Füzuli Rayon Məhkəməsi Məhkəmə əmri — İş №2(064)-786/2023

Azərbaycan Respublikası adından MƏHKƏMƏ ƏMRİ Füzuli rayonu İş № 2(064)-786/2023 07.04.2023 FÜZULİ RAYON MƏHKƏMƏSİ Mən, Füzuli Rayon Məhkəməsinin hakimi Həşimov Yaşar Xanoğlan oğlu, ərizəçi - Füzuli rayonu, Bala Bəhmənli kəndində yaşayan Kreditor, borclu - Füzuli rayonu, Pirəhmədli kəndində qeydiyyatda olan və Füzuli rayonu, Zobucuq-3 qəsəbəsi, ev 328-də yaşayan Borclu qarşı pul tələbinə dair ərizəsini və ərizəyə əlavə edilmiş sənədləri araşdıraraq, müəyyən etdim: Kreditor Borclu qarşı pul tələbinə dair ərizə ilə məhkəməyə müraciət edərək borcludan 137 manat borcun kreditorun hesabına ödənilməsinə dair məhkəmə əmri çıxarılmasını xahiş etmişdir. Kreditor ərizəsini belə əsaslandırmışdır ki, borclu ilə aralarında bağlanmış xx.xx.2021-ci il tarixli nisyə alğı-satğı müqaviləsinə əsasən borcluya cəmi 250 manat dəyərində “SAMSUNG A01 core” markalı 1 ədəd telefon 6 ay müddətində satılmışdır. Borclu aldığı malın dəyərindən qismən ödəniş etsə də borclu qaldığı 137 manatı bu günədək ödəməmişdir. Borcun könüllü olaraq qaytarılması barədə borcluya kreditor tərəfindən dəfələrlə xəbərdarlıq edilsə də, o, borcunu indiyədək ödəməmiş, üzərinə götürdüyü öhdəliyi yerinə yetirməmişdir. Odur ki, həmin məbləğin borcludan alınaraq kreditorun xeyrinə tutulması barədə məhkəmə əmrinin verilməsini xahiş etmişdir. Ərizəni və ona əlavə edilmiş sənədləri nəzərdən keçirərək hesab edirəm ki, aşağıdakılara əsasən ərizə təmin olunmalıdır. Belə ki, ərizəyə əlavə edilmiş tərəflər arasında bağlanmış xx.xx.2021-ci il tarixli nisyə alğısatğı müqaviləsinə əsasən satıcı alıcıya cəmi 250 manat dəyərində “SAMSUNG A01 core” markalı 1 ədəd telefonu dəyərini hissə-hissə ödəmək şərti ilə 6 ay müddətinə satmışdır. Lakin alıcı üzərinə götürdüyü müqavilə öhdəliklərini lazımınca yerinə yetirməmiş və 137 manatı ödəməmişdir. Belə olan halda, satıcı-kreditor haqlı olaraq məhkəməyə müraciət etmişdir. İddia tələbinin qanuni əsası kimi aşağıdakı maddi hüquq normalarına isnad etməyi məqsədəmüvafiq hesab edirəm. Öhdəlik hüququndan bəhs edən Azərbaycan Respublikası Mülki Məcəlləsinin 385.1-ci maddəsində qeyd edilir ki, öhdəliyə əsasən bir şəxs (borclu) başqa şəxsin (kreditorun) xeyrinə müəyyən hərəkəti etməlidir, məsələn, pul ödəməli, əmlak verməli, iş görməli, xidmətlər göstərməli və i.a. və ya müəyyən hərəkətdən çəkinməlidir, kreditorun isə borcludan vəzifəsinin icrasını tələb etmək hüququ vardır. Bununla yanaşı, Azərbaycan Respublikası Mülki Məcəlləsinin: 442-ci maddəsinə əsasən, öhdəliyin icra edilməməsi dedikdə, onun pozulması və ya lazımınca icra edilməməsi (vaxtında icra edilməməsi, mallarda, işlərdə və xidmətlərdə qüsurlarla və ya öhdəliyin məzmunu ilə müəyyənləşdirilmiş digər şərtləri pozmaqla icra edilməsi) başa düşülür. 443.1-ci maddəsinin tələbinə görə, öhdəliyi icra etməyən borclu kreditora dəymiş zərərin əvəzini ödəməyə borcludur. 445.2.1-ci maddəsinə əsasən, öhdəliyin onun icrası üçün müəyyənləşdirilmiş müddətdə icra edilməməsi borclunun icranı gecikdirməsi sayılır. 567-ci maddəsində qeyd olunur ki, alqı-satqı müqaviləsinə görə satıcı əşyanı alıcının mülkiyyətinə verməyi, alıcı isə əşyanı qəbul edib əvəzində müəyyənləşdirilmiş pul məbləğini (qiyməti) ödəməyi öhdəsinə götürür. 600.1-ci maddəsində göstərilir ki, alqı-satqı müqaviləsində əşyanın alıcıya verildikdən müəyyən müddət sonra ödənilməsinin (əşyaların nisyə satışının) nəzərdə tutulduğu halda alıcı ödənişi müqavilədə nəzərdə tutulan müddətdə, müqavilədə belə müddət nəzərdə tutulmadıqda isə bu Məcəllənin 427-ci maddəsinə uyğun müəyyənləşdirilmiş müddətdə həyata keçirməlidir. 