada təqdim edildiyi gündən 1(bir) ay müddətində Tovuz Rayon Məhkəməsi vasitəsi ilə Gəncə Apelyasiya Məhkəməsinə apelyasiya şikayəti verilə bilər. Sədrlik edən Qafil Baxşıyev