600.2-ci maddəsinə görə, əşyaların nisyə satışı satış günü qüvvədə olmuş qiymətlər üzrə həyata keçirilir. Nisyə satılmış əşyaların qiymətinin sonradan dəyişməsi, əgər müqavilədə ayrı qayda nəzərdə tutulmayıbsa, yenidən hesablaşmaya səbəb olmur. 600.4-cü maddəsində əsasən, əşyanı təhvil almış alıcı onu alğı-satqı müqaviləsində nəzərdə tutulan müddətdə ödəmək vəzifəsini icra etmədikdə satıcı verilmiş əşyanın ödənilməsini və ya ödənilməmiş malın qaytarılmasını tələb edə bilər. Ərizəyə əlavə olunmuş sənədlərlə kreditorun tələbinin aşkar olduğu və həmin tələbin borclunun mübahisə edilməyən vəzifəsinə əsaslandığı təsdiq olunur. Tələb sadə yazılı formada bağlanmış əqdə əsaslandığından, həmin tələb üzrə məhkəmə əmri verilməsini mümkün hesab edirəm. Belə ki, Azərbaycan Respublikası Mülki Prosessual Məcəlləsinin: 276.1-ci maddəsinə əsasən, kreditorun tələbi aşkardırsa və ya həmin tələb borclunun barəsində mübahisə edilməyən vəzifəsinə əsaslanırsa, bu hallarda məhkəmə əmri verilə bilər. 276.2-ci maddəsində göstərilir ki, məhkəmə əmri aşağıdakı hallarda verilə bilər: 276.2.2. tələb sadə yazılı formada bağlanmış əqdə (kredit təşkilatları ilə bağlanmış kredit müqavilələri və məişətdə istehlak edilmiş təbii qaz, su, elektrik və ya istilik enerjisinin haqqının ödənilməsi barədə tələblər istisna olmaqla) əsaslanırsa. 280-ci maddəsində qeyd edilir ki, məhkəmə əmri, irəli sürülmüş tələb məhkəməyə daxil olan gündən 3 gün ərzində, məhkəmə baxışı keçirilmədən və izahatları dinlənilmək üçün tərəflər çağırılmadan çıxarılır. Odur ki, göstərilənləri nəzərə alaraq və Azərbaycan Respublikası Mülki Prosessual Məcəlləsinin 275, 276, 280-284-cü maddələrinin tələblərini rəhbər tutaraq, əmr etdim: Ərizə təmin edilsin. Kreditor - Füzuli rayonu, Bala Bəhmənli kəndində yaşayan Kreditor xeyrinə borclu - Füzuli rayonu, Pirəhmədli kəndində qeydiyyatda olan və Füzuli rayonu, Zobucuq-3 qəsəbəsi, ev 328-də yaşayan Borclu (***-***-**-**) 137 manat pul tutulsun. Borclu məhkəmə əmrini aldığı gündən 10 (on) gün müddətində məhkəmə əmrini vermiş Füzuli Rayon Məhkəməsini yazılı xəbərdar etməklə verilmiş tələbə və ya onun hissəsinə qarşı etiraz edə bilər. Məhkəmə əmri qətnamə qüvvəsinə malikdir. Məhkəmə əmrindən şikayət verilə bilməz. Sədrlik edən: Yaşar Həşimov AZƏRBAYCAN RESPUBLİKASİ FÜZULİ RAYON MƏHKƏMƏSİ Ünvan: Füzuli rayonu, Horadiz şəhəri, tel.: (026-315) 51-71 2(064)-786/2023 07 aprel 2023-cü il Füzuli rayonu, Zobucuq-3 qəsəbəsi, ev 328-də yaşayan Borclu Kreditor Borclu qarşı pul tələbinə dair ərizəsi üzrə Füzuli Rayon Məhkəməsinin xx.xx.2023-cü il tarixli məhkəmə əmri sizə göndərilir. Məlumat üçün bildirirəm ki, Azərbaycan Respublikası Mülki Prosessual Məcəlləsinin 280-ci maddəsində qeyd edilir ki, məhkəmə əmri, irəli sürülmüş tələb məhkəməyə daxil olan gündən 3 gün ərzində, məhkəmə baxışı keçirilmədən və izahatları dinlənilmək üçün tərəflər çağırılmadan çıxarılır. Həmin Məcəllənin 282 və 283-cü maddələrinə əsasən, məhkəmə əmrini aldığınız gündən 10 gün müddətində verilmiş tələbə və ya onun hissəsinə qarşı əmri vermiş məhkəməni yazılı xəbərdar etməklə etiraz edə bilərsiniz. Sizin etirazınız prosessual baxımdan iddia ərizəsinə bərabər tutulur. Əgər o, vaxtında verilmişdirsə, hakim əmri ləğv edir və materiallar bu Məcəllə ilə müəyyən edilmiş ümumi müddəalara uyğun olaraq iddia icraatına keçir. Həmin Məcəllənin 284.2-ci maddəsinin tələbinə görə, əgər müəyyən edilmiş müddətdə (yəni məhkəmə əmrini aldığınız gündən 10 gün müddətində) məhkəməyə etirazınız daxil olmazsa, hakim kreditora dərhal məhkəmənin möhürü ilə təsdiq edilmiş icrası məcburi olan məhkəmə əmrinin surətini verir. Qoşma: məhkəmə əmri. HAKİM Yaşar Həşimov